Урысыем и Президентэу Вла­димир Путиным УФ-м иминистрэхэм я Кабинет пшъэрылъ фишIыгъ къэлэгъ­э­псыным епхыгъэ тхьапэхэм ягъэхьазырын нахь Iэрыфэгъу ашIынэу. Ащ фэдэ екIолIакIэм ишIуагъэкIэ псэупIэхэр зышIыхэрэм нахь псынкIэу IэпыIэгъу афэхъунхэ алъэкIыщт.

Унэхэр зышIыхэрэм чIыгу Iахьхэр аратыщтых, ищыкIагъэ хъумэ, чIыгур бэджэндэу зэраIыгъым фэгъэхьыгъэ зэзэгъыныгъэм ипIалъэ лъагъэкIотэщт. Тхьапэу бгъэхьазырын фаер нахь макIэ хъущт, псэолъэшIыным хэщагъэхэм фэгъэкIотэныгъэхэр яIэщтых.

АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэрэщаIуагъэмкIэ, Адыгеим псэупIэу щашIырэм хэгъэхъогъэныр пшъэрылъ шъхьаIэхэм ащыщ. Мы илъэсыр пштэмэ, непэрэ мафэм ехъулIэу фэтэрыбэу зэхэт унэ 14 шъо­лъырым щатыгъ. ПсэупIэхэм яшIын пэIухьэгъэ мылъкум цIыфхэм яахъщи хэлъ. Зигугъу къэтшIыгъэ унэхэм фэтэр 1428-рэ къадыхэлъы­тагъ, квадратнэ метрэ мин 56,04-рэ арылъ.

Программэу «ПсэупIэр» зыфиIорэм игъэцэкIэн къыдыхэлъытагъэу пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Базальт» зыцIэм псэупIэ комплексэу «Гагарина-1-м» дыхэтэу фэтэр 222-рэ зыхэт унэ ешIы. Ащ зэкIэмкIи квадратнэ метрэ мин 15 фэдиз илъыщт.

2021-рэ илъэсым цIыфхэм ямылъкуи хэ­лъэу псэолъэшIхэм фэтэрыбэу зэхэт унэ 22-рэ ашIыгъ, ахэм квадратнэ метрэ мини 100-м ехъу арылъ, зэкIэмкIи фэтэр 2422-рэ мэхъу.