2021-рэ илъэсым бэдзэогъум и 30-м Мыекъопэ районым зыщэIэм Адыгеим и ЛIышъхьэ пшъэрылъэу афишIыгъагъэхэр гъэцэкIагъэ зэрэхъухэрэм фэгъэхьыгъэ зэIукIэ тыгъуасэ Ситуационнэ гупчэм щыкIуагъ.

Мыщ хэлэжьагъэх Адыгэ Республикэм и Премьер-министрэ ипшъэрылъхэр зыгъэцэкIэрэ КIэрэщэ Анзаур, Адыгэ Республикэм иминистрэхэм я Кабинет хэтхэр, Адыгэ Респуб­ликэм и ЛIышъхьэрэ иминистрэхэм я Кабинетрэ я Администрацие ипащэхэр, джащ фэдэу Мыекъопэ районым иIэшъхьэтетхэр.

Мы зэIукIэм хэлажьэхэрэр хэушъхьафыкIыгъэу зытегущыIагъэхэр псэупIэу Кужорскэм социальнэ псэуалъэу дэтхэр зызэрегъэлъэгъухэ нэуж Адыгеим и ЛIышъхьэ афишIыгъэгъэ пшъэрылъхэр гъэцэкIагъэ зэ­рэхъугъэхэр ары. Лъэпкъ проектхэм, джащ фэдэу къэралыгъо программэхэм къызэлъаубытырэ IофшIэнхэр: культурэм и Унэ гъэцэкIэжьыгъэныр, джырэкIэ щыIэ тхылъеджапIэм ычIыпIэ модельнэ тхылъеджапIэ гъэпсыгъэныр, паркым къыпэIулъ шъолъырыр зэтегъэпсыхьэгъэныр, социальнэ мэхьанэ зиIэ учреждениехэм якIурэ гъогухэр гъэкIэжьыгъэнхэр, гъэсэныгъэ зыщарагъэгъотырэ гупчэу N 6-р нахь зэтегъэпсыхьэгъэныр, псыр къызэраIэкIэхьэрэ системэр гъэкIэжьыгъэнымкIэ проект зэхэгъэуцогъэныр, врач амбулаториер гъэцэкIэжьыгъэныр ыкIи нэмыкIхэр.

«ПсэупIэхэм нахьышIум ылъэныкъокIэ афэхъурэ зэхъокIыныгъэхэр тлъэгъунхэм, ахэр дгъэунэфынхэм мэхьэнэ гъэнэфагъэ яIэу щыт. Уна­шъоу тштагъэхэмкIэ игъорыгъозэ кIэухы­шIухэм такъыфэкIон фае. Ащ нэмыкIэу социальнэ, экономикэ Iофыгъоу къэуцухэрэр амал зэриIэкIэ нахь псынкIэу зэшIотымыхыхэ хъущтэп. Псэолъапхъэхэм япхыгъэ Iофыгъоу къэуцухэрэри къызэрыкIохэу щытэп, арышъ, псэолъэшIыным, гъэцэкIэжьыным ыкIи зэтегъэ­псыхьэгъэным япхыгъэ Iофыгъохэр нахь псынкIэу зэшIотымыхыхэ хъущтэп», — къыIуагъ КъумпIыл Мурат.

Адыгэ Республикэм псэолъэ­шIынымкIэ, транспортымкIэ, ЖК-мкIэ ыкIи гъогу хъызмэтымкIэ иминистрэу Валерий Картамышевым къызэриIуагъэмкIэ, псэупIэу Кужорскэм ипарк зэтегъэпсыхьэгъэнымкIэ проект- сметнэ документациер Мые­къопэ районым иадминистрацие къыIэкIигъэхьаным министерствэр ежэ. 2023-рэ илъэсым тегъэпсыхьэгъэ программэу «Iэрыфэгъоу щыт къэлэ щыIа­кIэр» зыфиIорэм ар хагъэхьащт.

