КIэлэпIупкIэр игъом зымытыхэрэм язекIуакIэ зэрэмытэрэзыр агурыгъэIогъэным, зытефэхэрэм пшъэдэкIыжь пхъашэ ягъэхьыгъэным хьыкум приставхэм анаIэ атет.

Пшъэрылъхэр гъэцэкIагъэхэ зэрэхъухэрэм ежь ышъхьэкIэ лъэплъэ республикэм ихьыкум пристав шъхьаIэ. Хэбзэгъэуцугъэм мы лъэныкъомкIэ къыди­лъытэхэрэ шапхъэхэр агъэлъэшыгъэх, ны-тыхэу зипшъэрылъхэр зымыгъэцакIэхэрэм уголовнэ Iофхэр къапагъэтаджэхэу къыхэкIы. Ащ Iофыр нэшъумыгъэсэу, чIыфэр игъом ыкIи икъоу шъутынхэу хьыкум приставхэр къышъоджэх.

Хьыкум приставхэм я Федеральнэ къулыкъу и ГъэIорышIапIэу Адыгэ Республикэм щыIэм Iофтхьабзэу «Хьыкум приставхэр — кIэлэцIыкIухэм апай» зыфиIорэр илъэс къэс зэхещэ. ЧIыфэхэр къаIыхыжьыгъэнхэм пае зипшъэрылъхэр зымыгъэцакIэхэрэ ны-тыхэм адэжь хьыкум приставхэр макIох, ахэм адэгущыIэх, язекIуакIэ зэрэмытэрэзыр агурагъаIо. Сабыим ипIункIэ хэбзэгъэуцугъэм къыгъэнафэхэрэ лъэ­ныкъохэр зымыгъэцакIэхэрэм административнэ пшъэдэкIыжь зэрахьыщтым дакIоу, уголовнэ Iофи къафызэIуахын зэралъэкIыщтыр араIо.

ЗэдэгущыIэгъухэм ахэлажьэх динлэжьхэр, муниципалитетхэм, гурыт еджапIэхэм япащэхэр, къэбар жъугъэм иамалхэм ялIыкIохэр, нэмыкIхэри.

Джащ фэдэу кIэлэпIупкIэр зымытыхэрэм Iоф зыщашIэхэрэ организациехэм ябухгалтериехэр хьыкум приставхэм ауплъэкIух, охътэ гъэнэфагъэм къэралыгъом икIынхэ зэрэфимытхэм афэгъэхьыгъэ унашъохэр ашIых, административнэ хэбзэукъоныгъэ зэрашIы­гъэмкIэ протоколхэр зэхагъэуцох, уголовнэ Iофхэр къызэIуахых, чIыфэ зытелъхэм ямылъку арест тыралъхьэ, IофшIэпIэ чIыпIэ зимыIэхэм цIыфхэм IофшIапIэ языгъэгъотырэ гупчэм иучет хагъэуцох. Мы унашъохэм пшъэрылъэу яIэр зы — сабыйхэм къатефэрэ ахъщэр игъом ыкIи бырсыр къыпымыкIэу ны-тыхэм къатыныр ары.

Мыщ епхыгъэ IофшIэныр хьыкум приставхэм тапэкIи лъагъэкIотэщт, зыныбжь имыкъугъэхэм яфитыныгъэхэр къэухъумэгъэнхэм анаIэ тырагъэтыщт.

Хьыкум приставхэм я Федеральнэ къулыкъу и ГъэIорышIапIэу АР-м щыIэм ипресс-къулыкъу.