Партиеу «Справедливая Россия» зыфиIорэм ишъолъыр отделениеу АР-м щыIэм джырэблагъэ зэхэсыгъо иIагъ. Партием хэхьэрэ нэбгырэ 22-м щыщэу 20-р къекIолIагъ.

Iофтхьабзэм шъолъыр отделением и Совет итхьаматэу Осмэн Альберт щыхадзыгъ. А IэнатIэр ыпэкIэ ыгъэцакIэщтыгъ Александр Лобода.

АР-м и Къэралыгъо Совет — Хасэм хэбзэгъэуцунымкIэ, законностымкIэ ыкIи чIыпIэ зыгъэIорышIэжьыпIэхэм яIоф­хэмкIэ икомитет итхьаматэу, партиеу «Справедливая Россия» зыфиIорэм ифракцие итхьаматэщтыгъэ Александр Лобода Iоф­шIэнэу зэрихьагъэмкIэ зэрэфэразэхэр шъолъыр отделением и Совет хэтхэм къыраIотыкIыгъ.

Джащ фэдэу партием итхьаматэу Сергей Мироновым ыцIэкIэ рэзэныгъэ тхылъхэр шъолъыр отделением хэтхэм партием игупчэ Аппарат и Къыб­лэ-Поволжье шъолъыр отдел ипащэу Н. Кузнецовым аритыжьыгъэх.

Партием ишъолъыр отделение и Совет ыкIи уплъэкIун-лъытэн комиссием хэтыщтхэр кIэу хадзы­жьыгъэх, ахэр нэбгырэ 12 мэхъу.

Осмэн Альберт Красногвардейскэ районым ит къуаджэу Хьати­къуае 1971-рэ илъэсым щылэ мазэм и 22-м къыщы­хъугъ. Гурыт еджа­пIэм ыуж Адыгэ къэралыгъо кIэлэегъэ­джэ институтым чIахьи, «Физическое воспитание» зыфиIорэ сэнэхьатыр иIэу 1991-рэ илъэсым къы­ухыгъ. ЯтIонэрэ апшъэрэ гъэсэныгъэр юриспруденциемкIэ 2016-рэ илъэсым зэригъэгъо­тыгъ.

ИIофшIэн гъогу физическэ культурэмкIэ кIэлэегъаджэу 1991-рэ илъэсым ригъэжьагъ, район администрацием Iутыгъ. 2011-рэ илъэсым АР-м IофшIэнымкIэ ыкIи социальнэ хэ­хъоныгъэмкIэ иминистрэ иапэ­рэ гуадзэу, нэужым иминистрэу Iоф ышIагъ. 2017 — 2020-рэ илъэсхэм муниципальнэ образованиеу «Красногвардейский район» зыфиIорэм ипэщагъ.

IофшIэн зэфэшъхьафхэр егъэ­цэкIэфэхэ ведомственнэ дипломхэмкIэ, щытхъу тхылъхэмкIэ къыхагъэщыгъ.

Сурэтыр А. Гусевым тыри­хыгъ.