Джырэблагъэ Росреестрэм Общественнэ советым хэтхэр игъусэхэу хэгъэгум ипсэолъэшI компание пэрытхэм ялIыкIохэм административнэ пэрыохъуныгъэу щыIэхэм къакIегъэчыгъэным фэгъэхьыгъэ шъхьэихыгъэ ээдэгущыIэгъу адыриIагъ.

А Iофтхьабзэм тегъэпсыхьагъэу псэолъэшI отраслэм фэгъэ­хьыгъэ шапхъэу хэбзэгъэуцу­гъэм диштэхэрэм, амыгъэкощырэ мылъкум ылъэныкъокIэ къэ­ралыгъо фэIо-фашIэхэр зэрафагъэцакIэхэрэм, электрон шIы­кIэм тетэу къатырэ лъэIу тхылъхэм япчъагъэ нахьыбэ шIыгъэным ыкIи нэмыкIхэм атегущыIагъэх.

Адыгеим ыцIэкIэ а Iофтхьабзэм хэлэжьагъэх Росреестрэм, Кадастровэ палатэм, Общественнэ советым, Адыгеим псэолъэшIынымкIэ и Министерствэ, ООО-у «Базальтым» ялIыкIохэр.

«Кризисым пэшIуекIорэ IофтхьэбзакIэхэр псэолъэшI отрас­лэм IэпыIэгъу етыгъэным фытегъэпсыхьагъэх. Санкциехэм защыхэхъорэ лъэхъаным хабзэм икъулыкъушIэхэмрэ псэолъэшIынымкIэ бизнесымрэ язэпхыныгъэ гъэпытэгъэным мэхьэнэ гъэнэфагъэ иIэу щыт. Тызэгъу­сэмэ ары ныIэп пшъэрылъхэу тапашъхьэ итхэр зэшIотхынхэ зытлъэкIыщтыр. ЦIыфхэмкIэ мэхьанэ­шхо зиIэ псэуалъэхэр зыщытшIыщт чIыгухэр нахьыбэу тIэ къидгъэхьанхэ фае», — къы­Iуагъ Росреестрэм и ГъэIорышIапIэ ипащэу Марина Никифоровам.

Шъугу къэтэгъэкIыжьы: Урысые Федерацием и Правительствэ кризисым пэшIуекIорэ Iофтхьабзэхэр тапэкIэ рихъухьэгъагъэх псэолъэшIыным IэпыIэгъу етыгъэным пае. А лъэныкъомкIэ IофшIэныр лъэкIуатэ.