ИкIыгъэ илъэсым «Урысыем къыщашIыгъ» зыфиIорэ шIухьафтыныр зекIоным фытегъэпсыхьэгъэ мэшIокоу «Кавказым иналмэс-налкъутэкIэ» заджэхэрэм къыфагъэшъошагъ. Мы илъэсым къыщегъэжьагъэу ар Адыгэ Республикэм икъэлэ шъхьаIэ пхырыкIэу агъэпсыгъ.

ЗыгъэпсэфакIохэмкIэ къэралыгъо гъу­напкъэхэр зэпыпчыныр къин зэхъум, туроператорхэм мэшIокугъогу круизхэм зафагъэзэжьыгъ. ХэгъэгукIоцI зекIоным зегъэушъомбгъугъэнымкIэ ащ лъэшэу ишIуагъэ къэкIощт. Непэ Урысыем ишъо­лъырыбэмэ зекIонымкIэ круизхэр ащызэхащэх, мэшIоку гъогухэр дэгъоу агъэфедэх.

«Кавказым иналмэс-налкъутэ» ащ фэдэ мэшIокухэм ащыщ, тапэкIи Урысыем икъыблэ лъэныкъо къакIощтыгъ, хы ШIуцIэм, Ставрополь краим, Темыр Кавказым цIыфхэр къыщэщтыгъэх.

Мыгъэ мэшIокум имаршрут хэхъоныгъэхэр фашIыгъэх, къалэхэу ар къызщыуцухэрэм Адыгеим икъэлэ шъхьаIэу Мыекъуапэрэ Налщыкрэ ахагъэхъуагъ.

МэшIокум мэлылъфэгъум и 30-м къы­щегъэжьагъэу Iоныгъом и 24-м нэс цIыфхэр къырищэкIыщтых. Тхьамафэ пэпчъ маршрутыр зэ къыкIущт, къалэу Москва и Казанскэ вокзал къыщыригъа­жьэзэ ышIыщт. Маршрутым хэхьэх къа­лэхэу Мыекъуапэ – Налщык – Грознэр – Махачкала – Дербент – Кисловодскэ – Москва. ЗекIоным мэфибл ехьы, шэмбэт мафэм мэшIокур Москва къыдэкIы, бэрэскэшхом вокзалым нэсыжьы.

МэшIокур вагон 13-у зэпышIагъ, ахэр зэфэдэхэп, купехэр, СВ-р, люксхэр ахэтых, плацкарт вагонхэри пышIэгъэнхэ ылъэкIыщт. Кондиционерхэр, телевизор­хэр, шхапIэхэр арытых. БлэкIыгъэ илъэс­хэм «Кавказым иналмэс-налкъутэкIэ» къэзыкIухьэгъэ цIыфхэм ар ашIогупсэф, ашIогъэшIэгъон, бэмэ агу рехьы.

Вагонхэр зэтегъэпсыхьагъэх. МэшIокоу «Александр Невскэм» пышIэгъагъэхэм ащыщхэр, мэшIокоу «Императорская Россия» зыфиIорэм щагъэфедэщтыгъэхэр ахэтых. Бэмэ къаIо ахъщэ бащэ умыгъэ­кIодэу мэфи 7-кIэ къэлэ зэфэшъхьафи 7 къэпкIухьан ыкIи къэпплъыхьан зэрэплъэкIыщтыр. Ар Кавказым ызыныкъо фэдиз хъущт.

Мафэ къэс мэшIокур зы къалэ къыщэуцу, бэрэ щэты. ЦIыфхэр экскурсиехэм ахэлажьэх, къалэхэр къэзыплъыхьэхэрэр, чIыпIэ гъэшIэгъонхэм анэсыхэрэр ахэтых. Улэугъэхэу мэшIокум къызекIолIэжьхэкIэ чъыехэзэ нэмыкI къалэ негъэсых.

«Кавказым иналмэс-налкъутэ» Москва къызыдэкIыкIэ, апэ къызщыуцузэ ышIыщтыр Мыекъуап. ЗекIозещэу къапэгъо­кIырэм зыгъэпсэфакIохэр автобус зэтегъэпсыхьагъэм исыхэу Лэгъо-Накъэ ыщэщтых, Хьаджыкъо, псыкъефэххэр къаригъэлъэгъущтых, адыгэ шхынхэр зыфэдэхэр къафиIотэщт, ахэм ахигъэ­Iэщтых, мэшIокум къырищэлIэжьыщтых.

ЯтIонэрэ мафэм зекIохэр Налщык нагъэсыщтых. Эльбрус, псы Iэзэгъухэр зыдэщыIэ чIыпIэхэр, гъогу кIэшIагъэхэр арагъэлъэгъущтых, чэщым мэшIокур Грознэм нэсыщт. ЗыгъэпсэфакIохэм къалэр къаплъыхьащт, мэщыт кIэракIэм чIэхьащтых, лъэсэу къалэм къыщакIу­хьащт, щэджэгъоужым къушъхьэм ащэщтых.

Ыужырэ мафэм Дагъыстан нэсых, къэлэжъэу Дербент, пытапIэу Нарын- Кала ащэх, чэщыр гъогум щырахы. Аужырэ къалэу мэшIокур къызыщыуцурэр Кисловодск. Мэфэ реным паркхэр, тучанхэр, саугъэтхэр, шхапIэхэр къалэм къыщакIухьэх. Пчыхьэм мэшIокур Москва ежьэжьы, ыужырэ мафэм цIыфхэр вокзалым негъэсыжьых.

«Кавказым иналмэс-налкъутэкIэ» къэ­зыкIухьэ зышIоигъохэм пэшIорыгъэшъэу экскурсиер е тур псаухэр къыхахынхэ алъэкIыщт. Зызэрэбгъэпсэфы пшIоигъом елъытыгъэу билетхэр къыуащэщтых. МэшIокум укъызэрэрищэкIыщт закъом пае билетым сомэ мини 6,2-рэ лъып­тыщт, купехэм – мин 13,2-рэ, СВ-м – мин 17,7-рэ, люксым – мин 20, зы нэбгырэм тегъэпсыхьэгъэ вагоным лъыптыщтыр бэкIэ нахьыб.

Билет уасэм экскурсием тефэрэр хэмылъытагъэмэ, ахэм ауасэ мэшIокур къызщыуцурэ къалэм щыпщэфын плъэ­кIыщт. КъызыщикIухьащт уахътэр жъоны­гъуакIэмрэ мэкъуогъумрэ атезыгъа­фэхэрэм билет уасэм ипроцент 20 къафырагъэгъэзэжьыщт. Билетхэр туроператорэу «РЖД Тур-м» е мэшIокугъогу станциехэм якассэхэм къащыпщэфынхэ плъэкIыщт.

МэшIокугъогу круизхэр уиунагъокIэ, уиныбджэгъухэр уигъусэу е зыплъыхьакIо купэу узэхэтэу зэдэпшIынхэр гъэшIэгъо­ныщт. Шъаукъо Аслъангуащ.