Къэралыгъо фэIо-фашIэхэр пэIудзыгъэ шIыкIэм тетэу цIыфхэм афэгъэцэкIэгъэнхэм кIэщакIо фэхъугъэр УФ-м и Президентэу Владимир Путиныр ары.

2020-рэ илъэсым коронавирусыкIэм зызэриушъомбгъурэр къэгъэуцугъэным фытегъэпсы­хьэгъэ унашъоу къышIыгъэхэм ар ащыщыгъ. БлэкIыгъэ илъэсым УФ-м и Федеральнэ ЗэIукIэ фэкIорэ Джэпсалъэу В. Путиным къышIыгъэм ар хабзэ хъуным Правительствэм ынаIэ щытырыригъэдзагъ.

Президентым иунашъо агъэцакIэзэ, социальнэ IэпыIэгъухэм ащыщхэр пэIудзыгъэ шIыкIэм тетэу къулыкъухэм агъэпсы хъугъэ. ГущыIэм пае, ны мылъкум исертификат, илъэси 3 — 7, 8 — 17 зыныбжь кIэлэцIыкIу­хэр зэрыс унагъохэм къэралыгъо IэпыIэгъоу къаратыхэрэр.

УФ-м IофшIэнымкIэ ыкIи цIыфхэр социальнэу къэухъумэгъэнхэмкIэ Министерствэм къы­зэритыгъэмкIэ, федеральнэ, шъолъыр ыкIи муниципальнэ социальнэ IэпыIэгъухэм ягъэ­псын цIыфхэм афэгъэпсынкIэгъэным фэгъэхьыгъэ хэбзэгъэ­уцугъэм ипроект агъэхьазы­рыгъ. Ащ къызэрэщиIорэмкIэ, пособие е фэгъэкIотэн къызтефэхэрэр МФЦ-м екIолIэнхэшъ лъэIу тхы­лъыр атынэу ары ныIэп ищыкIагъэр, къэралыгъо фэIо-фашIэхэм япортал агъэфедэми хъущт.

Джащ фэдэу ахэм ягъэхьазырын пIалъэу пылъыр агъэ­кIэкIыгъ, унагъом ахъщэу къы­фэкIощтыр зыфэдизымрэ ар къызщатIуп­щыщт уахътэмрэ пэ­шIорыгъэшъэу лъагъэIэсын фае.