Социальнэхэми къахэхъуагъ

ПенсиехэмкIэ фондым имыеу, къэралыгъо бюджетым къыхэхыгъэ пенсиехэр проценти 8,6-кIэ индексацие ашIыгъэхэу мэлылъфэгъум и 1-м къыщыублагъэу къатынхэу рагъэжьагъ.

Ащ фэдэ пенсие къызфакIохэрэр, социальнэр къызэратырэ нэбгырэ миллиони 3,3-р зэрахэтэу, миллиони 4 мэхъу. А пчъагъэм щыщэу нэбгырэ миллиони 2,2-мэ сэкъатныгъэ зэряIэм фэшI, нэбгырэ миллионмэ унагъор зыIыгъыр дунаим зэрехыжьыгъэм къыхэкIыкIэ ар афагъэнэфагъ.

ПенсиехэмкIэ фондым имыеу, къэралыгъо бюджетым къыхэхыгъэ пенсиер къызэратыхэрэм ащыщых Хэгъэгу зэошхом хэлэжьагъэхэр, «Жителям блокадного Ленинграда», «Жителям осажденного Севастополя» зыфиIорэ бгъэхалъхьэхэр къызфагъэшъошагъэхэр, радиацием е техногеннэ хъугъэ-шIагъэ горэм иягъэ зэригъэкIыгъэхэр, нэмыкIхэр. Пенсиехэр индексацие ашIынхэм пае сомэ миллиард 33,7-рэ федеральнэ бюджетым илъэсым ыкIэм нэс къыхахыщт.

Шъугу къэдгъэкIыжьын, 2022-рэ илъэсым социальнэ пенсиехэм проценти 7,7-рэ къахэхъонэу ары ыпэкIэ зэрагъэнэфэгъагъэр. Нэужым, инфляциер зэрэдэкIуаерэр къыдэлъытагъэу, проценти 8,6-м нагъэсыгъ.

ПIалъэр къэмысызэ…

УФ-м ПенсиехэмкIэ ифонд социальнэ пособиехэм ащыщхэр агъэнэфэгъэ пIалъэм нэмысызэ ытIупщыщтых. 2022-рэ илъэсыр къызихьагъэм щыублагъэу мы къулыкъум фэгъэзэжьыгъэ хъугъэхэр арых ащ къыхиубытэхэрэр.

Ахэр сабый зэрыс унагъохэм, дзэм е нэмыкI «силовой органхэм» къулыкъу ащызыхьыхэрэм яунагъохэм, радиацием иягъэ зэригъэкIыгъэхэм, сэкъатныгъэ иIэу рулым кIэлъырысхэм, нэмыкI хэушъхьафыкIыгъэ цIыф купхэм къаратырэ пособиехэр ары.

Банкым счет щызиIэу, ащкIэ ахъщэ тыныр мазэм и 3-м къыз­факIо хабзэхэм, мэлылъфэгъум и 3-р тхьаумэфэ мафэм зэрэтефагъэм къыхэкIыкIэ, бэрэскэшхом, мэлылъфэгъум и 1-м, афатIупщыгъ. ТапэкIи ащ фэдэу мазэм и 3-р зыгъэпсэфыгъом зытефэкIэ, банкымкIэ пособиер къызIэкIахьэхэрэм нахьыжьэу афагъэкIощт.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.