Джэпсалъэхэр бэу аштагъэх

АР-м и Къэралыгъо Совет — Хасэм ияблэнэрэ зэIугъэ­кIэгъу я VIII-рэ зэхэсыгъоу тыгъуасэ иIагъэм АР-м и ЛIы­­шъхьэу КъумпIыл Мурат хэлэжьагъ. Зэрэхабзэу, ар зэ­рищагъ республикэ Парламентым и Тхьаматэу Владимир Нарожнэм.

Повесткэм щагъэнэфагъэхэм атегущыIэнхэр ра­мыгъажьэзэ, Владимир Нарожнэм УФ-м СледствиехэмкIэ и Комитет СледствиехэмкIэ и ГъэIорышIапIэу АР-м щы­Iэм ипащэу джырэблагъэ агъэ­нэфэгъэ Александр Ли­пало, АР-м и ЛIышъхьэ иунашъокIэ кIэлэцIыкIухэм яфитыныгъэ­хэр къэухъу­мэгъэнхэмкIэ АР-м и Упол­номоченнэ IэнатIэ Iуагъэхьэгъэ На­талья Агеевам депутатхэр нэIуасэ афишIыгъэх, афэгушIуагъэх.

Шъэо Аскэр Тэхъутэмыкъое район админист­рацием ипащэу зэрагъэ­нэфагъэм къыхэкIыкIэ, АР-м и Къэралыгъо Совет — Хасэм идепутат IофшIэныр къызэригъэтIылъыжьырэм тегущыIэхи дырагъэштагъ. Хэбзэ­ихъухьан Iофым ащ иIа­хьышхо зэрэхилъхьагъэм, ипшъэрылъхэр зэрифэ­шъуашэу зэригъэцэкIагъэ­хэм афэшI Парламентым ирэзэныгъэ тхылъ фа­гъэ­шъошагъэу Владимир На­рожнэм ритыжьыгъ.

АР-м хэгъэгу кIоцI Iоф­хэмкIэ и Министерствэ икIыгъэ илъэсым Iофэу ышIагъэм фэгъэхьыгъэ докладэу ащ ипащэу Олег Безсмельницыным къы­шIыгъэм нэужым едэIу­гъэх. Ащ къызэриIуагъэмкIэ, 2021-рэ илъэсым пстэумкIи бзэджэшIэгъэ 4496-рэ республикэм щызэрахьагъэу агъэунэфыгъ. Ащ щыщэу 1062-р бзэ­джэшIэгъэ хьылъэкIэ е хьылъэ дэдэкIэ алъытэ­хэ­рэм ащыщых.

ЦIыфыр зэраукIырэм, шъобж хьылъэхэр зэрэ­тыращэхэрэм, хъункIэным, фэтэрхэм зэрятыгъохэрэм, автомобилыр зэратыгъурэм япчъагъэ къыщыкIагъ, ау хъоршэрыгъэ зэрахьэзэ цIыфхэр зэрагъапцIэхэрэр хэпшIыкIэу нахьыбэ хъугъэ. Гъогухэм хъугъэ-шIагъэу атехъухьэ­хэрэм япчъагъэ, ыпэрэ илъэсым егъэпшагъэмэ, процент 13 къыщыкIагъ, ау, гухэкIыми, ахэм ахэ­кIо­дагъэр процент 15,2-кIэ нахьыбэ хъугъэ.

Министрэм нэужым де­­путатхэм упчIэхэмкIэ ьзы­­фагъэзагъ. Профилактикэ IофшIэным, наркотик­хэр хэбзэнчъэу зэрагъэзекIохэрэм, гъогухэм хъугъэ-шIагъэу атехъухьэхэрэм, нэмыкIыбэхэм ахэр афэгъэхьыгъагъэх.

Ащ ыуж Къэралыгъо Советым — Хасэм идепутат истатус, къэралыгъо гражданскэ ыкIи муниципальнэ къулыкъухэм, транспортым пае хэбзэIахьхэм, административнэ хэукъоныгъэхэм, зэпахырэ узхэм за­мыушъомбгъуным пае цIыфхэм яиммунитет зыкъегъэIэтыгъэным, АР-м хэдзынхэмкIэ и Гупчэ комиссие зэрэзэхэтыщтым, нэмыкIхэм афэгъэхьыгъэ законопроектхэм, законхэм ате­гущыIагъэх, апэрэ ыкIи ятIо­нэрэ еджэгъухэмкIэ аштагъэх.

