УФ-м ПенсиехэмкIэ ифонд и Къутамэу АР-м щыIэм блэкIыгъэ 2021-рэ илъэсым Iофэу ышIагъэр зыщызэфахьысыжьыгъэ ыкIи 2022-мкIэ пшъэрылъхэр зыщагъэнэфэгъэхэ зэхэсыгъо иIагъ. Ар зэрищагъ Къутамэм ипащэу МэщлIэкъо Хьамидэ. Зэхэсыгъом хэлэжьагъ АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.

Пстэумэ апэу ащ гущыIэр ыштагъ. ЗэхъокIыныгъэ инхэр ПенсиехэмкIэ фондым иIофшIэн зэрэзэхэщагъэм фашIы­гъэх. Мырзэ Джанбэч ар къыхигъэщызэ, къулыкъушIэхэм пшъэрылъэу яIэхэм къахэхъуагъэу, яIофшIэн нахь къин хъугъэ нахь мышIэми, профессионализмэгъэ ин хэлъэу, зэрифэ­шъуашэм тетэу ахэр зэрагъэцакIэхэрэм, цIыфхэм афагъэ­нэфэгъэ ахъщэ тынхэр игъом ыкIи икъоу аIэкIэгъэхьэгъэнхэр сыдигъокIи апшъэ зэра­шIырэм апае къазэрафэразэм къыкIигъэтхъыгъ. ШIуагъэ къытэу яIоф­шIэн лъагъэкIотэнэу Къута­мэм ипащи, щылажьэхэрэми къафэлъэIуагъ.

МэщлIэкъо Хьамидэ нэужым докладэу къышIыгъэм къызэрэщиIуагъэмкIэ, 2021-рэ илъэсым итыгъэгъазэ и 31-м нэс пштэмэ, пенсионерэу республикэм исыр 121251-рэ мэхъу. Ахэм ащыщэу нэбгырэ 22717-р, ар процент 18,7-р ары, IофшIапIэхэм аIутых. Илъэсым къыкIоцI пенсиеу, пособиеу, ны мылъкум къыды­хэлъытэгъэ ахъщэу, нэмыкIэу пстэумкIи атыгъэр сомэ мил­лиард 26-м ехъу.

IофшIапIэм Iумытыжь пенсио­нерхэм, ахэр нэбгырэ 98534-рэ мэхъух, страхованиемкIэ пенсиеу къафакIорэр 2021-рэ илъэ­сым ищылэ мазэ и 1-м проценти 6,3-кIэ къаIэтыгъ. Пен­сиехэмкIэ фондым имыеу къэралыгъо бюджетым къыхэхы-гъэу къызэратыхэрэм япенсиехэр, социальнэхэри ахэтэу, проценти 3,4-кIэ индексацие афашIыгъэхэу, блэкIыгъэ илъэсым имэлылъфэгъу мазэм и 1-м къыщыублагъэу къараты. 2020-рэ илъэсым Iоф зышIэгъэ пенсионерхэм япенсиехэми 2021-м ишышъхьэIу мазэ ахэплъэжьыгъэх.

А зэпстэумэ ауж респуб­ликэм къыщатырэ пенсиер, гурытымкIэ лъытагъэу, сомэ 13843-рэ чапыч 85-рэ хъугъэ, страхованиемкIэ пенсиер сомэ 14845-рэ чапыч 39-м нэсыгъ. Федеральнэ фэгъэкIотэнхэр иIэу, мазэ къэс ахъщэ тедзэ къыратэу республикэм исыр нэбгырэ 39689-рэ мэхъу. Ахэм ахэхьэх Хэгъэгу зэошхом хэлэ­жьагъэхэр, сэкъатныгъэ зиIэхэр, кIэлэцIыкIоу сэкъатныгъэ зиIэ­хэ­ри ахэтых, ыныбжь имыкъугъэу фашистхэм гъэрэу аштэгъа­гъэхэр, радиацием иягъэ зэригъэкIыгъэхэр, нэмыкIхэр. Мыхэм ахъщэ тедзэу къафа­кIорэм 2021-рэ илъэсым имэзэе мазэ проценти 4,9-рэ къыхэ­хъуагъ.

