УФ-м и Правительствэ санкциехэм апэшIуекIорэ Iофтхьабзэхэм джыри ахигъэхъуагъ. Ахэм ипотекэр, бизнес цIыкIум ыкIи гуры­тым афэгъэзагъэхэм IэпыIэгъоу аратыщтыр, промышленнэ хъызмэтшIэ­пIэ­шхохэм зэрадеIэщтхэр къыхеубытэх.

УФ-м и Президентэу Вла­димир Путиным иунашъокIэ, фэгъэкIотэнхэр зиIэ ипотекэм фэгъэхьыгъэ программэм къыдыхэлъытэгъэ шапхъэхэм зарагъэушъомбгъугъ. ГущыIэм пае, ипотекэр зыгъэпсыгъэхэм чIы­фэу банкым къаритыщт ахъщэ анахьыбэм мэлылъфэгъум и 1-м щыублагъэу мэзищ пIалъэкIэ хагъэхъуагъ. Москва ыкIи Мос­ковскэ хэкум, къалэу Санкт-­Петербург, Ленинградскэ хэкум ащыпсэухэрэм сомэ миллион 12 шапхъэу яIэр, нэмыкI шъо­лъырхэм арысхэм миллиони 6 анахьыбэу къаратыщтыр. Илъэ­сым техъощтыр процент 12 мэхъу.

УФ-м и Правительствэ и Тхьаматэу Михаил Мишустиным къызэриIуагъэмкIэ, фэгъэ­кIотэнхэр зиIэ ипотекэм фэ­гъэхьыгъэ программи 3-мэ ателъытэгъэ процентхэр зы­тетым тетэу къэнэжьыщтых. «Унэгъо ипотекэм» къыхиубы­тэхэрэм къаратыщтым про­центи 6, къоджэ ипотекэм проценти 3 атехъощт, «ДальневосточнэкIэ» зэджагъэхэм къыхиубытэхэрэм проценти 2 нахьыбэ темыхъоу къафагъэпсыщт.

— ПсэукIэ амалэу иIэр на­хьы­шIу зышIымэ зышIоигъохэмкIи, псэолъэшIыным фэгъэза­гъэхэмкIи мы Iофтхьабзэхэр IэпыIэгъушхо зэрэхъущтым щэч хэлъэп, — къыIуагъ Премьер­-министрэм.

Шъугу къэдгъэкIыжьын, фэгъэкIотэнхэр зиIэ ипотекэм кIэщакIо фэхъугъэр УФ-м и Президентэу Владимир Пути­ныр ары. 2020-рэ илъэсым ко­ронавирусыкIэм къыздихьыгъэ къиныгъохэр цIыфхэм афэгъэ­псынкIэгъэнхэм фэшI ащ фэ­гъэхьыгъэ программэр агъэ­хьазырынышъ атIупщынэу ащ унашъо ышIыгъагъ.