Дунаир дэхэ гъунэнчъ

Дунаир дэхэ гъунэнчъ, узыумэхъырэ кIуачI, нэп­лъэгъу мин, хэбзэ-бзыпхъэ тхьабз, зыми шIомыкIырэ шапхъ; узэмыжэхэрэ чъыIагъ, лъэпэогъу гузэжъогъу, узыужъгъэирэ шэпхъэнчъагъ; улIымэ, улъэшэу, щэIагъэ уиIэу узыфырекъужьымэ, ухэтми, а зэкIэ къыошIэкIыгъэ пстэумэ псыикIыгъо афэбгъотыныр – джары цIыфыгъэр, джары шъыпкъагъэр, джары щыIэныгъэр.

IункIыбзэр тыдэ щыIа?

УщыIэныр къина е псынкIа? ГъашIэ къэзыгъэшIагъэм ар ешIапэ. Адэ, щыIэныгъэм фэшIу IункIыбзэ щыIа? Сыдэущтэу ар къэбгъотыщта?

АкъылышIо гупшысакIохэр ары мыщ фэдэ упчIэхэм яджэуапхэр узэрамыгъэжэжьэу, упкIэпкIыгъэу къэзытыжьынхэр зыфызэшIокIыхэрэр. Ягушъхьэлэжьыгъэ – сам. Ар дэгъу. Ау анахь мэхьанэ зиIэр гушъхьэ IофшIагъэ пэпчъ нэмыкIхэмкIэ зы IэшIугъакIэ, моу узэмышъокIырэ псы къаргъоу, гуапэу, узылъызыщэу кIэлъыныр ары. Ащыгъум – къыдэхъугъ хэти имурад.

ИIоф кIэкIыгъэп

Зыдэжь сыкIогъэ тхакIом зэхэпщыхьэгъэ, зэхэукIыхьэгъэ ынапIэ, зэрэмычъыягъэр къыхэщэу, къыфэIэтыщтыгъэп. Ыгу шIугъэп. УкIэупчIэжьын имыщыкIагъэу, тхьапэ утIэрэхъыгъабэу, цунтхъагъэу къыгот чыматэм изым иIоф зэрэкIэмыкIыгъэр къыуагъашIэщтыгъ.

Псэ зиIэр ухъумэ

Псэ зыпытым икъэхъун Iофышхоба?! ЗымышIэрэр ным ерэупчI, ерэупчI фыгуцэр чIым хэзыдзагъэм, ерэупчI зы тхьапэ дэчъ цIыкIур къэгъагъэу, нэр пIэпызыхэу къэзыгъэкIыгъэм, чъыг чылъэкъо цIыкIужъыер чIэзыIуи, къэзыгъэкIыгъэм, набгъом къизыгъэ бзыу щырыр шIоIофэу зыпIужьи, тамэ рити, зытIупщыжьыгъэм, ерэупчI гъучIыр зыфытагъэм зэхишIагъэмкIэ, ерэупчI гущыIэр зигъомылэ иным, псэ ащ пытымэ. КъытэшIэкIыгъэ дунаишхом псэ хэмылъыгъэмэ, тэ, цIыфхэм, тпсэ лъакъо икIэсэн тыдэ къикIыныгъа?!

Арышъ, сикъош, утхэкIоныр, угупшысэкIоныр чэщ-зымэфэ Iофэу зэрэщымытыр къызгурыгъаIу, зэхэпцэгъэ-зэхэдзэгъэ къодыекIэ хэти, анахь цIыкIури, пфэгъэпцIэщтэп. Узышъхьамысыжьэу уиакъыл уцугъэ гъэлажьэ, тегъэпсыхь гупшысакIэм; гущыIэр – лъэшы, ау ари сабыим фэдэ хьазыр, бэрэ, бэрэ уфэсакъэу, уеубзэкIэу, уедэхашIэу, уухъумэу къызепхьакIыгъэ уж бгъэуцущт, джащыгъум щытыщт, пытэщт, ори уиешъ пфэлъэкIыгъэм уигъэиныщт, уигъэ­рэзэщт. Хэппшыхьэу, тебгъэкIуадэрэм фэдизба псэ зиIэ пстэур къызэрэотэжьырэр!

Мамырыкъо Нуриет.