Урысые Федерацием пэшIуекIорэ санкциеу IэкIыб къэ­рал­хэм ащаштагъэхэм къыздахьыгъэ кризисыр цIыфхэм афэгъэпсынкIэгъэнымкIэ УФ-м и Президентэу Владимир Путиныр кIэщакIо зыфэхъугъэхэм ащыщ ыныбжь илъэси 8 хъугъэу, ау 17-м шIомыкIыгъэу кIэлэцIыкIу е зихэхъогъу зэрыс унагъохэм ахъщэ IэпыIэгъу ятыгъэныр.

УФ-м и Премьер-министрэу Михаил Мишустиным Правительствэм блэкIыгъэ 2021-рэ илъэсым Iофэу ышIагъэм, тапэкIэ гухэ­лъэу яIэхэм афэгъэхьыгъэ докладэу Къэралыгъо Думэм изэхэсыгъо къыщишIыгъэм къызэрэщыхигъэщыгъэмкIэ, сомэ миллиард 450-м ехъу ащ пэ­Iуагъэхьащт. Жъоныгъо­кIэ мазэм щыублагъэу илъэсым ыкIэм нэс, пэшIо­рыгъэшъэу къызэралъы­тагъэмкIэ, кIэлэцIыкIоу е зихэхъогъоу нэбгырэ миллионитф фэдизмэ мы по­собиер аратыщт. Шъо­лъырэу унагъор зыщы­псэурэр, гъотэу иIэр зы­фэдизыр къыдэлъытагъэу къэпIон зыхъукIэ, сомэ ми­нихым къыщегъэжьа­гъэу мин 16-м нэсы мазэ къэс IэпыIэгъу тедзэу афэкIощтыр.

Кризисым пэшIуекIорэ Iофтхьабзэу джыри тапэкIэ зэшIуахынэу агъэнэ­фагъэхэм Къэралыгъо Думэр ахэплъэнэу щыт. Правительствэм и Тхьаматэ а IофшIэныр нахь агъэпсынкIэнэу къызэращыгугъухэрэм къыкIигъэтхъыгъ. Ащ къызэриIуа­гъэмкIэ, социальнэ ахъщэ тынхэр, пенсиехэр индексацие шIыгъэнхэу, цIыфыр зэрыпсэун ылъэ­кIыщт ахъщэ анахь макIэр, лэ­жьэпкIэ анахь макIэр къэIэтыгъэнхэу ахэм къадыхэлъытагъ.