Мыекъуапэ къекIолIэрэ гъогум игъэцэкIэжьын псэолъэшIхэм лъа­гъэ­кIуатэ. Автомобиль гъогоу Р-217-м, «Кавказ» зыфиIорэм, къыхи­у­бытэрэ километрищым асфальт тыралъхьагъ ыкIи ащ къыпыщылъ лъэныкъом джы IофшIэнхэр щырагъэжьагъэх.

2021-рэ илъэсым чъэпыогъум и 4-м зэдашIыгъэ къэралыгъо зэзэгъыныгъэм диштэу ыпшъэкIэ зигугъу къэтшIыгъэ гъогур игъэкIотыгъэу агъэцэкIэжьы, ащ къыхеубытэ Мыекъуапэ къекIуалIэрэри.

Проектым къызэригъэнафэрэмкIэ, къэлэ пчъагъэ зэзыпхырэ гъогур зэтырагъэпсыхьащт, мыщ тет гъогу тамыгъэхэр кIэхэмкIэ зэблахъущтых, нэмыкIэу щагъэцэкIэщтыр бэ. Ащ ишIуагъэкIэ ар нахь щынэгъончъэ ыкIи шэпхъэшIухэм адиштэ хъущт.

Километрэ 20 хъурэ гъогу Iахьым игъэцэкIэжьын 2023-рэ илъэсым тыгъэгъазэм аухынэу агъэ­нафэ.