Урысые Федерацием и Къэралыгъо Думэ идепутатэу Хьасанэкъо Мурат Урысые политическэ партиеу «Единэ Россием» и Тхьаматэу Д. А. Медведевым иобщественнэ приемнэу Адыгэ Республикэм щыIэм зыгъэгумэкIырэ Iофы­гъохэмкIэ цIыфхэм пэIудзыгъэ шIыкIэм тетэу щадэгу­щыIагъ.

Республикэм исхэр Iофыгъо зэфэшъхьафхэм, фэтэрыбэу зэхэт унэм ыгупэ игъэцэкIэжьын, ком­мунальнэ фэIо-фашIэхэм алъатырэ уасэр тэрэз­-мытэрэзым, ощхыпс илъэ­дапIэхэм ягъэпсын ыгъэгумэкIыщтыгъэх.

Мыекъуапэ дэс нэбгырэ заулэмэ парламен­тарием зыкъыфагъэзагъ фэтэрыбэу зэхэт унэм игъэцэкIэжьынкIэ Iэпы­Iэгъу къафэхъунэу. Ахэм къызэраIуагъэмкIэ, зыщы­псэухэрэ унэм ышъхьэрэ электрооборудованиемрэ ары мыгъэ зэблахъунхэу рахъухьэрэр.

Къэралыгъо Думэм бюджетымрэ хэбзэIахьхэмрэкIэ и Комитет хэт Хьасанэкъо Мурат мы Iофыгъом изэшIохынкIэ гъэцэкIэкIо хабзэмрэ чIыпIэ зыгъэIорышIэжьынымрэ якъулыкъухэм зафигъэзагъ.

Район гупчэ заулэмэ адэсхэр газ уасэу къафалъытэрэм ыгъэра­зэ­хэрэп. Ар къаIэкIэзыгъэ­хьэрэ организацием мазэ къэс газыпкIэу къафилъытэрэмрэ агъэстырэмрэ бэкIэ зэрэзэтекI­хэрэм ахэр егъэгумэкIых. Мы Iофыгъор псынкIэу зэшIохыгъэным пае Хьасанэкъо Мурат респуб­ли­кэм икъулыкъухэу уплъэ­кIунхэр зэхэзыщэхэрэм зафигъэзагъ.

Мыекъуапэ имикрорайоныкIэ щыпсэухэрэр Къэ­ралыгъо Думэм идепутат къелъэIугъэх ощхыпс илъэ­дапIэхэм ягъэпсынкIэ IэпыIэгъу къафэхъунэу. Унэ­гъуабэ зыгъэгумэкIырэ мыщ фэдэ Iофыгъом изэшIохынкIэ Хьасанэкъо Мурат гъэцэкIэкIо ха­бзэм­рэ чIыпIэ зыгъэIорышIэ­жьынымрэ якъулыкъухэм тхылъ аIэкIигъэхьагъ.

— ЦIыфхэм ящыIэ­кIэ-псэукIэкIэ псэупIэ-коммунальнэ хъызмэтым мэхьанэшхо иI. Хэгъэгуми, республикэми япащэхэм акIуачIэ зэрэрахьылIэрэм ишIуагъэкIэ цIыфхэм яфитыныгъэхэр жъугъэу мы лъэныкъом щаукъорэп. Зыкъызэрэсфагъэ­зэгъэ Iофыгъохэм язэшIохын кIуачIэу сиIэр ес­хьылIэщт, — къыIуагъ Къэралыгъо Думэм идепутат.

Адыгэ Республикэм игъэцэкIэкIо хабзэ икъулыкъухэр чанэу Iофтхьабзэм къызэрэхэлэжьа­гъэхэр хэгъэунэфыкIыгъэн фае.

Къандор Анзор. Урысые Федерацием и Федеральнэ ЗэIукIэ и Къэралыгъо Думэ идепутат иIэпыIэгъу.