КIэлэцIыкIухэу илъэси 8-м зыныбжь шIокIыгъэу, ау 17-м емыхъугъэхэр зэ­рыс унагъохэу зигъот макIэхэм мазэ къэс аратыщт ахъщэ тынхэм япхыгъэ унашъом УФ-м и Президентэу Владимир Путиныр кIэтхагъ.

— 2022-рэ илъэсым мэлылъфэгъум и 1-м къыщегъэжьагъэу социальнэ IэпыIэгъу цIыфхэм ягъэгъо­тыгъэным къыдыхэлъытагъэу илъэси 8-м зыныбжь шIокIыгъэу, ау 17-м емы­хъугъэ кIэлэцIыкIухэр зэ­рыс унагъохэм мазэ къэс ахъщэ тынхэр аратынэу рагъэжьэщт, — къыIуагъ Владимир Путиным.

Ар ратыщт кIэлэцIыкIур Урысыем игражданинэу, зэпымыоу къэралыгъом щыпсэоу щытмэ. Джащ фэдэу мазэм ахъщэу унагъом къыIэкIахьэрэр ащ исхэм зэкIэми атегоща­гъэу, зы нэбгырэм тефэрэр узэрыпсэун плъэкIыщт ахъщэ анахь макIэу шъо­лъырым щыгъэнэфагъэм кIэмыхьэрэмэ, мыщ къыхеубытэ.

Ахъщэ тынэу аратыщтым ибагъэ зэфэшъхьафэщт, ар унагъом ихахъо елъытыгъэу шъолъыр пэпчъ къыщалъытэщт. Ар зытефэу алъытагъэхэм жъоныгъуакIэм и 1-м къаIу­кIэщт, а пIалъэм къызIэкIэмыхьэхэрэм мэкъуогъум и 1-м мэзитIур зэхэтэу къаратыжьыщт.