Адыгэ Республикэм культурэмкIэ и Министерствэ, республикэм лъэпкъ культурэмкIэ и Гупчэ «Культурэм иIофышIэ анахь дэгъу» зыфиIорэ шъолъыр зэнэкъокъур зэфахьысыжьыгъ.

Къэралыгъо программэу «Культурэм хэхъоныгъэ ышIыныр» зыфиIорэр щыIэныгъэм щыпхыращызэ, Урысыем щыпсэурэ лъэпкъхэм яискусствэрэ якультурнэ кIэнрэ я Илъэс щызэхащэ- рэ Iофтхьабзэхэм зэнэкъокъур ащыщ.

Апэрэ едзыгъом хэхьэрэ зэ­IукIэгъухэр къалэхэм, районхэм ащыкIуагъэх. ТекIоныгъэр къыдэзыхыгъэхэр Тэхъутэмыкъое районым культурэм и Унэшхо щызэIукIагъэх, яIэпэIэсэныгъэ къагъэлъэгъуагъ.

«Культурэм сыриIофышI — нэIуасэ тызэфэгъэхъу», «Сэнаущым имэшIуач», «Универсальнэ артист» зыфиIохэрэм, нэмыкI едзыгъохэм ащызэнэкъокъугъэх.

Жанрэ зэфэшъхьафхэмкIэ орэд къэзыIуагъэхэр осэшI купым хэт­хэм нахь агу рихьыгъэх. 2022-рэ илъэсым культурэм иIофышIэ анахь дэгъоу Елизавета Призовар къыхахыгъ. Джэджэ районым лъэпкъ культурэм и Гупчэ иорэдыIо ансамблэу «Станишники» зыфиIорэм ипащ. ОсэшIхэм зэдырагъашти, апэрэ чIыпIэр Е. Призовам зыфагъэшъуашэм, зэхахьэм хэлажьэхэрэр бэрэ Iэгу фытеуагъэх. ШIухьафтынэу сомэ мин 25-рэ ащ ратыжьыгъ.

ЯтIонэрэ чIыпIэр ыкIи сомэ мин 20 фагъэшъошагъ Адыгэкъа­лэ лъэпкъ культурэм и Гупчэ иIофышIэу Анна Бершадскаям. Мыекъопэ районым илъэпкъ ансамблэу «Кубаночкэм» ихудожественнэ пащэу Полина Мокровам сомэ мин 15 фагъэшъошагъ, ящэнэрэ чIыпIэр къызэрэдихы­гъэм фэшI фэгушIуагъэх.

Культурэм иIофышIэхэу Максим Стариковым, Сихъу Фатимэ, Хьагъур Нуриет, Валерия Кухлеевам ясэнэхьаткIэ шIэныгъэ ку­ухэр къызэрагъэлъэгъуагъэр осэшIхэм къыхагъэщыгъ, сомэ мини 3 нэбгырэ пэпчъ ратыгъ.

— Зэнэкъокъур зэрэкIуагъэм ИнтернетымкIэ, нэмыкI амалхэмкIэ нэбгырэ мини 10 фэдиз лъып­лъагъ, — къытиIуагъ Адыгэ Рес­публикэм культурэмкIэ и Министерствэ испециалист шъхьаIэу Теуцожь Нуриет. — Культурэм иIофышIэхэм яIэпэIэсэныгъэ зэрэхагъахъорэр зэхэщакIохэм хагъэунэфыкIыгъ.