Мы илъэсым игъэтхэ дзэ дэщыгъо мэлылъфэгъум и 1-м Адыгеим щырагъэжьагъ ыкIи ар бэдзэогъум и 15-м нэс кIощт.

Iофтхьабзэр республикэм зэрэщылъыкIуатэрэм, федеральнэ гупчэм къафигъэуцугъэ пшъэ­рылъхэр зэрагъэцакIэхэрэм, шэпхъакIэу къыхэхьагъэхэм зыщатегущыIэгъэхэ пресс-зэIукIэ тыгъуасэ Мыекъуапэ щыкIуагъ.

Iофтхьабзэм хэлэжьагъэх АР-м и Дзэ комиссариат ипащэу Александр Авериныр, ныбжьыкIэхэр дзэм дэщыгъэнхэмкIэ ыкIи ухьазырыгъэнхэмкIэ отделым ипащэу Виталий Лебедевыр, АР-м и Дзэ комиссариат идзэ врачебнэ-комиссие итхьаматэу Игорь Буренковыр, районхэм ащыIэ дзэ комиссариатхэм ятхьаматэхэр, журналистхэр.

Александр Авериным пресс-зэIукIэр къызэIуихызэ, мы илъэс зэкIэлъыкIохэм дзэм къулы­къу щызыхьы зышIоигъо ныбжьыкIэхэм япчъагъэ къызэрэ­щымыкIэрэр ыкIи адрэ илъэсхэм афэдэу федеральнэ гупчэм къафигъэуцугъэ планыр зэрагъэ­цэкIэщтыр къыхигъэщыгъ. Зэрэхабзэу, дзэ дэщыным фэгъэзэгъэ комисси 9 республикэм ишъо­лъыр къыщызэIуахыгъ.

— Республикэм щыщ нэбгырэ 3000-м ехъу къулыкъур зыхьын фаехэм къахеубытэ. Ау, УФ-м ухъумэнымкIэ и Министерствэ иунашъокIэ, Адыгеим щыщ ныбжьыкIэ нэбгырэ 550-рэ фэдизыр ары мыгъэрэ гъэтхэ дзэ дэщыгъом къулыкъум ащэщтхэр. Къыблэ дзэ шъолъырым и Командующэ иунашъокIэ УФ-м идзэ къулыкъу хахьэхэрэ лъэсыдзэ­хэм, мэшIокудзэхэм, ошъогу десантыдзэхэм, стратегическэ мэхьанэ зиIэ ракетыдзэхэм, хыдзэ флотым ыкIи Урысые Федерацием и Лъэпкъ гвардие идзэхэм къулыкъур ащахьынэу агъэнэфагъ, ау мыгъэ нахьыбэр (нэбгырэ 400 фэдизыр) Къыблэ дзэ округым агъэкIощтых, — къыIуагъ Александр Авериным.

Дзэ комиссар шъхьаIэм къы­зэриIуагъэмкIэ, гъэтхэ дзэ дэщыгъом хьылъэзещэ автомобилхэр зезыфэнхэ зылъэкIыщт (категориеу «С» ыкIи «Е» зиIэхэр) ныбжьыкIи 130-рэ фэдиз агъэхьазырынхэу пшъэрылъ къафагъэуцугъ. Альтернативнэ къулыкъур нэбгыри 2-мэ ахьыщт.

НыбжьыкIэхэм ямедицинэ уплъэкIун игугъу къэтшIымэ, зэхъокIыныгъэхэр зэрэфэхъу­гъэр къыхэщы. ИкIыгъэ илъэсым ибжыхьэ дзэ дэщыгъо изэфэхьысыжьхэм къызэрагъэлъэгъуагъэм­кIэ, ныбжьыкIэхэм япроцент 64,4-м къулыкъу ахьын алъэ­кIыщт. ИпсауныгъэкIэ къулыкъур зыхьынэу къызтефэхэрэм япчъа­гъэ ыпэрэ илъэсхэм ябгъапшэмэ, нахь макIэ хъугъэ. Анахьыбэу къахагъэщырэ узхэм ащыщэу апэрэ чIыпIэр джы зыубытыгъэр психикэм изытет зэрэзэщыкъуа­гъэр ары ыкIи ар процент 16-мэ яIэу агъэунэфыгъ, ахэм къакIэлъэкIо лъы къекIокIыным епхыгъэ узхэр – процент 15,6-рэ, ащ ыуж итыр къупшъхьэ-лъынтфэхэм япхыгъэ ыкIи кIэтIый узхэр.

Iофтхьабзэм икIэухым журналистхэр зыгъэгумэкIырэ упчIэхэр бэу къатыгъэх. Ахэр анахьэу зыфэгъэхьыгъэхэр Украинэм щыкIорэ хэушъхьафыкIыгъэ дзэ операцием ныбжьыкIэхэр ащэщтхэмэ ары.

— ХэушъхьафыкIыгъэ дзэ операцием мыщ фэдэ ныбжьыкIэхэр ащэхэрэп, офицерхэр ыкIи дзэ къулыкъушIэхэу зэзэгъыныгъэм кIэтхагъэхэр ары агъа­кIохэрэр. Ары пакIошъ, ыпэрэ илъэсым дзэ къулыкъум ащагъэ­хэу егъэ­джэн Iофтхьабзэхэр зыщахьырэ чIыпIэхэу Украинэм пэгъунэгъоу щыIэхэр зэкIэри къаIуащыгъэх. Арышъ, мы лъэныкъомкIэ ны-ты­хэр гумэкIыгъо хэтынхэр ищыкIагъэп, — къы­Iуагъ ицыхьэ телъэу Александр Авериным.

НэмыкI упчIэу къатыгъэхэми дзэ комиссар шъхьаIэм джэуап­хэр къаритыжьыгъ.

Iэшъынэ Сусан. Сурэтыр Iэшъынэ Аслъан тырихыгъ.