Красногвардейскэ районым кIэу кIэлэ­цIыкIу Iыгъы­пIищ щашIыгъ.

IыгъыпIэ пэпчъ сабыи 120-рэм тегъэпсыхьагъэу щыт. Лъэпкъ проектэу «Демографием» ишIуа­гъэкIэ ащ фэдэ учреж­дениякIэхэр къадэуцуагъэх къуаджэу Хьати-къуае, псэупIэхэу Белэмрэ Садовэмрэ.

Адыгеим и ЛIышъхьэу КъумпIыл Мурат районым зыщэIэм Iофэу ашIэрэм икIэуххэм защигъэгъозагъ. Мы Iофтхьабзэм хэлэжьагъэх федеральнэ инспектор шъхьаIэу Сергей Дрокиныр, Урысые Феде­рацием Адыгеим ыцIэкIэ исенаторэу Александр На­ролиныр, Адыгэ Рес­публикэм гъэсэныгъэмрэ шIэныгъэмрэкIэ иминистрэ ипшъэрылъхэр зы­гъэцакIэу Евгений Лебедевыр, Красногвар­дейскэ районым ипащэу Гъубжьэкъо Темур.

ЫпэкIэ агъэпсыгъэгъэ кIэлэцIыкIу IыгъыпIэу N 11-м пыдзэгъэ корпусэу хъущт унакIэу Белэм щагъэуцугъэр. Илъэс 1,5-м къыщыублагъэу илъэси 7-м нэс зыныбжь кIэлэцIыкIухэр джы чэзыум ежэжьыщтхэп. Щынэгъончъэу сабыйхэр IыгъыпIэ­хэм ачIэсынхэмкIэ амал дэгъухэр мыщ щарагъэ­гъотыщтых. Зыщычъыещтхэр, спортым ыкIи музыкэм зыщапылъыщтхэ зал­хэр, психологымрэ логопедымрэ якабинетхэр, медицинэ Iофтхьабзэхэм ыкIи гъомылапхъэм игъэ­хьазырын афытегъэпсы­хьэгъэ блокхэр, гыкIапIэр, джэгупIэ чIыпIэхэр ащ къыхеубытэх.

Республикэм и ЛIышъхьэ кIэлэцIыкIу IыгъыпIэм хэхьэрэ унэхэр къыплъы­хьагъэх, кIэлэпIухэм гущыIэгъу афэхъугъ. Адыгэ Республикэм гъэсэны­гъэмкIэ и Министерствэрэ районым ипащэхэмрэ пшъэрылъхэр афишIыгъэх тапэкIи нахь дахэу а чIыпIэр зэтырагъэпсыхьа­нымкIэ, документхэу ищыкIагъэхэр амал зэриIэкIэ нахь псынкIэу агъэхьазырынхэу.

Мы мэфэ дэдэм кIэлэцIыкIу IыгъыпIэу къуаджэу Хьатикъуае щашIыгъэр КъумпIыл Мурат зэ­ригъэлъэгъугъ. Мы ма­фэхэм ар мебелымкIэ, оборудованиемкIэ, джэ­гуалъэхэмкIэ зэтырагъэ­псыхьэ. КIэлэцIыкIу Iы­гъыпIэу N 3-р, «Родничокыр» зычIэтыгъэ унэ­жъым кIэлэцIыкIухэр къы­чIащыжьынхэшъ IыгъыпIакIэм къащэжьыщтых. Джащ фэдэу чэзыум ежэщтыгъэ е гъунэгъу псэу­пIэхэм ащэщтыгъэ сабыйхэр мыщ къащэхэзэ ашIыщт.

Республикэм и ЛIышъхьэ кIэуххэр зэфихьысыжьхэзэ къызэрэхигъэщыгъэмкIэ, социальнэ мэ­хьанэ зиIэ псэуалъэхэм яшIын тэрэзэу екIолIэ­гъэным, лъэпкъ проектхэм къахиубытэрэ Iофтхьа­бзэхэр гъэцэкIэгъэнхэм мэхьанэшхо яIэу щыт.

«Непэ къоджэдэсхэм ящыкIэгъэгъэ кIэлэцIыкIу IыгъыпIэхэр дгъэпсыгъэх. Ащ нэужым тынаIэ зытетыдзэщтыр къуаджэхэр нахь зэтегъэпсыхьэгъэнхэмкIэ, кIэлэцIыкIу Iыгъы­пIэхэм якIурэ гъогухэр Iэрыфэгъоу щытынхэмкIэ, урамхэр тэрэзэу къэнэфынхэмкIэ программэхэм Iоф адэшIэгъэныр ары. Мы илъэсым а IофшIэныр едгъэжьэщт. Ахэм анэ­мыкIэу чIыпIэхэм япащэ­хэм, ведомствэхэм яIэ­шъхьэтетхэм икъоу цIыф­хэм агурагъэIон, алъагъэ­Iэсын фае ныхэм, кIэлэцIыкIухэм, сабыйхэр зэрыс унагъохэм къэра­лыгъо IэпыIэгъу ятыгъэнымкIэ Iофтхьабзэхэу пхырытщыщтхэр. ЗэкIэ тшIэ­рэр цIыфхэм шIуагъэ къафа­хьыным тегъэпсы­хьагъ», — къыIуагъ КъумпIыл Мурат.

АР-м и ЛIышъхьэ ипресс-къулыкъу Сурэтхэр А. Гусевым тырихыгъэх.