Мызыгъэгум Адыгеим и Парламент федеральнэ Гупчэм фэгъэзэгъэ джэпсалъэу бэ ыгъэхьазырыгъэр. Ахэр кIэлэцIыкIу ибэхэм е лъыплъэн зимыIэу къэнагъэхэм псэупIэхэр ягъэгъотыгъэнхэм пае 2022-рэ илъэсым ахъщэ тедзэ респуб­ликэм къыфэтIупщыгъэным, къэралыгъо ыкIи муниципальнэ закупкэхэм апае зэзэгъыныгъэхэм, интернетыр агъэфе­дэзэ къэбар нэпцIхэр зытIупщыхэрэм апэшIуекIогъэным фэгъэхьыгъэ хэбзэгъэуцугъэм игъэкIэжьын, унэгъо ныбжьыкIэхэм фэгъэкIотэнхэр зиIэ ипотекэр къызIэкIэгъэхьэгъошIу афэшIыгъэным, гъэстыныпхъэ шхъуантIэр унэхэм аращэ­лIэным е нэмыкIэу ащ епхыгъэ IофшIэнхэр зэшIуахынхэм апае ны мылъкур агъэфедэн алъэ­кIынэу шIыгъэным, цIыфхэм псэупIэ-коммунальнэ фэIо-фа­шIэ­хэм ауасэу атырэм комиссие хамыубытыкIынэу шIыгъэным, унагъоу сабыибэ зэрысхэм ягъэнэфэнкIэ зы шапхъэ щыIэным, фэтэрыбэу зэхэт унэхэм ягъэкIэжьын, нэмыкIыбэхэм ахэр афэгъэхьыгъэх. Джэпса­лъэхэм зэкIэми атегущыIэхи, аштагъэх.

ПстэумкIи Iоф 30 повесткэм щыгъэнэфэгъагъ. Пстэумэ ауж АР-м и ЛIышъхьэу КъумпIыл Мурат гущыIэр ыштагъ. Донецкэ ыкIи Луганскэ республикэ­хэм шIушIэ IэпыIэгъоу афатIупщыгъэм депутатхэм яIахь мымакIэу зэрэхалъхьагъэм, УФ-м и Президентэу Владимир Путиным хэушъхьафыкIыгъэ дзэ операцие Украинэм зэрэщыри­хьыжьагъэм республикэм зэ­рэдыригъэштагъэм апае зэ­кIэми зэрафэразэр апэ ащ къыхигъэщыгъ.

— Санкциехэм къиныгъоу къыздахьыгъэхэм апэшIуекIорэ Iофтхьэбзэ зэфэшъхьафыбэмэ УФ-м и Правительствэ кIэщакIо афэхъугъ. Ахэр бизнесым пылъхэм IэпыIэгъу ятыгъэ­ным, цIыфхэм ягумэкIыгъохэр нахь зэпычыгъошIу афэшIыгъэным афытегъэпсыхьагъэх. Пшъэ­рылъ шъхьаIэу тиIэр джа Iэпы­Iэгъухэр икъоу дгъэфедэнхэр ары. Iэзэгъу уцэу, гъомылапхъэу цIыфым анахь ищыкIа­гъэхэм ауасэхэр лъэшэу да­мыгъэкIоенхэм Iоф дэтэшIэ.

Ащ шIуагъэ къымытыгъэу пIон плъэ­кIыщтэп. Депутатхэри мы IофшIэным нахь чанэу къыхэлэжьэнхэ фае. Шъузщыхадзыгъэ койхэм уасэхэр ащыдамыгъэкIоенхэм шъунаIэ тежъугъэтынэу тышъущэгугъы, — къы­Iуагъ КъумпIыл Мурат.

ХЪУТ Нэфсэт. Сурэтхэр А. Гусевым тыри­хыгъэх.