Адыгеим и ЛIышъхьэу КъумпIыл Мурат тхьа­мэтагъор дызэрихьэзэ псэупIэу Яблоновскэм ихэхъоныгъэ иIофыгъохэм зыщатегущыIэгъэхэ зэIукIэ Адыгэ Республикэм и Правительствэ зычIэт унэм щыкIуагъ.

Iофтхьабзэм хэлэжьагъэх Адыгэ Республикэм и Премь­ер-министрэ ипшъэрылъхэр зыгъэцэкIэрэ КIэрэщэ Анзаур, Адыгеим финансхэмкIэ иминистрэу Виктор Орловыр, АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэу Валерий Картамышевыр, Тэхъутэмыкъое районым ипащэу Шъэо Аскэр, Яблоновскэ къэлэ псэупIэм ипащэу Iэ­тэжьыхьэ Заурдин, Адыгэ Рес­публикэм псэолъэшIынымкIэ и Министерствэ къепхыгъэ учреж­дениехэм ялIыкIохэр.

Iофыгъо шъхьаIэхэу зытегущы­Iагъэхэм зыкIэ ащыщ республи­кэ проектэу «Iэрыфэгъу къэлэ щыIакIэр» зыфиIорэр муниципа­литетым гъэцэкIагъэ зэрэщы­хъурэр.

Адыгеим и ЛIышъхьэ къызэ­рэхигъэщыгъэмкIэ, лъэпкъ проектым къыхиубытэрэ Iофтхьа­бзэхэр ыкIи пшъэрылъхэр зэкIэ игъом дэгъоу зэшIохыгъэнхэ фае.

«Планым къыдилъытэрэ Iоф­тхьабзэхэм ягъэцэкIэн имыза­къоу, тапэкIэ зэшIотхын фаеу щытхэмкIэ тхылъхэр дгъэхьазырынхэ фае, мыщ къыхеубытэх 2023-рэ ыкIи 2024-рэ илъэсхэм дгъэпсын фаеу хъущт псэуалъэ­хэр. Федеральнэ гупчэм чIыпIэ­хэм яхэхъоныгъэкIэ, цIыфхэм ящыIакIэ нахьышIу шIыгъэнымкIэ амал инхэр къытетых. А амалхэр шIуагъэ къатэу жъугъэ­федэх», — къыIуагъ КъумпIыл Мурат.

Къэлэ псэупIэм ипащэу Iэтэ­жьыхьэ Заурдин къызэрэхигъэ­щыгъэмкIэ, мы илъэсым Яблоновскэм общественнэ чIыпIэрэ цIыфхэр зыщыпсэурэ унэхэм ящагу 11-рэ щызэтырагъэпсы­хьащтых. Ахэм сомэ миллион 76-м ехъу апэIухьащт. НепэкIэ бюджет пстэуми сомэ миллион 60 къыхагъэкIыгъах а гухэлъ­хэм апэIуагъэхьанэу.

Адыгэ Республикэм и ЛIышъхьэ финансхэмкIэ Министерствэм пшъэрылъ фишIыгъ рес­публикэм ибюджет къыхагъэ­кIызэ псэуалъэхэм ахъщэ тедзэ апэIуагъахьэзэ ашIынэу.

Гъогухэм яшIын зэрэлъыкIуа­тэрэм иIофыгъуи мыщ щыхэплъагъэх. Лъэпкъ проектэу «Щы­нэгъончъэу щыт гъогу дэгъухэр» зыфиIорэм диштэу мы илъэсым Яблоновскэм иурамхэу Широкэмрэ Фрунзем ыцIэкIэ щытымрэ игъэкIотыгъэ гъэцэ­кIэжьынхэр ащызэшIуахыщтых, урамэу Титовым ыцIэкIэ щытыр зэтырагъэпсыхьащт. Проектхэм къыдалъытэ ощхыпсхэр зэры­лъэдэщтхэр, тротуархэр зэтегъэ­псыхьэгъэнхэр, урамхэр тэрэзэу къэгъэнэфыгъэнхэм епхыгъэ Iофыгъохэр зэшIохыгъэнхэр. ПстэумкIи сомэ миллион 214-м ехъу гъогу фондым ащ пае къыхагъэкIыщт.

Муниципалитетым игъоу ылъэ­гъухэрэм зядэIу нэуж Адыгеим и ЛIышъхьэ адыригъэштагъ проектхэу урамэу Гагариным ыцIэкIэ щытым ыбгъуитIукIэ ыкIи урамэу Космическэм исэмэ­губгъукIэ лъэсрыкIоу яIэхэр зэтегъэпсыхьэгъэнхэр къыдэзы­лъы­­тэхэрэм. А гъогуитIури со­циаль­нэ псэуалъэхэм якIух ыкIи лъэс­рыкIохэмкIэ щынэгъончъэу щытынхэ фае.

КъумпIыл Мурат мыщкIэ ищы­кIэгъэ тхылъхэр агъэхьазырынхэу ыкIи мы илъэсым IофшIэнхэр аублэнхэу пшъэрылъ къафишIыгъ.

Ахэм анэмыкIэу муниципалитетымкIэ мэхьанэшхо зиIэ проект заулэхэри игъоу ащ ылъэ­гъугъэх. Ахэм ахэхьэх мэ­шIогъэкIосэ депомрэ ащ екIо­лIэщт гъогумрэ яшIын, трибунэр нахь зэтегъэпсыхьэгъэныр, ма­шинэхэр зыдагъэуцухэрэ чIыпIэ­хэмрэ административнэ унэ­хэмрэ язытет гъэтэрэзыгъэныр, физкультурэмрэ псауныгъэм игъэпытэнрэ япхыгъэ комплексыкIэр шIыгъэныр, гъогухэм язы Iахьхэр гъэкIэжьыгъэнхэр.

Адыгеим и ЛIышъхьэ ведомствэхэм япащэхэм пшъэрылъ афишIыгъ рахъухьэгъэ Iофтхьабзэхэр зэкIэ зэшIохыгъэ хъунхэм пае муниципалитетым IэпыIэгъу ратынэу. АР-м и ЛIышъхьэ ипресс-къулыкъу Сурэтхэр А. Гусевым тырихыгъэх.