Урысые Федерацием и Правительствэ хэтхэмрэ туриндустрием илIы­кIохэу вице-премьерэу Дмитрий Чернышенкэр зипащэхэмрэ зэды­ряIэгъэ зэIукIэгъум НАО-у «Красная поляна» игенеральнэ пащэу Андрей Кру­ковскэм зыгъэпсэфыпIэу «Лэгъонакъэ» иапэ­рэ чэзыу ипроект къащы­хилъхьагъ, зекIоным инвестициехэр нахьыбэу къещэлIэгъэнхэмкIэ зишIуа­гъэ къэкIощт Iофтхьэбзэ заулэмэ ягугъу къыщишIыгъ.

Андрей Круковскэм зэрэ­хигъэунэфыкIыгъэмкIэ, НДС-м тегъахъо фамышIынэу Правительствэм унашъо зэриштагъэм инвестиционнэ проектхэм заригъэушъомбгъущт, мы илъэсым иятIонэрэ кIэлъэныкъо ту­ризмэм псынкIэу хэхъоныгъэ ригъэшIыщт.

Ащ къызэрэхигъэщыгъэмкIэ, Лэгъо-Накъэ фэдэ чIыпIэ Iудзыгъэхэм яинфраструктурэ игъэпсынкIэ зэфэдэ екIолIакIэ къызэрэхахыгъэм инвесторхэмкIэ мэхьанэшхо иI. Къушъхьэ зыгъэпсэфыпIэхэм яшIынкIэ къэралыгъо программэхэр анахьэу ящыкIагъэх. Къушъхьэ экокурортэу «Лэгъонакъэ» архитектурэ теплъэу иIэщтым нэ­Iуасэ апэрэу фашIыгъэх. Андрей Круковскэм ишIошIкIэ, предложениеу зэIукIэгъум къыщахьыгъэхэр мы илъэсипшI благъэм къушъхьэ курортхэм ягъэпсынкIэ къызфагъэфедэнхэ алъэкIыщт. ГущыIэм пае, «неошале» шапхъэм тетэу унэ­хэр ашIыщтых, экологическэу къэбзэ псэолъапхъэхэр ары агъэфедэщтхэр.

Шъугу къэтэгъэкIыжьы къушъхьэ зыгъэпсэфыпIэу «Лэгъонакъэ» игъэпсынкIэ IофшIэнхэр бэшIагъэу Адыгеим зэрэщызэхащэхэрэр, экспертхэри, экологхэри ахэм зэрахэлажьэхэрэр. Адыгеим ичIыопс ибайныгъэ къэухъумэгъэным, тыкъэзыу­цухьэрэ дунаим зэрар рамыхэу къушъхьэлъэ чIыпIэр зэ­те­гъэ­псыхьэгъэным республикэм ипа­щэхэм лъэшэу гъунэ алъафы.

Илъэс псаум зэпыу имыIэу курортым Iоф зэришIэщтым къыхэкIэу зызыгъэпсэфынэу къэкIощтхэм ябагъэ ащ фэдизэу зэтекIыщтэп. ПсэолъэшIыпIэм къыщыкIырэ чъыгхэр амал зэриIэкIэ рамыупкIынхэу, чIыпIэм къекIурэ къэгъагъэхэмрэ куандэхэмрэ комплексым щагъэтIысхьанхэу рахъухьэ. Джащ фэдэу курортыр агъэпсы зы­хъукIэ, энергием инэмыкI къэ­кIуапIэхэр, ощхыпсыр зэрылъэ­дэщтыр гъэфедэгъэным, хэкIыр зэтеушъхьафыкIыгъэу угъоигъэ­ным анаIэ атырагъэтыщт.

Къушъхьэ курортэу «Лэгъонакъэр» загъэпсыкIэ, шэпхъэ лъагэхэм атетэу зыгъэпсэфа­кIохэм яфэIо-фашIэхэр рес­публикэм щагъэцэкIэщтых. ЗекIохэми хэпшIыкIэу къахэ­хъощт. ЗыгъэпсэфыпIэм зекIонми, республикэм иэкономики хэ­хъоныгъэшхо аригъэшIыщт. Зе­кIоным иIахьэу ВРП-м хилъхьэрэр проценти 3,2-м нэсыщт. Инвестициехэр шъолъырым къыхалъхьанхэмкIэ, IофшIэпIэ чIыпIакIэхэр зэхэщэгъэнхэмкIэ, гъомылэпхъэ къабзэхэр аIэкIэзыгъэхьащт аграрнэ комплексым зегъэушъомбгъугъэнымкIэ, бизнесымрэ сатыумрэ хэхъоныгъэ ягъэшIыгъэнымкIэ амал тедзэ­хэр щыIэщтых.