Урысыем и Лъэпкъ банк и Къутамэу Адыгэ Республикэм щыIэм къызэритырэмкIэ, кIэлэеджакIохэм финансхэмкIэ яшIэныгъэхэр къызщагъэ­лъэгъогъэ Олимпиадэм Адыгеим щыщ ныбжьыкIэ мини 3800-рэ хэлэжьагъ.

Мазэм къыкIоцI кIэлэеджа­кIохэм яшIэныгъэхэр къызэрагъэлъэгъуагъэм дакIоу, шIуагъэ къэзытыщт къэбархэр платформэу «Учи. Ру.» зыфиIорэм щызэрагъэгъотыгъэх.

ИкIыгъэ илъэсым елъыты­гъэмэ, зишIэныгъэхэр зыуплъэ­кIухэ зышIоигъуагъэр мыгъэ фэ­дищкIэ нахьыбагъ. ЕтIани мыгъэ къэлэ еджапIэхэм ачIэс­хэм ямызакъоу, къоджэ кIэ­лэ­еджакIохэри нахьыбэу олим­пи­адэм къыхэлэжьагъэх. Ана­хьы­бэр Красногвардейскэ, Мые­къопэ, Тэхъутэмыкъое ыкIи Кощ­хьэблэ районхэм якIэлэ­еджакIохэр арых.

Лъэпкъ банкым и Къутамэ ипащэу Сергей Самойленкэм къызэриIорэмкIэ, кIэлэеджэ­кIуабэ олимпиадэм къызкIыхэлэжьагъэр онлайн шIыкIэр зэ­рэIэрыфэгъур ыкIи ныбжьыкIэ­хэм финансхэм яхьылIэгъэ шIэныгъэхэр зэра­шIогъэ­шIэгъон­хэр ары. Анахь дэгъоу агъэцэ­кIагъэх финансхэмкIэ пшъэрылъ зыфэпшIыжьыныр ыкIи гъэпцIа­кIохэм язекIуакIэхэр къэпшIэнхэр. КIэлэеджа­кIохэмкIэ нахь къинэу къычIэ­кIыгъэх экономикэм епхыгъэ гъэцэкIэнхэр. Хэукъоныгъэу ашIыгъэ пэпчъ иджэуап тэрэз ныбжьыкIэхэм алъэгъужьынэу амал яIагъ.

Олимпиадэм изэхэщакIох Урысыем и Банк, Урысыем финансхэмкIэ и Министерствэ, финансхэмкIэ научнэ-ушэтэкIо институтыр ыкIи нэмыкIхэр.