КIэлэцIыкIухэмрэ ныбжьыкIэхэмрэ якинотворчествэ хэхъоныгъэ ышIыным фэгъэхьыгъэ Урысые форумыр ятIонэрэу зэхащэ.

Гъэтхапэм и 31-м Iофтхьабзэр Горнэ-Алтайскэ щыкIощт. Урысыем ия IV-рэ фестивалэу кIэлэцIыкIухэмрэ ныбжьыкIэ­хэмрэ яфильмхэм яхьылIагъэм форумыр хэхьэ.

Урысыем, шъолъырхэм ащызэлъашIэрэ киностудиехэм Iоф ащызышIэхэрэр, хэбзэ къулыкъушIэхэр, кином хэшIыкI фызиIэхэр зэхахьэм хэлэжьэщтых. Пащэхэр шъолъырхэм ащылажьэхэрэм, сэнаущыгъэ зы­хэлъ кIалэхэм, пшъашъэхэм IэпыIэгъу зэрафэхъухэрэм къатегущыIэщтых..

Урысыем культурэмкIэ и Министерствэ и Общественнэ совет хэтэу, лъэхъаным диштэрэ искусствэм и Федерацие ипрезидентэу Николай Данн къызэри­Iуагъэу, кинотворчествэм имэхьанэ хэгъэгум щыхэхъо. Непэрэ кIэлэцIыкIухэм, ныбжьыкIэхэм цIыф цIэрыIохэр къа­хэкIыщтых.

Шъолъырхэм кинотворчествэр къащыIэтыгъэн фаеу Н. Данн елъытэ. ЗыгъэпсэфыпIэхэм, еджапIэхэм киностудиехэр къа­щызэIуахызэ, ныбжьыкIэхэм ятворчествэ хэхъоныгъэхэр ышIыщтых, искусствэм епхыгъэ сэнэхьатхэр къыхэзыхыщтхэр нахьыбэ хъущтых.

Адыгеим щыщ кIэлэцIыкIухэр, ныбжьыкIэхэр форумым хэлэжьэнхэу тэгугъэ.

Урысыем икинематографистхэм я Союз хэтэу, Адыгэ Рес­публикэм, Къэбэртэе-Бэлъкъарым искусствэхэмкIэ язаслуженнэ IофышIэу Нэгъаплъэ Аскэрбый тырихыгъэ фильмхэр Урысыем, дунаим ащашIэх. ЕгъэжьэпIэшIоу ащ ышIыгъэр тиныбжьыкIэхэм лъагъэкIотэн алъэкIыщт.

Сахьидэкъо Нурбый.