IофшIапIэм Iумытыжьэу, пенсионерыр зэрэпсэун ылъэкIыщт ахъщэ анахь макIэу субъектым щагъэнэфа­гъэм зи­гъот кIэмыхьэ­хэрэм федеральнэ со­циаль­нэ ахъщэ те­дзэ къараты. Адыгеим ащ фэ­дэ ахъщэ анахь ма­кIэу щагъэ­нэфа­гъэр сомэ 8138-рэ зэрэ­хъурэр. 2021-рэ илъэ­сым иты­гъэгъазэ и 31-м нэс пштэмэ, ащ фэдэу федеральнэ социальнэ ахъщэ те­дзэ къызэратэу рес­публикэм исыр нэбгырэ 15711-рэ мэхъу. Ар зэпстэ­ум­кIи пенсионерхэм япроцент 13. Ахъщэ тедзэу къа­фа­кIорэр, гурытымкIэ лъы­та­гъэу, сомэ 1853-рэ чапыч 32-рэ зэрэхъурэр.

ГъэрекIо, шышъхьэIум, пенсие къызыфакIохэрэм зэкIэми зэтыгъо ахъщэ тедзэу сомэ мин пшIырыпшI къэралыгъом къа­ритыгъ.

ИкIыгъэ илъэсым ибэдзэогъу мазэ и 1-м къыщыублагъэу са­бый ежэрэ бзылъфыгъэу зигъот макIэхэм, илъэси 8-м ыныбжь ехъугъэу, ау 17-м шIомыкIыгъэ кIэлэцIыкIу е зихэхъогъу зиIэ ныхэу, тыхэу изакъоу зыпIухэ­рэм къэралыгъом афигъэнэ­фэгъэ пособиер фондым ыгъэ­псынэу ригъэжьагъ.

Ны мылъкум фэгъэхьыгъэ программэм игъэцэкIэни пшъэ­рылъ шъхьаIэу ПенсиехэмкIэ фондым иIэхэм ащыщ. Къутамэм ипащэ къызэриIуагъэмкIэ, илъэс 15-у ар зыщыIэм Адыгеим щыпсэурэ унэгъо 30800-мэ ащ исертификат аратыгъ. Ахэм ащыщэу 2021-рэ илъэсым программэм къыхиубытагъэр унэгъо 3326-р ары.

Нахьыбэхэм ащ къыщыдэ­лъытэгъэ ахъщэр псэукIэ амал­хэр нахьышIу шIыгъэнхэр ары зыпэIуагъахьэрэр. 2021-рэ илъэ­сым къызэратыгъэхэм ащы­щэу унэгъо 2282-мэ, ар процент 66,1-рэ мэхъу, псэупIэм пай агъэфедагъ.

Страхование зиIэ пэпчъ хэу­шъхьафыкIыгъэу учет шIыгъэным исистемэ (система персонифицированного учета) зыкIагъэпсыгъэр цIыфым пенсиехэм алъэныкъокIэ фитыныгъэу иIэ­хэр икъоу ыгъэфедэнхэ, къэралыгъо фэIо-фэшIэ пстэур къыз­IэкIигъэхьанхэ амал етыгъэ-ным пай. УФ-м ПенсиехэмкIэ ифонд и Къутамэу АР-м щыIэм ипащэ къызэриIуагъэмкIэ, рес­публикэм щыпсэоу, мы систе­мэм зыщаригъэтхымэ зышIоигъоу лъэIу тхылъыр 2021-рэ илъэсым къэзытыгъэр нэбгырэ 2911-рэ, атхыгъахэр зэзыхъо­кIыжьыгъэр 3309-рэ мэхъух. Джащ фэдэу нэбгырэ 1290-мэ IофшIэпIэ чIыпIэу зыIутхэр мы системэм щагъэнэфагъ. 2022-рэ илъэсым ищылэ мазэ и 1-м нэс пштэмэ, пстэумкIи нэбгырэ 451698-рэ системэм щытхыгъэу мэхъу.

