Дунаир къэошIужьыгъ, арышъ, Мыекъопэ районым изекIо лъагъохэм уатехьа­жьы­ным игъо къэсыгъ. ЗекIоныр зикIасэхэр ащкIэ зыхэдэнхэ алъэкIыщтыр бэ.

Хьаджыкъо пэблагъэу зы мэфэ зыгъэпсэфыгъо зыпэIу­хьащт лъагъохэр жъугъэу щызэб­лэ­кIых. Ахэм ащыщ къушъхьэ цакIэу УатэкIэ заджэхэрэ чIыпIэм екIурэ лъэс гъогур. ЧIыоп­сым иIэрышI саугъэт гъэшIэгъо­ныр Хьаджыкъом километрэрэ ныкъорэ фэдизкIэ пэIудзыгъэу мэзым икуупIэ хэт. Ащ унэсыщтмэ гъогууанэр чыжьэп, ти­чIыопс дахэ къыщызыкIухьанэу зикIасэхэмкIэ чIыпIэшIу дэд. Зы мэфэ кIогъу лъагъохэр зикIасэхэм ар якIуапI. Сыхьат имыкъу гъогууанэм пэIохьэ. Къыщыплъэ­гъугъэр икъугъэу зыщыпIорэм джащ фэдизкIэ укъехыжьы.

— Лъагъор уукIочIынкIэ псын­кIэхэм ахалъытэ. Уатэм уекIуфэ узэрэдэкIуаерэр лъэшэп. Мэз къэбзэ дахэм пхырэкIы. Чъыгэе гъэхъунэ дахэхэр уапэ къыще­фэх. УиунагъокIэ, сабыйхэри уигъусэхэу, укIощтмэ, IэшIэх ыкIи фэдэ щыIэп. Анахь цIыкIухэми къяхьылъэкIыщтэп. Алъэгъущтым гухахъо хагъотэщт, — лъагъом икъэбар къеIуатэ зекIозещэу Егор Кичигиным.

Гъатхэр лъагъом зидэхэгъу лъэхъанхэм ащыщ. УцыкIэр къыщэкIы, щыпэ къэгъагъэхэр къыщызэIуехых, тыгъэпс фабэм фэзэщыгъэ мэзыр щыIэныгъэм къыфэущыжьы. ИчыжьэплъапIэхэм уазытехьэкIэ, псэупIэу Хьаджыкъорэ къушъхьэтхэу Унэкъэжърэ уашъхьарыплъын олъэкIы. Бзыу орэд макъэу хэIукIрэм а пстэуми ядэхагъэ къегъэлъэшы. УзэрэгъэгущыIэзэ, зыпплъыхьэзэ уахътэр зэрэкIуа­гъэр къэмышIэу чIыопсым исаугъэт гъэшIэгъон укъекIуалIэ ыкIи къушъхьэ тIокIэ охыпIэшхом шъхьащыт къушъхьэ цакIэу уатэм итеплъэ угу къэзыгъэкIырэр нафэу нэм къыкIэуцо.

— Шъыпкъэр пIощтмэ, мы чIыпIэр зекIо кIуапIэу щыт. АпэрэмкIэ, къызэрэсIуагъэу, укIочIыгъошIу, ятIонэрэмкIэ, уизакъоу укъежьэми, зекIозещэ уимыгъусэу, къэгъотыгъуае хъу­щтэп, чэщи утехъухьащтэп. Зи­щынэ зыушэтынэу зикIасэхэми Уатэр якIуапI. МотоциклэкIэ оташъхьэм теуцуагъэхэри слъэгъугъэх. Ар кIэпшIыкIыжьынкIэ щынагъо, ау джащ фэдэхэри къахэкIых, — тыщегъэгъуазэ Егор Кичигиным.

Ау итеплъэ зыфэдэмкIэ зэтеIотыкIынхэр щыIэх. ЧIыопс саугъэтыр шым е махъшэм ышъхьэ фэзыгъадэрэри макIэп. Анахьэу ар къызхэщрэр ыбгъу­IокIэ узеплъыкIэ ары. Шъыпкъэм­кIэ, зигугъу къэтшIыгъэ былымышъхьэ къупшъхьэр угу къегъэ­кIы. Уахътэм, жьым ыкIи псым апсыхьэгъэ мыжъоу ар шIошъгъэ­хъугъуае. Мы саугъэтым къэсыгъэхэу къарыу къызфэнагъэхэм ягъогупэ лъагъэкIуатэмэ, гъэшIэгъоныбэр къяжэ. Уатэм километрэ 50 фэдизкIэ пэIудзы­гъэу Европэм ишъхьангъупчъэкIэ заджэхэрэ чIыпIэр щыгъэунэ­фыгъ. Мыжъом шъхьангъупчъэр угу къыгъэкIэу плIэнэбзэу ибзы­кIыгъ. «Шъхьангъупчъашъхьи» иIэу ущетIысэхын, къушъхьэ мэзым идэхагъэ ухэплъэн, ижьы къабзэ къэпщэн плъэкIыщт.

Дахэу мы лъагъом щыплъэгъун плъэкIыщтхэм ащыщ КосмодромкIэ заджэхэрэ чIыпIэр. ЖьаупIэу щыт къушъхьэ тIуакIэм псынэкIэчъхэр щызэблэчъых, бжыхьэм ухэкIи гъатхэм ухэ­хьагъ пшIуигъэшIэу къэкIыхэрэр ащ щыкъашхъох, жьыр мэзым нахьи нахь щыкъабз, щычъыIэтагъ. Пчэй чъыгыбэр шъхьащы­тэу, къапытэкъугъэ кIэхэр пкIэшъэ чIэгъмэ ащызэтеуагъ. ЯIэ­шIугъэ­кIэ дэшхор угу къагъэкIы.

Фэдэ чIыпIэ дахэхэр зэпыгъэ­щагъэхэу зэрэщыплъэгъухэрэр къушъхьэ цакIэу Уатэм екIолIэрэ зекIо лъагъор гъэшIэгъоны зышIырэмэ ащыщ. Адыгеим ичIыпIэ дахэу зынэсыгъэмэ ар ахэзыгъэуцо зышIоигъохэм чIы­опс саугъэтыр къяжэ.

Анцокъо Ирин.