Адыгэ Республикэм псауныгъэр къэухъумэгъэнымкIэ и Министерствэ къызэритыгъэмкIэ, фэгъэкIотэныгъэ зиIэ цIыф купхэу Iэзэгъу уцхэр ыпкIэ хэмылъэу зэратын фаеу мы илъэсым икъихьагъу республикэм щатхыгъэр нэбгырэ мин 37,5-рэ.

А мылъкум щыщэу нэбгырэ мини 8,5-м — федеральнэ, мин 29,5-м — республикэ бюджетхэм къарыкIыщт мылъкумкIэ ящыкIэгъэ Iэзэгъу уцхэр аIэкIагъэ­хьащтых.

Псауныгъэр къэухъумэгъэнымкIэ министрэм игуадзэу Максим Коробко къызэриIуа­гъэмкIэ, ахэм ящыкIэгъэ Iэзэгъу уцхэр ыпкIэ хэмылъэу ягъэгъо­тыгъэным икIыгъэ илъэсым пстэумкIи сомэ миллион 408-рэ пэIуагъэхьагъ, ащ щыщэу сомэ миллиони 119-р — федеральнэ, миллион 284-р — республикэ бюджетхэм къарыкIыгъ. 2022-рэ илъэсым мы Iофым пэIуагъэ­хьащт мылъкур бэкIэ нахьыбэ ашIыгъ ыкIи пстэумкIи ар сомэ миллион 518-м нагъэсыгъ.

— Непэ Украинэм щыкIорэ хэушъхьафыкIыгъэ дзэ операцием епхыгъэу Iэзэгъу уцхэм ащыщхэр амыгъотынхэм тещыныхьэхэу цIыфхэм ахэр зэбгырахыгъэх. Аужырэ уахътэм анахь зыкIэупчIэхэрэр препаратэу «L-Тироксин» зыфиIорэр ары. Мы Iэзэгъу уцыр урысые компаниехэм къыдагъэкIы, арышъ, гумэкIыгъо къаIэтынэу, аптекэхэр аунэкIынхэу щытэп. Мы уахътэм ехъулIэу «L-Тироксинэу», инсулинэу мы илъэсым афэхъущтыр джыри гъэрекIо Урысыем ыщэфыгъ. Джыри зэ къыхэзгъэщымэ сшIоигъу, мы Iэзэгъу уцыр зыми текIодыкIыщтэп ыкIи щыIэныгъэмкIэ анахь ящыкIэгъэ уцхэм ауасэ къыдагъэкIуаеми, бэп къыхэхъощтыр, — къыIуагъ министрэм игуадзэу Максим Коробко.

ЦIыфым ищыIэныгъэкIэ мэхьанэ зиIэ Iэзэгъу уцхэр зэпыугъо афэмыхъоу аIэкIэгъэхьэгъэнхэм ыкIи ауасэ къызэте­Iэжэгъэным АР-м и ЛIышъхьэ- рэ депутатхэмрэ пхъашэу лъэплъэх.

Адыгеим и Прокуратурэ Рос­здравнадзорыр игъусэу зэ­пымыоу Iэзэгъу уцхэм ауасэ изытет зэрагъашIэ, мы Iоф­шIэным джыри къыхэлажьэх монополием пэшIуекIорэ фе­деральнэ къулыкъур ыкIи Народнэ фронтым ишъолъыр отделение. Специалистхэм къызэраIуагъэмкIэ, ахэм анэмыкIэу уасэхэр зэрэзэхъокIырэм псынкIэу узэрэлъыплъэщт хэу­шъхьафыкIыгъэ системэу МДЛП-м Iоф ешIэ. ЗыгорэкIэ Iэзэгъу уцхэм ащыщхэм ауасэ лъэшэу къыдагъэкIоягъэу шъуе­гуцафэмэ, Росздравнадзорым АР-мкIэ и ГъэIорышIапIэ зы­фэжъугъэзэн шъулъэкIыщт.

Адыгэ Республикэм псауныгъэр къэухъумэгъэнымкIэ иминистрэ игуадзэу Максим Ко­робко къызэриIуагъэмкIэ, Шъэу­мэн Хьазрэт ишIушIэ Фонд къытIупщыгъэ сомэ миллион 1,5-мкIэ лъым хэлъ шъоущы­гъур зэпымыоу зышырэ системэхэр зыныбжь илъэсищ мыхъугъэ кIэлэцIыкIу 15-мэ къафащэфын алъэкIыгъ. Джы 2022-рэ илъэсым АР-м и ЛIы­шъхьэу КъумпIыл Мурат иунашъокIэ зигугъу къэтшIыгъэ системэхэм якъэщэфын пэIуа­гъэхьащт сомэ миллион 18-р республикэ бюджетым къыхагъэкIыгъ. Ащ ишIуагъэкIэ шъоущыгъу уз зиIэ кIэлэцIыкIуи 130-у тишъолъыр щыпсэухэрэм зэпымыоу алъ зэрауплъэкIущт системэхэр арагъэгъотыщт. Ащ пае зэзэгъыныгъэхэм акIэтхагъэх, мы охътэ благъэм къа­IэкIэхьащтхэр зищыкIагъэхэм афагощыщтых.

Iэшъынэ Сусан.