ШIушIэ фондэу «ЛIэужхэм яшIэжь» зыцIэм илъэс къэс «Гвоздикэ плъыжь» зыфиIорэ Iофтхьабзэр зэхещэ. Ар ТекIоныгъэм и Мафэ ипэгъокIэу зэрахьэрэ Iофтхьабзэхэм ахэхьэ, социальнэ мэхьанэ иI.

Тихэгъэгу зэрэщыхабзэу, гвоздикэ плъыжьыр Хэгъэгу зэошхом хэкIодагъэхэм яшIэжьрэ псаоу къэнагъэхэм рэзэныгъэу афэтшIырэмрэ ятамыгъ.

Фондэу «Лiэужхэм яшIэжь» зыфиIорэр шIэжь мафэхэм язакъоп ветеранхэм IэпыIэгъу защыфэхъурэр. Ащ пшъэрылъэу иIэр шIушIэ IэпыIэгъум цIыфхэр алъэп­къыкIэ, аныбжьыкIэ, ядунэееплъыкIэкIэ зэтекIыхэми, зэпэблэгъэнхэ, шъхьэкIафэ зэфашIыжьын зэрэфаер ащамыгъэгъупшэныр ары.

Фондым зэхищэрэ Iофтхьабзэхэм анахь къахагъэщырэр Хэгъэгу зэошхом иветеранхэм япсауныгъэ нахь къызэтегъэнэгъэныр, медицинэ IэпыIэгъум ахэр щымыкIэнхэм епхыгъэхэр ары. Ахэр бэ мэхъух. Ветеранхэм реабилитациер, уахътэм диштэрэ протезхэр, дэгъоу зэхэозыгъэхыщт аппаратхэр, курэжъыехэр, Iэзэгъу уцхэр, нэмыкIхэр ящыкIагъэх. Ахэр арагъэгъо­тынхэм ренэу фондыр пылъ.

Акциеу «Гвоздикэ плъыжьыр» мэлылъфэгъум и 21-м къыщегъэжьагъэу мэкъуогъум и 22-м нэс рагъэ­кIокIыщт. Ащ изэхэщакIохэм ветеранхэм IэпыIэгъу афэхъунэу фаехэр Iофтхьабзэм къыхэлэжьэнхэу къы­рагъэблагъэх.