Хабзэ зэрэхъугъэу, мэлылъфэгъум и 7-м псауныгъэм и Дунэе мафэ хагъэунэфыкIы. «ТичIыналъэрэ типсауныгъэрэ» зыфиIорэ девизым чIэтэу «Опсэу!» зыцIэ Iофтхьабзэр зэхащагъ. Мэлылъфэгъум и 7-м къыщегъэжьагъэу и 10-м нэс волонтер-медикхэр зыхэлэжьэщтхэ Iофтхьэбзэ зэфэшъхьафхэр Адыгеим щыкIощтых.

Iофтхьабзэу «Уицыхьэ зытегъэлъыжь! Опсэу!» зыфиIорэм къыдыхэлъытагъэу цIыфхэм агъэфедэрэ тонометрэхэм Iоф зэрашIэрэр ауплъэкIущт. Мыекъуапэ иполиклиникэу урамэу Школьнэм тетым пчъэ зэIухыгъэм имафэ щызэхащэщт.

Мэлылъфэгъу мазэм къыкIоцI IофшIапIэхэм аIутхэм ялъыдэкIуае зынэсырэр, гу-лъынтфэ узхэр къяутэлIэным ищынагъо ашъхьащытмэ зэрагъэшIэн, электрокардиограммэр зытырырагъэхын, специалистхэр упчIэжьэгъу ашIынхэ алъэ­кIыщт. Джащ фэдэу кIэлэеджакIохэми, ны-тыхэми узхэр къямыутэлIэнхэм тегъэпсыхьэгъэ Iофтхьэбзэ зэфэшъхьафхэр мы мазэм афызэхащэщтых.