Адыгэ къэралыгъо университетым социальнэ технологиехэмрэ зекIонымрэкIэ ифакультет щеджэрэ студентхэр ятфэнэрэ Урысые олимпиадэу сервисым, зекIоным ыкIи хьакIэщ хъызмэтым афэгъэхьыгъэу зэхащагъэм ифинал нэсыгъэх.

Къэралыгъо 17-мэ, Урысыем ишъолъыр 83-мэ къарыкIыгъэ нэбгырэ 7973-рэ олимпиадэм хэлэжьагъэх. Зэнэкъокъум ифинал нэсыгъэх социальнэ технологиехэмрэкIэ зекIонымрэкIэ университетым ифакультет истудентхэу Къанэкъо Саидэ, Алиса Святкинар, Анастасия Иожица, Анастасия Акуловар, Данила Жигули­ныр. Диана Майорскаяр, Лариса Горкушинар, Юлия Волковар. ИкIыгъэ илъэсым текIоныгъэ къыдэзыхыгъагъэхэу Дарья Понкратьевамрэ Александр Венжегарэ джыри а купым хэфагъэх.

Проектыр зэхэзыщагъэхэм ахэтых зекIонымкIэ Федеральнэ агентствэр, Урысыем зекIон индустриемкIэ и Союз, Урысые географическэ обществэр, Республикэу Татарстан зекIонымкIэ и Къэралыгъо комитет, нэмыкIхэри. Урысыем гъэсэныгъэмкIэ иучреждении 110-рэ ахэм яIэпыIэгъух.

2021-рэ илъэсым къыщегъэжьагъэу Адыгэ къэралыгъо университетри ахэм ахэт. Олимпиадэм иэкспертхэм АКъУ-м социальнэ Iофыгъохэмрэ зекIонымрэкIэ икафедрэ ипащэу Ожъ Светланэ ахалъытагъ.

Жюрим хэтхэм номинацие зэфэшъхьафхэмкIэ къыхагъэщы­гъэх Алиса Святкинам, Анастасия Акуловам, Къанэкъо Саидэ яIоф­шIагъэхэр. Олимпиадэм икIэух зэнэкъокъу площадкэ 29-мэ ащыкIощт, тистудентхэм текIоныгъэр къыдахынэу тафэлъаIо.

(Тикорр.).