Гипсым хэшIыкIыгъэу псэолъэшIыным щагъэфедэхэрэм якъыдэгъэкIын фытегъэпсыхьэгъэ заводэу «ВОЛМА — Мыекъуапэ» зыфиIорэр 2016-рэ илъэсым къыще­гъэжьагъэу Мыекъопэ районым ит псэупIэу Каменномостскэм къыщызэIуахыгъэу Iоф ешIэ. КъыдигъэкIыхэрэм япчъагъэ хигъахъозэ ыпэкIэ лъэкIуатэ. Мы уахътэу экономикэр чIыпIэ къин зыщитым заводым иIофшIэн зэрэзэхэщагъэм, икIыгъэ илъэсым ягъэхъагъэхэм, санкциехэм яягъэ къекIыгъэмэ, нэмыкIхэми афэгъэхьыгъэу «Волмэм» игъэцэкIэкIо пащэу Андрей Кургановым гущыIэгъу тыфэхъугъ.

— Андрей, шъуиIофшIэн анахьэу зыфэгъэзагъэмкIэ тизэдэгущыIэгъу едгъэжьагъэмэ дэгъугъэ.

— «ВОЛМА» зыфиIорэр компание­шхоу щыт, куп-купэу зэтеутыгъэу, къэ­лэ зэфэшъхьафхэм изаводхэр адэтхэу, европейскэ шапхъэхэм атетэу Iоф ешIэ. Мыр анахьэу зыфэгъэзагъэр псэолъэшIыным щагъэфедэрэ зэхэгъэкIухьэгъэ гъушъэхэм якъыдэгъэкIын. УрысыемкIэ дэпкъхэм ащафэрэ (отделочнэ) материалхэм ябэдзэр компаниеу «ВОЛМА» зыфиIорэм пэрытныгъэ ыIыгъ. Производствэм игугъу къэтшIымэ, IофшIэныр зэрэкIорэр зэкIэ зэфэшIыгъ, автомат шIыкIэм тетэу компьютерым гъэцэкIэныр реты ыкIи ар егъэIорышIэ. Тлъэгъурэ закъор зэкIоцIыщыхьагъэу хьазырэу къыдэкIыгъэ продукциер ары.

— ПсэолъэшIыным шъуипродукцие мэхьанэ зиIэ чIыпIэ щеубыты. Ахэм ябэдзэр сыд фэдэ хэхъоныгъа икIыгъэ илъэсым иIагъэр?

— Унэ кIоцI дэпкъхэм ащафэрэ материалхэм ябэдзэр Урысыем илъэс къэс проценти 10-м нахь мымакIэу щы­хэхъо. 2021-рэ илъэсым куп зэфэшъхьа­фэу зэрэзэтеутыгъэхэм елъытыгъэу проценти 3-м къыщегъэжьагъэу процент 12-м нэсэу зыкъыIэтыгъ.

— Мы уахътэм экономикэм къиныгъохэр зэпе­чых. Компанием сыдэущтэу ар зэхишIэра?

— «Волмэм» ащ фэдэ къиныгъо­хэр зэпичынхэмкIэ Iэ­пэIэсэныгъэ иIэ хъугъэ: 2016-рэ илъэсым щыIэгъэ кризисыр, пандемием илъэ­хъан, джы санкциеу къе­жьагъэхэр. Илъэс зэкIэлъыкIохэм компанием зыпкъ итэу Iоф зэришIагъэм имызакъоу, хэхъоныгъэхэр ышIыхэзэ къырыкIуагъ. Ар къыдэхъуным лъапсэу фэхъугъэр – псын­кIэу джырэ цифрэ аналитикэр шIыгъэныр, гъэIорышIэн унэшъо тэрэзхэр игъом штэгъэнхэр ыкIи пхырыщыгъэнхэр, къэ­кIуапIэхэр игъом зэхэугъоегъэнхэр.

