Анахь гъомылэпхъэ къабзэу алъытэ

ЗэкIэми дэгъоу ашIэрэ, мафэ къэс дгъэфедэрэ щыгъур ары зы­фа­тIорэр. ЗэрэхагъэунэфыкIырэмкIэ, минерал закъоу зыпари ра­мышIэу, зыпари хамыгъахъоу, хамылъхьэу, зытетым тетэу агъэ­федэрэр щыгъур – «экологическэу къэбзэ продукт» зыфаIорэр ары.

Бэрэ зэхэтэхы, бэрэ къатхы цIыфым ипсауныгъэкIэ щыгъур щынагъоу зэрэщытыр, иягъэ къыгъэкIон зэрилъэкIырэр. Ау сыд фэдэрэри шапхъэм шIокIы хъумэ, шIуагъэ къыхьырэп. Щыгъури егъэлыекIыгъэу бгъэфедэмэ, зэрар къыуихыщт, ау гъэнэфагъэ ари, а кристалл къэбзэ цIыкIури, пкъышъолым зэрищыкIагъэр.

Ащ шIуагъэу хэлъхэм ащыщхэм ягугъу къэтшIын.

*Мыжъо щыгъум (каменная соль) игъэхьазырынкIэ технологиеу щыIэм амал къеты зишIуагъэ къэкIорэ веществоу ащ хэлъхэр зэкIэ къэгъэнэжьыгъэнхэу.

* Хы щыгъум (морская соль) псым хэткIухьэрэ веществоу пкъышъолым шIуагъэ къыфэзыхьэу хэлъыр нахьыб мыжъо щыгъум нахьи.

* Щыгъум ишIуагъэкIэ пкъы­шъолым къыхэпщынхэ плъэ­кIыщт ащ зэрар езыхырэ веществоу хэлъхэр.

* Радиацием, нэмыкI бзыйхэу мафэ къэс тызэрихьылIэхэу, зиягъэ къакIохэрэм пкъышъолыр апэуцужьынымкIэ щыгъум ишIуа­гъэ къэкIо, калием иионэу ащ хэлъхэм радиоактивнэ элементхэм акIуачIэ къыщегъакIэ.

Бэ мыщ фэдэ щысэу къэпхьын плъэкIыщтыр. Щыгъур умыгъэфедэныр IэшIэхэп хэткIи. Гъомылапхъэм иIэшIугъэ нахь дэгъу зэришIырэм имызакъоу, пкъышъолым псэу хэтыр «егъэ­IорышIэ», нэгъупсым (желудочный сок) солянэ кислотар къы­шIыным иамал ары къэзытырэр. Ащ ишIуагъэкIэ гъомылапхъэр дэгъоу нэгъум «егъэжъожьы», микробхэу зэрар къэзыхьыхэрэр еукIых.

Шъуфэсакъ, щынагъо! Гъомылэпхъэ щыугъэр зикIасэхэм зызщаухьан фэе «спискэ шIуцIэу» народнэ медицинэм къытырэми шъущыдгъэгъозэн.

* Гъэнэфагъэ гъомылэпхъэ щыугъэм лъыдэкIуаер къы­Iэтын зэрилъэкIырэр. Ащ къы­хэкIэу гипертоникхэм ар нахь макIэу агъэфедэн фае.

* Зижъэжъыехэр узыхэрэм щыгъоу агъэфедэрэр амал зэриIэкIэ мэкIэ дэдэ ашIын фае. Узыр нахь къызыщыбырсырырэ лъэхъаным щыгъумрэ къэбэскъэ гъэшIоIугъэмрэ ашхы хъухэщтэп.

* Гум изытет епхыгъэу цIыфым ыпкъынэ-лынэхэр мэпщыхэмэ, плъыр-стыр узыр иIэ хъугъэмэ, щыгъур нахь макIэ ышIын фае е ар ымыгъэфедэхэныр нахьышIу.

* Щыгъубэм нэхэм зэрар арехы.

IэзэкIэ амалэу иIэхэм ащыщхэр

Чыихъыр (ангинэр)

Стэчаным из псы гъэжъогъэ фабэм хы щыгъу (морская соль) щайджэмышхышъхьэ, джащ фэдиз содэ ыкIи йод гъоткIуи 4 хэплъхьащтых. Дэгъоу ахэр зэхэбгъэкIухьанхэшъ, жэ кIоцIым ыкIи чыим ибгъэчъыхьащт. Сыхьат пэпчъ арэущтэу пшIыщт зы мафэрэ.

