«Щыгъыжъыем» иIофышIэхэм аIукIагъ
Адыгэ Республикэм и ЛIышъхьэу КъумпIыл Мурат кIэлэцIыкIу театрэу «Щыгъыжъый» зыфиIорэм ипащэу Уджыхъу Марыетрэ ащ щылажьэхэрэмрэ тыгъуасэ аIукIагъ.
Ащ фэгъэхьыгъэ тхыгъэ республикэм ипащэ и Телеграм нэкIубгъо къыригъэхьагъ. Театрэм иIофшIэн зэрэзэхищэрэм, тапэкIэ пшъэрылъэу зыфигъэуцужьыхэрэм лъэныкъохэр атегущыIагъэх.
Iофтхьабзэм хэлэжьагъ общественнэ организациеу «Адыгэ Хасэм» итхьаматэу ЛIымыщэкъо Рэмэзан.
Адыгеим и ЛIышъхьэ къызэриIуагъэмкIэ, театрэм Iутхэм IофшIэнышхо агъэцакIэ, кIэлэцIыкIухэр адыгэ культурэм нэIуасэ фашIых, тиныдэлъфыбзэ уасэ фашIыным ыкIи рыгущыIэнхэм фагъасэх.
— Лъэпкъым шIуагъэ къыфихьызэ Iоф зэришIэрэм фэшI театрэм ипащэу Уджыхъу Марыет лъэшэу сыфэраз. Амалэу щыIэмкIэ «Щыгъыжъыем» тапэкIи IэпыIэгъу тыфэхъущт, — къыхигъэщыгъ республикэм ипащэ.
Сурэтхэр А. Гусевым тырихыгъэх.