Социальнэ фэIо-фашIэхэм ягъэцэкIэнкIэ ЗыкI къэралыгъо къэбарлъыгъэIэс системэр (ЕГИССО) Адыгеим нахьыбэу щагъэфедэ хъуным фытегъэ­псыхьэгъэ IофшIэнхэри фондым и Къутамэ хэбзэ гъэцэкIэкIо ыкIи чIыпIэ зыгъэIорышIэжьыпIэ къулыкъухэр игъусэхэу лъагъэ­кIуатэх. Къэралыгъо фэIо-фа­шIэхэм япортал иIэпыIэгъукIэ сабый къызыфэхъугъэхэм, сэкъатныгъэ зэриIэм пае куп зы­фагъэнэфагъэхэм, пенсием зыныбжь нэсыгъэхэм яфитыныгъэхэр икъоу алъыгъэIэсыгъэнхэм фытегъэпсыхьэгъэ Iофтхьабзэхэри зэшIохыгъэ хъугъэх.

Хабзэ зэрэхъугъэу, УФ-м ПенсиехэмкIэ ифонд и Къутамэ иIофышIэ анахь чанхэр зэхэсыгъом къыщыхагъэщыгъэх. УФ-м ПенсиехэмкIэ ифонд и Щытхъу тхылъ къафагъэшъошагъ бюджетымкIэ отделым испециалистэу Тамара Чернявскаям, казначействэмкIэ отделым иIо­фышIэу Мэрэтыкъо Аминэт, «УФ-м ПенсиехэмкIэ ифонд иIофышIэ гъэшIуагъ» зыфиIорэ цIэр къыфагъэшъошагъ социальнэ ахъщэ тынхэм афэгъэзэгъэ отделым испециалист-эксперт шъхьаIэу Шэуджэн Марыет.

Джащ фэдэу УФ-м и Прези­дент и Полномочнэ ЛIыкIоу Къыблэ Федеральнэ шъолъырым щыIэм ирэзэныгъэ тхылъкIэ къыхагъэщыгъэх пенсиехэм­рэ социальнэ ахъщэ тынхэмрэ ягъэнэфэн фэгъэзэгъэ ГъэIо­ры­шIапIэм иIофшIэкIо купэу пенсиехэм адэлажьэрэм ипащэу Къэбэртэе Марыет, мы ГъэIорышIапIэм иотделэу N-у 5-м испециалистэу Хьаджырэкъо Аминэт, Шэуджэн районымкIэ клиентхэм афэгъэзэгъэ къу­лыкъум иIофышIэу Чэсэбый Жаннэ.

АР-м IофшIэнымкIэ ыкIи социальнэ хэхъоныгъэмкIэ и Ми­нистерствэ и Щытхъу тхылъ къафагъэшъошагъэу ащ ипащэ къаритыжьыгъэх пенсиехэмрэ социальнэ ахъщэ тынхэмрэ афэ­гъэзэгъэ отделым ипащэ игуадзэу Елена Локтиенкэм, пенсиехэмрэ социальнэ ахъщэ тынхэмрэ ягъэнэфэн фэгъэзэгъэ ГъэIорышIапIэм иотдел иIофышIэу ЦIыкIу Марзет, бюджетымкIэ отделым иIофышIэу Сапый Тамилэ ыкIи къэбархэмкIэ къэралыгъо системэм иIоф­шIэн фэгъэзэгъэ купым испециалистэу Александр Просвиряко­вым. Мыхэм анэмыкIэу «УФ-м ПенсиехэмкIэ ифонд и Отличник» зыфиIорэ бгъэхалъхьэмкIэ ПенсиехэмкIэ фондым и Тхьаматэ, мыщ и Къутамэу АР-м щыIэм ярэзэныгъэ тхылъхэмкIэ нэбгырабэхэр къыхагъэщыгъэх.

ХЪУТ Нэфсэт. Сурэтхэр Iэшъынэ Аслъан тырихыгъэх.