— Андрей, псэолъэшI материал лъэпкъ зэфэшъхьафэу предприятием къыдигъэкIыхэрэм ахэжъугъэхъуагъэу щыта? 2022-рэ илъэсым щэфакIохэр сыда зэжэщтхэр?

— 2021-рэ илъэсым къыдэдгъэкIырэ продукцие лъэпкъхэм ахэдгъэ­хъуагъ. ПстэумкIи штукатуркэ лъэпкъ зэфэшъхьафэу 26-рэ къэтэгъэ­хьазыры: шпатлевкэхэр, клеир ыкIи джэхэшъоикIэхэр. Ахэр IэкIэ ыкIи машинэкIэ дэпкъым теплъхьанхэ олъэкIы. Джащ фэдэу унэ кIоцIхэр зэрэзэпаутыхэу псым, машIом апэуцу­хэу зэфэшъхьафи 4, егъэубытыпIэхэр зиIэ плиткэшхохэу унэхэр зэрэзэпаутыхэрэр къыдэтэгъэ­кIых. Псэ­олъэшI зэхэгъэкIухьагъэу къэтшIыхэрэр зэкIэ гъушъэх ыкIи гипсым хэшIыкIыгъэх. Тызхэт 2022-рэ илъэсым, сыдэу хъугъэ­ми, зэхъокIыныгъэ горэхэр къыздихьыщтых. Технологие лъагэхэм адиштэрэ продукциеу щэфакIохэм ящыкIэгъэщтхэм якъэ­гъэхьазырын джы къыщегъэжьа­гъэу чанэу Iоф дэтэшIэ.

— ШъуиIофшIэнкIэ мэхьанэ зиIэхэм ащыщ продукцием иIугъэкIын. IэкIыб къэралыгъохэм ябэдзэр шъухахьэу щыта?

— «Волмэм» къыгъэхьазырырэ продукциер анахьэу зэрищэхэрэр: канал DIY зыфиIорэр (псэолъэшI гипермаркетышхохэр), шъолъырым иоптовэ щэфакIохэр ыкIи псэолъэшI организациехэр. Ащ дакIоу типродукцие итщыным чанэу тыдэлажьэ, къэралыгъо 30-мэ ар аIэкIэтэгъахьэ. ЩэфэкIо анахь чыжьэу тиIэу къычIэкIыгъэр Исландиер ары. Ау, гу­хэкI нахь мышIэми, ЕС-м икъэралыгъохэу къытщыщэфэн фимытхэм мыр ахэт. Ащ пае къэмынэу нэмыкI къэралыгъохэм зэрэтфэлъэкIэу тадэлажьэ: Гурыт Азием, Белоруссием, Закавказьем.

— ЫпшъэкIэ къызэрэщытIуагъэу, экономикэм къиныгъохэр зэрэзэпичыхэрэм епхыгъэу IофшIэпIабэмэ ялэжьакIохэр IуагъэкIынхэ фаеу мэхъу. А лъэныкъомкIэ сыда шъуиIофхэм язытет?

— Типредприятие зытетыгъэ режимым тетэу, хэхъоныгъэ ышIынымкIэ пшъэ­рылъэу зыфигъэуцужьыгъэхэр зэшIуихыхэзэ IофшIэныр лъегъэкIуатэ. ТиIофышIэхэм япчъагъэ дгъэмэкIэщтыр хэгъэкIи, ахэм якъыхэхын тыдэлажьэ. Ары пакIошъ, апшъэрэ ыкIи гурыт гъэсэныгъэ учреждениехэм зэпхыныгъэхэр адытиIэу программэхэр пхырытэщых, шIэныгъэхэр зыIэкIэлъхэ ныбжьыкIэхэр къыхэтэхых IофшIэныр мыщ щылъагъэ­кIотэнэу.

— Тхьауегъэпсэу, Андрей, гущы­Iэгъу укъызэрэтфэхъугъэмкIэ.

Iэшъынэ Сусан.