Илъэсым ианахь кIэлэегъэджэ дэгъур къыхэхыгъэным фэгъэхьыгъэ республикэ зэнэкъокъур Мыекъуапэ щэкIо. Ащ район ыкIи къэлэ зэнэкъокъухэм ащытекIогъэ кIэлэегъэджэ 15 мыгъэ хэлажьэ. Зэнэкъокъур мэфиирэ кIощт. Ащ анахь дэгъоу къыщыхахырэр Урысые зэнэкъокъум хэлэжьэщт.

Iофтхьабзэр зэхащагъ АР-м гъэсэныгъэмрэ шIэныгъэмрэкIэ и Министерствэрэ гъэсэныгъэм­кIэ Урысые профсоюзхэм я Адыгэ республикэ организа­циерэ.

КъызэIукIагъэхэм АР-м и ЛIышъхьэу КъумпIыл Мурат ыцIэкIэ къафэгушIуагъ гъэсэныгъэмрэ шIэныгъэмрэкIэ министрэм иIэнатIэ зыгъэцэкIэрэ Евгений Лебедевыр.

— ШъуисэнэхьаткIэ IэпэIэсэныгъэу шъухэлъыр къэжъугъэ­лъэгъонэу непэ шъукъэкIуагъ, кIэлэегъэджэ дэй республикэ зэнэкъокъум хэлажьэрэп. Ау зы нэбгыр ныIэп Всероссийскэ зэнэкъокъум хэлэжьэнэу зинасып къыхьыщтыр, — къы­Iуагъ Лебедевым.

Зэнэкъокъур уцугъо-уцугъоу зэтеутыгъэу кIощт. Апэрэм хэ­хьэх ушэтынхэу «Сэлам шъосэхы! Ар сэры!», «МетодикэмкIэ мастерскоир», «Урок» зыфиIо­хэрэр. ЯтIонэрэм «Класснэ сыхьат», «Мастер-класс» зыфи­Iо­хэрэр хэтыщтых. А уцугъуитIум ауж кIэуххэр зэфахьысыжьынхэшъ, анахь кIэлэегъэ­джэ дэгъуи 5-р къыхахыщт. Ахэр ары етIанэ ящэнэрэ уцугъом хэлэжьэщтхэр.

КIэухым пресс-конференциеу «Илъэсым икIэлэегъаджэ упчIэ етэты» зыфиIорэр зэхащэщт.

Зэнэкъокъум хэлажьэх Мые­къуапэ щыщхэу лицееу N 34-м иублэпIэ классхэр езыгъаджэхэу Евгения Бенделиани ыкIи гурыт еджапIэу N 17-м икIэлэегъаджэу Светлана Рябцевар, Красног­вардейскэ районымкIэ еджапIэу N 4-м инджылызыбзэмкIэ икIэлэегъаджэу Вера Волковар. Теуцожь районым къикIыгъ гурыт еджапIэу N 1-м адыгабзэмкIэ ыкIи литературэмкIэ икIэлэегъаджэу ЖакIэмыкъо Сусанэ. Тэхъутэмыкъое районым илIыкIу гурыт еджапIэу N 6-м ублэпIэ классхэмкIэ икIэлэегъаджэу Эмилана Тутаевар, Адыгэкъалэ къикIыгъэх гурыт еджапIэу N 2-м инджылызыбзэмкIэ икIэлэегъаджэу Тхьагъэпсэу Аминэт­рэ гурыт еджапIэу N 3-м тарихъымрэ обществознаниемрэкIэ щезыгъаджэхэу Ольга Черненкэр ыкIи нэмыкIхэр.

Непэ ятIонэрэ мафэу кIэлэ­егъаджэхэр зэнэкъокъух. (Тикорр.).