Инфраструктурэм хэхъоныгъэ ышIыным пай
Урысыем и Правительствэ унашъоу ышIыгъэм диштэу инфраструктурэм хэхъоныгъэ ышIыным фытегъэпсыхьэгъэ шIыкIакIэ Адыгеим щагъэфедэнэу рагъэжьагъ.
Инфраструктурэм ипсэуалъэхэр гъэпсыгъэнхэмкIэ предприятиехэм субсидиехэр къаIэкIэхьанхэм иамал ащ къытыщт.
Инвестиционнэ проектыкIэхэм къадыхэлъытэгъэ инфраструктурэм игъэпсын мы илъэсым сомэ миллион 283,7-рэ, ащ къыкIэлъыкIощт илъэситIум сомэ миллион 595,3-рэ зырыз шъолъырым щыпэIуагъэхьанэу агъэнафэ.
Урысыем экономикэ хэхъоныгъэмкIэ и Министерствэ ыухэсыгъэ инвестиционнэ проектыкIэхэм ООО-у «Озон Адыгея» зыфиIорэр ахагъэхьаным къыкIэдэу. Инвесторым къыгъэшъыпкъэжьыгъ Адыгеим и Теуцожь район гъомылэпхъэ ыкIи мыгъомылэпхъэ товархэр зыщаIыгъыщтхэ гъэтIылъыпIэ зэрэщигъэпсыщтыр. Паркэу «Ромекс-Теучежский» зыфиIорэм ар щагъэуцущт. ГъэтIылъыпIэм квадрат метрэ мини 107-рэ ыубытыщт. 2023-рэ илъэсым шышъхьэIум а комплексыр атIупщынэу рахъухьагъ.
Проектым игъэцэкIэн сомэ миллиарди 6-м ехъу пэIуагъэхьанэу агъэнафэ. ИщыкIэгъэ инфраструктурэр гъэпсыгъэным пае сомэ миллион 455-м ехъу халъхьан фае. Ащ нэмыкIэу ОZОN-р бэджэндэу зыIыгъым ахъщэ тедзэу сомэ миллиарди 2,2-рэ хилъхьащт, ащ ишIуагъэкIэ IофшIэпIэ чIыпIэ мини 2-м нэс агъэпсыщт.
Адыгеим и ЛIышъхьэу КъумпIыл Мурат къызэрэхигъэщыгъэмкIэ, мыщ фэдэ екIолIакIэм шIогъэшхо къеты, IофшIэпIэ чIыпIакIэхэр къызэрэзэ-Iуахыхэрэм дакIоу, бюджетым къихьэрэ хэбзэIахьхэми ахэхъо.