Пэм раутхэрэ вакцинэр джы агъэфедэн алъэкIыщт
Гамалея ыцIэ зыхьырэ ушэтын Гупчэм къыгъэхьазырыгъэ коронавирусым пэуцужьырэ пэм раутхэрэ вакцинэм игъэфедэн рагъэжьагъ.
Мыр вакцинэу «Спутник V» зыфиIорэм изэхэтыкIэ фэд, ау зэрагъэфедэрэ шIыкIэмкIэ зэтекIых.
УФ-м псауныгъэр къэухъумэгъэнымкIэ и Министерствэ ыпэкIэ къызэрэщаIуагъэмкIэ, мыр ревакцинациемкIэ агъэфедэнэу рахъухьагъ.
— Пэм раутхэрэ вакцинэм клиническэ ушэтынхэр ыкIугъэх ыкIи мэлылъфэгъум и 1-м ар атхыгъ. ЗэрэрахъухьагъэмкIэ, адрэ вакцинэу шъолъырхэм ащагъэхэр агъэфедэгощтых, — къыIуагъ эпидемиологиемкIэ ыкIи микробиологиемкIэ научнэ ушэтын Гупчэм ипащэу Александр Гинцбург.
Препаратыр «Спутник V-м» фэдэу тхьамэфищ азыфагоу тIогъогогъоу пэм раутхэ. ШIэныгъэлэжьым игущыIэхэмкIэ, мы вакцинэр пэ кIоцIым ихьанэу ежьэгъэ вирусым пэуцужьызэ, пкъынэ-лынэм хигъахьэрэп.
Коронавирусым пэуцужьырэ пэм раутхэрэ вакцинэр аллергие хьылъэ зиIэхэм, уз зэфэшъхьафхэм ябырсырыгъом зыхалъхьэ хъущтэп. Зысымэджэгъэхэ ужым тхьамэфи 2 — 4 зытешIэкIэ зэрахьылIэн алъэкIыщт. Джащ фэдэу мы вакцинэр фэсакъыхэзэ зыгъэфедэн фаехэр: лъы ыкIи нервнэ системэхэм япхыгъэу уз хьылъэхэр, эпилепсиер, гууз зиIэхэр. Ащ дакIоу, бзылъфыгъэ лъэрымыхьэхэм (я 22-рэ тхьамафэм ыуж) ыкIи сабый зыгъашхэхэрэм препаратыр ахалъхьэ хъущтэу къеIо.
Пэм раутхэрэ вакцинэр тишъолъыр къызысыщтым тыкIэупчIагъ.
— ВакцинакIэр зэратхыгъэм тыщыгъуаз. Ау ар Адыгеим къызысыщтым епхыгъэ къэбар мы уахътэм тIэкIэлъыгоп. Аужэу къытIэкIэхьагъэу ахатлъхьэрэр кIэлэцIыкIухэм афытегъэпсыхьэгъэ Спутник М-р ары, — къыIуагъ АР-м псауныгъэр къэухъумэгъэнымкIэ и Министерствэ Iэзэгъу профилактикэмкIэ иотдел испециалистэу Оксана Горюхинам. Iэшъынэ Сусан.