Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм мэлылъфэгъум къэгъэлъэгъонэу иIэщтхэм шъуащытэгъэгъуазэ.

Мэлылъфэгъум и 19-м «Къэзыгъэзэ­жьырэр Тхьэм ештэжьы» зыфиIорэр Лъэпкъ театрэм къыщагъэлъэгъощт. Пьесэр зытхыгъэр, спектаклэр зыгъэуцугъэр Абхъазым, Адыгеим искусствэхэмкIэ язаслуженнэ IофышIэшхоу Нэгъой Инвер.

Къэгъэлъэгъоныр яныбжьыкIэгъум шIу зэрэлъэгъугъэхэм афэгъэхьыгъ. КIалэмрэ пшъашъэмрэ зэгурымыIохэу зэшIокIодыгъэх нахь мышIэми, илъэс 20-м къехъу тешIэжьыгъэу зэIукIэжьыгъэх. Псэлъыхъо кIалэу бизнесым хэхьагъэм мылъку зэри­гъэгъотыгъ, ау унагъо иIэпышъ, ыгукIэ рэхьатэп. Хэукъоныгъэу ышIы­гъэр зыди­шIэ­жьи, иапэрэ шIулъэгъу къыфигъэзэ­жьыгъ.

Адыгэмэ зэраIоу, къэзыгъэзэжьырэр Тхьэм ештэжьы. ШIу зэрэлъэгъущтыгъэ­хэр къэзэрэгъотыжьыгъэх, шъхьэгъусэ зэфэхъугъэх.

«Шыу маф»

Урысыем итхакIохэм я Союз хэтэу Дэрбэ Тимур ипьесэ техыгъэ къэгъэлъэ­гъоныр режиссерэу, Адыгэ Республикэм искусствэхэмкIэ изаслуженнэ IофышIэшхоу ЕмкIуж Андзор ыгъэуцугъ, и 22-м теплъыщт.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм ипэгъокIэу Дэрбэ Тимур пьесэр ытхыгъ. Адыгэм ищыIэкIэ-псэукIэ, адыгэр мамырзехьэу зэрэщытым, нэмыц пшъашъэмрэ адыгэ кIалэмрэ шIулъэгъу къабзэу зэфашIыгъэр къызэраухъумагъэм, адыгэр дунаим зэрэщашIэрэм афэгъэхьыгъэ къэгъэлъэгъоныр тарихъым къыхэ­хыгъэу щыт. Спектаклэм узыIэпещэ, лъэпкъ шIэ­жьым, хьыкумышIхэм язекIуакIэхэм уягупшысэ, зэфагъэм гукIэ укъыфэкIо.

«ГъашIэм имэзищ»

Мамый Ерэджыбэ ипьесэ техыгъэ спектаклэр Адыгеим искусствэ­хэмкIэ изаслуженнэ IофышIэшхоу, Къал­мыкым изаслуженнэ артистэу, режиссерэу Хьакъуй Аслъан ыгъэуцугъ. Къоджэ щыIакIэм ар къыхэхыгъ. Чылэм дэс кIалэр врачым дэжь зэкIом сымаджэу, мэзищ нахь ымыгъэшIэжьыщтэу къыриIуагъ. КIалэр ащ изакъоп зыгъэгумэкIырэр, IофшIапIэу зыIутым ипащэ зэрэтыгъуакIом щыгъуазэшъ, хьапс тыраригъэлъхьан имурадэу уплъэ­кIунхэр ешIых, тхьапэу ищыкIэгъэщтхэр еугъоих…

Зэгъэпшэнхэр

— Лъэхъэнэ зэфэшъхьафхэм атхыгъэхэм атехыгъэ спектаклэхэр къэтэгъэлъагъох, — къытиIуагъ Адыгэ Рес­публикэм и Лъэпкъ театрэу Цэй Ибрахьимэ ыцIэ зыхьырэм ихудожественнэ пащэ ипшъэрылъхэр зыгъэцэкIэрэ Хьакъуй Аслъан. — Театрэр адыгабзэм икъэухъумэн фэлажьэ. Театрэм цIыфыр епIу, щыIэныгъэм фегъасэ. Лъэхъаным диштэрэ къэгъэ­лъэгъонхэр искусствэр зыгу рихьы­хэрэм ашIогъэшIэгъоных.

«Шыу мафэм» еплъыгъэхэ Бырсыр Батырбый, МэщфэшIу Нэдждэт, Абыдэ Хьисэ, ГъукIэ Замудин, ЦIыкIушъо Ас­лъан, нэмыкIхэм къэгъэлъэгъоным осэ ин фашIыгъ. Адыгэм итарихъ, ишэн-хабзэхэр, игущыIэ щэрыохэр гум екIух.

— Адыгэр мамырзехьэу зэрэщытыр спектаклэм къыхэщы, — къытиIуагъ сурэтышI-модельер цIэрыIоу СтIашъу Юрэ. — Сэри мамырныгъэм игъэпытэн адыгэ шъуашэхэмкIэ, тхыпхъэхэмкIэ къэсэгъэлъагъо. Тигупшысэхэр зэрэзэфэдэхэр сигуапэ. Адыгеир къэралыгъо гъэпсыкIэ иIэу зыпсэурэр илъэси 100 зэрэхъурэм ипэгъокIэу сиIофшIэн хэзгъахьэрэр макIэп. «Шыу мафэм» сызэреплъыгъэм гугъэ-гуп­шысэ чыжьэхэр сигъэшIыгъэх. Адыгэ лъэпкъыр зыгъэдахэрэмэ, зыгъэпы­тэрэмэ адыгэ шъуашэр, лъэпкъ шэн— хабзэхэр ащыщых. Сафэраз къэгъэлъэгъоныр зыгъэуцугъэхэм.

— Режиссерым екIолIакIэу къэгъэлъэгъоным фишIыгъэр, драматургым темэу ыштагъэр, артистхэм ярольхэр дэгъоу къызэрашIыхэрэр сыгу рихьыгъэх. Спектаклэм щыIэныгъэм куоу ухещэ, урегъэгупшысэ, — къытиIуагъ Урысыем ижурналистхэм я Союз хэтэу Унэрэкъо Гулэз.

Урысыем изаслуженнэ артисткэу, Адыгеим инароднэ артисткэу Зыхьэ Мэлайчэт артистхэм, зэхэщакIохэм гущы­Iэ фабэу ариIуагъэр зэхэтхыгъэ. Артисткэ цIэрыIом исэнэхьатэгъухэм Iофэу ашIагъэм осэшIу ритыгъ, афэгушIуагъ.

Къэгъэлъэгъонхэр мэлылъфэгъум и 19-м, 22-м, 27-м Пушкинскэ народнэ Унэу агъэцэкIэжьыгъэм щыкIощтых. ЗэхэщакIохэм театрэр зыгу рихьыхэрэр ахэм арагъэблагъэх. Билетхэм афэгъэхьыгъэ упчIэхэм яджэуапхэр мыщ фэдэ телефонкIэ къы­шъуаIощтых: 8-918-421-29-98.

ЕмтIылъ Нурбый. Спектаклэхэу «Къэзыгъэзэжьырэр Тхьэм ештэжьы» ыкIи «Шыу маф» зыфи­Iо­хэрэм сурэтхэр ащытырахыгъэх.