Псауныгъэр агъэпытэ
Лъэбэкъу мини 10 лъэсэу къакIуным фэгъэхьыгъэ Iофтхьабзэу Урысыем щызэхащагъэм Адыгеим щыщхэр чанэу хэлажьэх.
Мыекъуапэ изыгъэпсэфыпIэ парк щыкIогъэ зэхахьэм нэбгыри 180-рэ щызэIукIагъ. Марафоным яIэпэIэсэныгъэ къыщызыгъэлъэгъуагъэхэм хэбзэ къулыкъушIэхэр, культурэм, спортым, нэмыкIхэм яIофышIэхэр ахэтыгъэх.
Нэбгыри 150-рэ нахь къахэщыгъ, шапхъэхэр агъэцэкIагъэх, — къытиIуагъ Мыекъуапэ иадминистрацие физкультурэмкIэ ыкIи спортымкIэ и Комитет икъулыкъушIэу Бзаго Рустам. — Физкультурэм пыщагъэхэм япчъагъэ хэгъэхъогъэным, псауныгъэр гъэпытэгъэным афэгъэхьыгъэ зэнэкъокъум хэгъэгум зыщеушъомбгъу. Ны-тыхэр, кIэлэцIыкIухэр, унагъохэр, лIэуж зэфэшъхьафхэр тапэкIи зэхэтщэщтых.
Марафоным чанэу хэлажьэхи шапхъэхэр изыгъэкъугъэхэм Мыекъуапэ иадминистрацие физкультурэмкIэ ыкIи спортымкIэ и Комитет идипломхэр аратыжьыгъэх. ЕмтIылъ Нурбый.