Илъэс заулэкIэ узэкIэIэбэжьмэ, сабыеу еджапIэм чIэхьащтхэм янэ-ятэхэм щылэ мазэм къыщегъэжьагъэу еджапIэм щарагъэтхынхэ фэягъ. Урысыем ичIыпIэ зэфэшъхьафхэм ны-тыхэр нэф къэмышъызэ еджапIэм зэрэкIощтыгъэхэр, чэзыур зэраубытыщтыгъэр, цIыфыбэ зэрэщызэIукIэщтыгъэр телевизорым къыгъэлъагъоу бэрэ къыхэкIыгъ.

Тэ тиеджапIэхэм ащыщхэми (анахьэу «продленкэ» зиIэхэм) ащ фэдэу цIыфыбэ къякIуалIэщтыгъ. Ау 2020-рэ илъэсым къыщегъэжьагъэу джы еджапIэм апэрэу чIэхьащтхэр мэлылъфэгъум атхынхэу рагъажьэ. Мы илъэсым имэлылъфэгъу мазэ и 1-м къыщегъэжьагъэу Урысыем ичIыпIэ заулэхэм афэдэу Адыгеими сабыеу а 1-рэ классым кIощтым янэ-ятэхэм ялъэIу тхылъхэр къэралыгъо фэIо-фашIэхэм ахэтэу агъэпсынхэ алъэкIынэу амал яIэ хъугъэ.

АР-м гъэсэныгъэмрэ шIэныгъэмрэкIэ и Министерствэ иIофышIэу Бзэсэжъ Зарэ къызэриIуагъэмкIэ, сабыир зыщыпсэурэ чIыпIэм епхыгъэ еджапIэм укIонышъ, ащ лъэIу тхылъри щыптхын уфит. Арышъ, амалэу щыIэ хъугъэм Iофыр нахь къыгъэпсынкIэщт.

ЛъэIу тхылъыр къэралыгъо фэIо-фашIэхэм ахэтэу мэкъуогъум и 30-м нэс птын уфит. Ау кIэлэцIыкIум янэ-ятэхэм къыхахыгъэ еджапIэм, зыщытхыгъэм емылъытыгъэу, ратынэу фаехэмэ, лъэIу тхылъыр бэдзэогъум и 6-м къыщегъэжьагъэу Iоныгъом и 5-м нэс атын фае. ЕджапIэу сабыир зэратынэу фаехэм чIэсынэу щытыр имыкъугъэ зыхъукIэ, ар ыштэн ылъэкIыщт.

ЕджапIэхэм япэщэ зырызхэм зэралъытэрэмкIэ, Iофыр ащ нахь къыгъэпсынкIэщт, чIыпIэмкIэ къямыпхыгъэ еджапIэм исабый езыты зышIоигъохэр нахь макIэ хъунхэу ахэр мэгугъэх.

Онлайн шIыкIэм тетэу тхыгъэ лъэIу тхылъыр зыптхыхэкIэ, сабыим итхылъхэр (оригиналхэр) еджапIэм пхьынхэ фае. Ащ ыуж о «уиунэе кабинет» сабыир аштагъэмэ е амыштагъэмэ къэбарыр къихьащт.

Сихъу Гощнагъу.