Акъылыр зыщымакIэм нэкъокъоныр щэбагъо.

ГумэкIрэ гупыкIрэ зиIэр хэтми рызыкъынчъэ хъурэп.

Ощ фэдэ цIыфым сыд идагъокIи ­ышъхьашыгу «уиуцоу» имыулъэгукI —лажьэ ор-орэу къызфэмыхьыжь.

Акъылынчъэ бэIо-бац, нэкъокъуалэ — гупсэфынчъ.

ЦыхьэмышI — гунахьгъахъ.

Iушыр хэтми къызэтечыгъуай, щэIагъэрэ теубытагъэрэ хэлъышъ, дэщэхыгъуай.

Тхьаусыхалэр — гу зэпыкI.

Къин зыхэмылъ щыIакIэ хъурэп.

ГукIодыпхэм иIоф кIэкIырэп, гу тешIыхьи, къыбдэхъущтыр мыгъэзэжь.

Iофым щымыщынэрэм Iофым гушIогъуабэ къыфехьы.

Ор-орэу зыфэпшIэжьырэр ныбэрылъ ин мэхъу.

Iофыр джэгузэ ашIэрэп, джэгум гъы­хэзэ кIохэрэп.

«ШIур сшIэна?» аIоу кIэупчIэхэрэп, пфэлъэкIыщтымэ, шIи блэкI — къып­фигъэзэжьыщт.

ШIушIэныр бай, тхьамыкIэм елъытыгъэп шIушIэныр — псэм ибаигъ.

ЗиIэм нахьи, зимыIэм сыдигъокIи нахь хьатыршIэгъабэ иI.

ШIушIэгъабэр зыIукIэхэрэм агу къыу­тIэу, зэмызэгъыжь хъухэрэр къахэкIы.

Тыгъуасэ ищыIэкIагъэр нахьыбэм къаIонэу ашIэрэп…

Зыфэдэ мыхъурэ щыIэп — щыIэныгъэр шъуабэу зэхэдзагъэба?!

Непэ уимышIугъокIэ умыгужъый, неущ къепсыщт о уитыгъэ.

ЗылъэкIырэм нахьи зымылъэкIырэр зыкъоубыти, фэдишъэу къыотэжьыщт.

Щытхъумэ анахь лъапIэр — цIыфыгъ, лъытэныгъ.

ЦIыфыцIэ иныр фэсакъэу ухъумэ.

Баим ынэгу сэирэп.

Баир шхэ зэпытыгъэкIи шхэкIырэп, тхьамыкIэр мышхагъэкIи щэIурэп.

Сыд былым иIэми, гукIэгъунчъэр тхьамыкI.

Былымыпсэр къэрарынчъ.

Былымыр цIыфым пэзымышIырэр хьайуан.

Акъыл зиIэм Iулъхьэр тIу ешIы.

ЦIыфым нахь былым ин хъужьырэп.

Зыпсэ ухэуIэрэм щыгъупшэрэп —хьакъыр къыпфэкIо.

ХьадэIусыр нэе-нэшIукIэ агощырэп, ау хэукъорэр бэ.

Пщыныжьыгъуаеми, гунахьыр къэгъэ­хъэгъэшIу.

ЧIыр Iэбжъэ-лъабжъэкIэ чэщи мафи иптIыкIыным фэд — диныр лэжьыгъошIоп.

ЦIыфым зибэ ышIэрэр дэи: тыгъон, хъонэн, армэун, пцIыусын, ешъон, дысын, шэнычъэн. Ощ фэдэ цIыфым ренэу учIэтIыхьаныр — узыжъ ыкIи де-­ лагъ. Джащ пае дунаири Iоф хэт.

Шъугъон-нэкъокъоным нахьрэ «Iус» зимыIэр хэтми тхьамыкIэ дэд.

ЕгъэшIэрэ цIыфыгъэ хабзэр зыщытэ­къорэ уахътэм, ныр чIыпIэнчъэ щэхъу.

Зыми шIомылIыкIырэр нэпэнчъэ тхьамыкI.

Былымым цIыфыр егъэнаIо, щымыIэм цIыфыр еушъхьакIу.

Уиунапчъэ бгъэпытэным нахь фед, ужэпэ-цапэ гущыIэ лые къыдэмыкIыным уфэсакъыныр.

ЦIыф гъэсагъэр сыдымкIи зыфэса­къыжьы.

ТIого-бзагор чIыпIэ изагъэрэп.

Бзэгухьэм ыжэ IункIыбзэкъэб Iуплъхьа­гъэми, къыхитхъыщт.

Жэр зэтемыхэу бадзэ къыдэбыбэщтэп.

Iогъэ-къэIожьыгъэм нахь гуао щыIэп — цIыфыр еунэкIы.

Iо зэпымычыжьым цIыфыр егъэжъы.

ШIум кIэгуIырэм — шIу къыпыщылъ.

ШIу пшIэн плъэкIыщтэу, ем зыдемыгъэхьых.

ЗишIу зимыгъуи щыI, ау щэIагъэ зигъаIи, къэгужъуагъэми, бгъотыжьыщт.

Ер зэкъозыдзэрэр ем етхьалэжьы.

ЦIыф хыем ихьакъ умыштэ — пщыныжьыгъуае пфэхъущт.

Сыд хъункIи, гукIэгъунчъагъэ-цIы­фыгъэнчъагъэр къызтемыгъакIу.

КIэсанэкIэ зэкIэ Къыоплъыщтыгъэмэ, Ощ нахь насыпышIо Мы чIым темытыныгъи.

Фэмыфым къэбар къеIотэфэ Хъупхъэм шъао къылъфыгъ.

Мы дунаим тет шIулъэгъур — ГужьдэкIыгъо Iэзэгъу.

Тызэрэмылъэгъуми, ГукIэ тызэрэшIэ, ПсэкIэ тызэрэIыгъ.

Мамырыкъо Нуриет.