Ащ нэмыкIэу Адыгэ Рес­публикэм псэолъэшIынымкIэ и Министерствэ ипащэ къызэрэхигъэщыгъэмкIэ, псэупIэу Кужорскэм псыр зыпкъ итэу къы­IэкIэхьаным телъытэгъэ пшъэрылъхэм адиштэу псыубытыпIэм изытет иуплъэкIун зэхащагъ. Джыри зы псыкъэкIуапIэ аубырыуным тегъэпсыхьагъэу актрэ проект-сметнэ документациерэ хьазыр хъугъэх. Мы проектым пIалъэу иIэхэр лъагъэкIотэнхэ фаеу хъугъэ проект-сметнэ документациер нахь гужъуагъэу хьазыр зэрэхъугъэм къыхэкIэу. Мэлылъфэгъум ыгу­зэгухэм адэжь подряднэ организацием икъыхэхынкIэ аукцион зэхащэщт. Мыекъопэ районым ипащэу Олег Топоровым къызэриIуагъэмкIэ, республикэм и ЛIышъхьэ къафишIыгъэ пшъэ­рылъхэр гъэцэкIагъэ зэрэхъу­хэрэр зэтекIых. ГущыIэм пае, гъэсэныгъэ зыщарагъэгъотырэ гупчэм (еджапIэм) игъэцэкIэ­жьын ыкIэм фэкIуагъ, актовэ залым епхыгъэ IофшIэнхэр ары зэшIуахынхэу къэнагъэхэр. Жъо­ныгъуакIэм и 1-м нэс кIэлэцIыкIу IыгъыпIэу N 37-м къыпэIулъ чIыпIэр зэтырагъэпсыхьащт. ПсырыкIуапIэхэм ягъэкIэжьынкIэ IофшIэнхэри псэупIэм щэкIох. Адыгэ Республикэм мэкъу-мэщымкIэ иминистрэу Къуанэ Анзаур къызэритыгъэмкIэ, мы псэуалъэхэр зэкIэ проектэу «Мыекъопэ районым ипсэупIэ­хэм яхэхъоныгъ» зыфиIорэм хэхьагъэх. Ащ нэмыкIэу Урысыем мэкъу-мэщымкIэ и Министерствэ лъэIу тхылъхэр ыштэхэу зыригъажьэкIэ, гъэсэныгъэ зыщарагъэгъотырэ кIэлэцIыкIу учреждениеу N 37-м, гъэсэныгъэ зыщарагъэгъотырэ гупчэу N 6-м, врач амбулаторием ыкIи псэупIэу Кужорскэм культурэм и Унэу дэтым язэтегъэпсы­хьанкIэ проектхэр хьазыр хъущтых, ахэр нэужым федеральнэ программэм хагъэхьащтых.

Адыгэ Республикэм и ЛIышъхьэу КъумпIыл Мурат анахьэу анаIэ зытыраригъэдзагъэр пшъэ­рылъэу щытхэмкIэ лъэныкъо пстэури къыдалъытэзэ Iофтхьабзэхэр зэшIуахынхэ зэрэфаер, анахьэу етIани псэупIэм псы тэрэз IэкIахьэ шIыжьыгъэныр, социальнэ инфраструктурэм епхыгъэ IофшIэнхэр игъом зэшIохыгъэнхэр ары.

ЗэIукIэм икIэухым псэолъэ заулэхэм язэтегъэпсыхьанкIэ нэмыкI Iофыгъохэми къащыуцугъэх: районым ипсэупIэхэм ащыщхэм яIофхэм язытет, зэ­хэтэкъоным нэсыгъэ унэжъхэм цIыфхэр къачIэщыжьыгъэнхэм тегъэпсыхьэгъэ программэхэр нахь шIогъэ ин хэлъэу гъэцэкIэгъэнхэр.

АР-м и ЛIышъхьэ ипресс-къулыкъу