Артритыр

* Мы узым шхын щыугъэр «икIасэп», ау кIышъом ар епхьылIэмэ, ишIуагъэ къакIоу еIо народнэ медицинэм.

* Шъоу стэчаныр, бэлыдж шIуцIэм къыкIэфыгъэ псы стэчан, аркъ стэчанныкъо ыкIи щыгъу грамми 100 дэгъоу зэхэбгъэкIухьанхэшъ, узырэ къупшъхьэ зэрытыпIэхэм ащыпфэщт. ЗызыбгъэпскIырэм ыуж ар пшIымэ нахьышIу.

* Щыгъу джэмышхышъхьи 2 псы фабэм хэбгъэткIухьанышъ, ащкIэ IэплъэкIыр бгъэшъокIыщт ыкIи зэрытыпIэ чIыпIэу узырэм къепщэкIыщт.

Жэлэетагъэр (бронхитыр)

* Жъэпхъэ стырым щыгъу тIэкIу щыбгъэстырынышъ, шъабэ мэхъуфэ уубыщт (щыгъур нахь шъабэ къэс нахьышIоу жалэхэм ар ахэхьащт). Щыгъу сапэр зэрылъым лъхъанчэу зытеууIубэзэ, ар зэIапшIэзэ, сапэр зыIупщэщт. Ащ фэдэ ингаляцие гъушъэм мэфэ зытIущкIэ узыр щигъэзыещтэу еIо народнэ медицинэм.

* Псы стэчаным щайджэмышхышъхьэм ызыныкъо фэдиз щыгъу, содэ щайджэмышхышъхьэ хэптэкъонхэшъ, дэгъоу зэхэбгъэкIухьащтых. Умышхэзэ ащ уешъощт.

* «Боржоми» зыфаIорэ псы мл 100 ыкIи щэ стыр мл 100 зэхэпкIэнхэшъ, тIэкIу-тIэкIоу ипшъущт.

Къупшъхьэшъэбэ узыр (остеохондрозыр)

* ЗыуузэнкIын умылъэкIэу, ухъые къэс узым «узэкIе­IулIэмэ», спирт мл 100, бэлыдж шIуцIэм ипс мл 200 ыкIи щыгъу джэмышхышъхьэ зэхэбгъэкIу­хьэхэу узырэ чIыпIэхэм ащыпфэмэ ишIуагъэ къэкIощтэу къе­ты народнэ медицинэм.

* Тыгъэгъэзэ дэгъэ грамми 100, «хозяйственнэ» зыфаIорэ сабыным ызыныкъоу гъэушкъоигъэр, щайджэмышхым изэу содэ, щыгъу шъабэу щайджэмышхышъхьи 3 дэгъоу зэхэбгъэкIухьанхэшъ, мэфищым щыбгъэтыщт. Угъолъыжьыным ыпэкIэ а зэхэгъэкIухьагъэр уакIыб щыпфэзэ пшIыщт.

КIэнтIыIу узыр (радикулитыр)

Горчицэ грамми 100 ыкIи щыгъу грамм 200 зэхэбгъэкIу­хьанхэшъ, чIыпIэ фабэм чэщым щыбгъэтыщт. Угъолъыжьыным ыпэкIэ а зэхэгъэкIухьагъэр узырэ чIыпIэм щыпфэщт кIы­шъор гъушъэ мэхъуфэ. Ащ зыгорэ къепщэкIынышъ, чэщым тебгъэлъыщт. Пчэдыжьым псы фабэкIэ тептхьакIыкIыжьыщт. Зы мафэ тешIэ къэс арэущтэу пшIызэ гъогогъуи 5 пшIын фае.

Косметикэм зэрэщагъэфедэрэр

Шъхьацыр екIымэ

Тхьамафэм зэ, шъхьацыр зыпфыкIэрэм ыуж, шъхьашъом щыгъу шъэбэ тIэкIу щыпфэщт, дэгъоу хэбгъахьэзэ, такъикъ 15-м къыкIоцI.

Нэгушъор «пшъы­гъэмэ»

Къоегъэушкъоигъэ (творог) джэмышхышъхьи 2, щэ джэмышхышъхьэ, оливкэ дэгъэ джэмышхышъхьэ, ащ фэдиз щыгъу, жъгъэеу упкIэтэгъэ помидор зэхэбгъэкIухьанхэшъ, нэгушъом щыпфэщт, такъикъ 15 – 20-м тебгъэлъыщт. Минеральнэ псыкIэ тептхьакIыкIыжьыщт.

Псауныгъэ Тхьэм къышъует!