«Тотальнэ диктант» зыфиIорэ дунэе гъэсэныгъэ Iофтхьабзэу мэлылъ­фэгъум и 9-м зэхащэщтым Адыгеир хэлэжьэщт.

Урысыбзэр зикIасэхэу, зи­шIэныгъэ зыушэты зышIоигъо­хэм онлайн шIыкIэм тетэу дик­тант атхын алъэкIыщт. Ащ пае а мафэр къэмысызэ сайтэу «totaldict.ru» зыфиIорэм зы­щатхын фае.

«Тотальнэ диктантыр» 2022-рэ илъэсым зыщызэхащэщт къэлэ шъхьаIэу агъэнэфагъэр Ярославль ары. ПстэумкIи Урысыем ипсэупIэ 500-мэ диктантыр ащатхыщт, IэкIыб къэралыгъо 40-мэ якъэли 100-м ехъу проектым къыхэлэжьэщтых.

Агъэнэфэгъэ площадкэхэм диктантым къыщеджэщтых актерэу Сергей Гармаш, актрисэу Анна Хилькевич, композиторэу Виктор Дробыш, орэдыIохэу Анжелика Варумрэ Максимрэ, блогерэу Энтони Юлай, нэ­мыкI­хэри. Мыгъэ атхыщт диктантым итекст иавторэу Марина Степновар Волковскэ театрэм ежь къыщеджэщт.

2022-рэ илъэсым «Тотальнэ диктантыр» зыщатхыщт чIыпIитIу Адыгеим щагъэнэфагъ: АР-м и Лъэпкъ тхылъеджапIэ ыкIи Адыгэкъалэ дэт гурыт еджапIэу N 2-р.

— Мыекъуапэ щыпсэурэ нэ­бгырэ 60 фэдиз диктантым хэлэжьэнэу тыщэгугъы. «Дэгъу дэдэу» зытхыщтхэм шIухьафтынхэр афэдгъэхьазырыгъэх — зэлъашIэрэ научнэ тхылъхэу «Сто текстов о языке» зыфи­Iорэр. Мыр диктантым ихэу­шъхьафыкIыгъэ къы­дэгъэкIыгъэу щыт, — къыIуагъ АдыгеимкIэ Iофтхьабзэр зэ­хэзыщэу, лингвист-экспертэу Нэшъулъэщэ Индирэ.

Адыгэкъалэ къыщызэIуахыщт чIыпIэм диктантым къыщеджэщтыр гъэзетэу «ЗыкIыныгъэм» социальнэ хъытыухэмкIэ иредакторэу ПхъэчэяшI Суанд. Ащ тIогъогогъо диктантыр «дэгъу дэдэкIэ» ытхыгъ. Мыекъуапэ къыщеджэщтыр филологие шIэныгъэхэмкIэ кандидатэу Нэ­шъулъэщэ Индир.

БлэкIыгъэ илъэсхэм афэдэу, текстыр IэкIэ атхын алъэкIыщт, ар Iофтхьабзэм изэхэщакIохэм нэужым къарахьылIэжьын фае. IофшIэнхэм якIэуххэр сайтэу «totaldict.ru» зыфиIорэм мэ­лылъфэгъум и 12-м ыуж къырагъэхьажьыщтых.

Илъэс 18 хъугъэу «Тотальнэ диктантым» фэгъэхьыгъэ Iоф­тхьабзэр Урысыем щызэхащэ. Адыгеим ар мы илъэсым я 9-у щыкIощт. ШIоигъоныгъэ зиIэ пстэури хэлэжьэнхэ амал яI.