Мэзэ лъапI

Мэлылъфэгъум и 2-м мэзэ лъапIэу НэкIмазэр аублагъ.

«НэкIмазэр – мэзэ хъяр!» аIо. ЩыIэныгъэм хэлъыр зыушэтыгъэ нахьыжъхэу тхьэшIошъхъуныгъэр зыпкъырылъхэм джары зэралъытэрэр ыкIи ащ узэгупшысэн икъун хэлъ. НэкIыр аукъодыеп, ащ хэти ыгукIи ыпкъыкIи фэхьазырэу техьан фае. Мы мазэм къыкIоцI угу илъри пшIэрэри зэдиштэу, лъэныкъуабэкIэ къэбзагъэр къэбгъэгъунэу, псапэ пшIэу упсэун фае. Тхьэм къыпфишIэрэ пстэумкIи шыкур пшIыным мэхьанэшхо иI.

НэкIмазэр зытефэрэ пэпчъ мысымаджэу, мысабый дэдэмэ, зышIуигъэIофэу ынэкIымэ, ащ ишапхъэхэр ыгъэцакIэхэмэ, лъэшэу ишIогъэшхо къэкIощт. НэкIмазэм цIыфыр ыгукIэ нахь къабзэ ешIы, зекIокIэ дэйхэм ащедзые. Мы мазэм цIыфым уахътэ егъоты ышъхьэрэ ыпсэрэкIэ ыкIи ыпкъынэ-лынэкIэ нахь зыфэсакъыжьынэу. НэкIыр нэф мышъы­зэ аублэ, тыгъэр къохьажьыфэ пси, нэмыкI гъомылапхъи зыIуагъафэрэп. Тхьэм елъэIух, нэмазыр гъогогъуи 5 ашIы, гунахьым енэгуех, Iае амышIэным, амыIоным фэсакъых. А зэкIэми ялъытыгъэу нэкIыр зыIыгъ пэпчъ ежь ышъхьэ­кIи нахь гупсэф-рэхьат мэхъу, ыIэпкъ-лъэпкъ­хэри нахь псынкIэ ешIых.

Ау агукIэ ашIоигъоми, уз гъэнэфагъэ­хэр зиIэ сымаджэхэм анэкIыныр ищыкIагъэп. ПфэмылъэкIыщтымкIэ хэти дэогъу къыпфэхъущтэп. Ау нэкIыр зымыIыгъхэм, сабый ибэхэм, нэжъ-Iужъхэм, IэпыIэгъу зимыIэ сымаджэхэм адеIэхэзэ ашIымэ псапэ. Непэ шыкур, хэти ышхыни, щыгъыни иI, ау шIу пшIэ пшIоигъомэ, зыфэпшIэнэу щыIэри макIэп. НэкIмазэм нахь мэзэ лъапIэ илъэсым хэтэп.

ЦIыфыгухэр нахь зэфэкъэбзэнхэу, зэрэлъытэнхэу, Тхьэм къытитыгъэ дунэешхо дахэм иIэшIугъэ зэхатшIэу, зэкIэ псэ зыпытыр тыухъумэу, тызэфэсакъы­жьэу тыщыIэнэу тэлъаIо. НэкIмэзэ хъяр Тхьэм тфешI.

Дзэукъожь Нуриет.