ШIушIэ IэпыIэгъур зэпыурэп
Урысые Iофтхьабзэу «Тызэгъус» зыфиIорэм диштэу Донецкэ ыкIи Луганскэ народнэ республикэхэм зышъхьэ къарызыхыжьхэрэм апае шIушIэ IэпыIэгъур Адыгэ Республикэм щылъагъэкIуатэ.
Мы уахътэм Адыгеим къэкIуагъэхэм шIушIэ IэпыIэгъур зэратырагощэщт шIыкIэм фэгъэхьыгъэ зэхэсыгъо политическэ партиеу «Единэ Россием» ишъолъыр отделение иштаб щыкIуагъ. Ар зэрищагъ отделением игъэцэкIэкIо комитет ипащэу АфэшIэгъо Рэмэзан.
Видеозэпхыныгъэ шIыкIэм тетэу кIогъэ зэхэсыгъом хэлэжьагъэх республикэм ит муниципальнэ образованиехэм, УФ-м ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу АР-м щыIэм, ошIэ-дэмышIэ IофхэмкIэ АР-м и Комитет, кощын IофхэмкIэ, IофшIэн ягъэгъотыгъэнымкIэ, IофшIэнымкIэ ыкIи социальнэ хэхъоныгъэмкIэ Министерствэм, цIыфхэр социальнэу къэухъумэгъэнхэмкIэ комплекснэ гупчэхэм ялIыкIохэр.
— ТхьамыкIагъо къызэхъулIагъэхэм бэдэд афэгумэкIырэр. Адыгеим щыпсэухэрэри, волонтерхэри, предпринимательхэри шIушIэ Iофтхьабзэхэм чанэу ахэлажьэх. Мы уахътэм ехъулIэу кIочIэ пстэури фэIорышIэзэ къэтыугъоигъэ шIушIэ IэпыIэгъур зышъхьэ къезыхьыжьэжьыхи Адыгэ Республикэм къэкIуагъэхэм атедгощэщт. Ащ фэдэу нэбгырэ 400-м ехъу тишъолъыр къихьагъэр, ахэр зэкIэ районхэм ащыIэх. Мы пчъагъэм мафэ къэс зызэблехъу, зыхэр яIахьылхэм адэжь нэмыкI шъолъырхэм мэкIожьых, нэмыкIхэр къэкIох, — къыIуагъ АфэшIэгъо Рэмэзан.
Джащ фэдэу партием ишъолъыр отделение игъэцэкIэкIо комитет ипащэ зэхэсыгъом хэлажьэхэрэм анаIэ зытыраригъэдзагъэхэм ащыщ шIушIэ IэпыIэгъур Iахь-Iахьэу агощы зыхъукIэ зэфэдэу Iалъмэкъхэр ашIынхэу зэрэщытыр. Мы Iофым тэрэзэу екIолIэнхэу ыкIи унагъом ис нэбгырэ пэпчъ къыдыхалъытэнэу АР-м и ЛIышъхьэу, партиеу «Единэ Россием» ишъолъыр отделение и Секретарэу КъумпIыл Мурат къафигъэпытагъ.
Мэлылъфэгъум и 1-м шIушIэ IэпыIэгъур ЛНР-м ыкIи ДНР-м зышъхьэ къарызыхыжьхи Мыекъуапэ къэкIожьыгъэхэм аратыгъ, къыкIэлъыкIощтхэр районхэм ащыIэхэм аIукIэщт.
Мы республикэхэм къарыкIыхи Адыгеим къэкIуагъэхэм гражданствэ яIэнымкIэ, IофшIэн ягъэгъотыгъэнымкIэ, якIэлэцIыкIухэр (нэбгыри 130-м ехъу) гъэсэныгъэм иучреждениехэм ачIэгъэхьэгъэнхэмкIэ Iофыгъоу зэшIуахыхэрэм ведомствэ пэпчъ илIыкIо зэхэсыгъом къыщытегущыIагъ.
Iэшъынэ Сусан. Сурэтыр Iэшъынэ Аслъан тырихыгъ.