Адыгэ Республикэм и Общественнэ па­латэ 2021-рэ илъэсым Iофэу ышIагъэр зыщызэ­фахьысыжьыгъэ зэхэсыгъоу тыгъуасэ щыIагъэм Адыгэ Республикэм и ЛIышъхьэу КъумпIыл Мурат хэлэжьагъ.

Джащ фэдэу Iофтхьабзэм хэлэжьагъэх Урысыем IофшIэнымкIэ и ЛIыхъужъэу, УФ-м и Общественнэ палатэ хэтэу, Адыгеим, Къэбэртэе-Бэлъкъарым, Къэрэщэе-Щэрджэсым янароднэ тхакIоу МэщбэшIэ Исхьакъ, общественнэ ыкIи профсоюз организациехэм япащэхэр.

Зэхэсыгъор зэрищагъ Адыгэ Республикэм и Общественнэ палатэ итхьаматэу Устэ Рус­лъан. ИкIыгъэ илъэсым ашIа­гъэм ар къытегущыIэзэ, щэфа­кIохэм яфитыныгъэхэр къэухъу­мэгъэнхэм, ныбжьыкIэ дзэ-патриотическэ движением хэхъоныгъэ ышIыным, коммунальнэ фэIо-фашIэхэр цIыфхэм зэрафагъэцакIэхэрэм алъэныкъокIэ Iофхэм язытет къытегущыIагъ. Бизнес цIыкIум ыкIи гурытым IэпыIэгъу афэхъугъэным, нэмыкI общественнэ мэхьанэ зиIэ Iофтхьабзэхэм палатэм хэтхэр зэрахэлэжьагъэхэр къы­хигъэщыгъ. Джащ фэдэу Общественнэ палатэм хэтхэм он­лайн зэхэсыгъуи 137-рэ рагъэ­кIокIыгъ, общественнэ уплъэ­кIунхэм къадыхэлъытэгъэ федеральнэ хэбзэгъэуцугъэ 19-мэ япроектхэм ахэплъагъэх. Урысыем и Общественнэ палатэ къикIыгъэ тхыгъэхэм ыкIи уна­шъохэм язэхэфын (пстэумкIи 760-рэ фэдиз) Iоф адашIагъ.

Общественнэ палатэр рес­публикэм щыкIогъэ Iофтхьабзэ­хэм зэрахэлэжьагъэм фэ­гъэ­хьыгъэ докладхэр зэхэсы­гъом къыщашIыгъэх АР-м и Общественнэ палатэ ипащэ игуа­дзэу Анна Крюковам, Урысые кIэлэцIыкIу фондым и Адыгэ республикэ къутамэ иправление итхьаматэу Татьяна Гоголевам, ныбжьыкIэ дзэ­-патриотическэ объединениеу «ЗыкIыныгъэм» итхьаматэу Джа­рымэ Рэщыдэ, УФ-м народнэ гъэсэныгъэмкIэ ыкIи наукэмкIэ иIофышIэхэм япрофсоюз организацие и Адыгэ респуб­ликэ къутамэ ипащэу Жэдэ Зурыет, общественнэ движениеу «Адыгэ Хасэ — Черкес парламент» зыфиIорэм итхьаматэу ЛIымыщэкъо Рэмэзан.

Адыгеим и ЛIышъхьэ зэхэсыгъом хэлажьэхэрэм закъыфигъазэзэ, АР-м и Общест­веннэ палатэ хэтхэр кIэу гъэнэфэ­жьыгъэхэу Iоф зашIэрэр илъэс зэрэхъугъэр ыкIи социальнэ цIыф куп зэфэшъхьафхэм яшIоигъоныгъэхэр мыхэм къызэрагъэгъунэхэрэр къыхигъэщыгъ.

— Мэхьанэ зиIэ Iофыгъохэм язэшIохынкIэ шъо шъуиеплъыкIэхэр къыдэтэлъытэх. Адыгеим щыпсэухэрэм зишIуагъэ якIыщт унашъохэр тызэгъусэу зэдэтэштэх, — къыIуагъ КъумпIыл Мурат.

Адыгеим и ЛIышъхьэ икIыгъэ илъэсым палатэм иIофшIэн ыкIи Урысыем и Къэралыгъо Думэ, АР-м и Къэралыгъо Совет —Хасэм хэтыщтхэм яхэдзынхэм общественнэ лъыплъэныгъэр зэращызэхащагъэм осэшIу фи­шIыгъ. Хэдзынхэр зэIухыгъэу, хабзэгъэуцугъэхэм диштэу рес­публикэм зэрэщыкIуагъэхэр къыхигъэщыгъ. ЛъыплъакIохэм ягъэхьазырын Общественнэ палатэм иIахьышIу хилъхьагъ.

Республикэм ипащэ къызыщыуцугъэхэм ащыщ УФ-м и Президентэу Владимир Путиным зэрихьэрэ политикэм общественнэ объединениехэр зэ­­къотхэу дырагъэштэным мэхьанэ зэриIэр. СанкциехэмкIэ тикъэралыгъо къызэрэпэуцухэ­рэм ыкIи экономикэм икризис апэшIуекIорэ унашъохэр штэ­гъэнхэмкIэ федеральнэ гупчэм Iофышхо зэригъэцакIэрэр хи­гъэунэфыкIыгъ.

Адыгеим и ЛIышъхьэ мэкъу­мэщ продукциер къыдэзыгъэ­кIырэ предприятиехэм япащэ­хэм ыкIи гъомылапхъэхэр, Iэ­зэ­гъу уцхэр къаIэкIэзыгъахьэ­хэрэм зэIукIэгъухэр адыриIа­гъэх. Общественнэ мэхьанэ зиIэ товархэм ащымыкIэнхэм ыкIи ахэм ауасэхэр дамыгъэ­кIоеным фытегъэпсыхьэгъэ зэ­зэгъыныгъэхэр адишIыгъэх.

Мыщ дэжьым щэфакIохэм яфитыныгъэхэр къэухъумэгъэнхэмкIэ Общественнэ палатэм мэхьанэу иIэм зыкъеIэты. Шъо­лъырым ипащэ зэрэхигъэунэфыкIыгъэмкIэ, мы лъэныкъомкIэ общественнэ лъыплъэным шIыкIэ тедзэхэр къыфэгъоты­гъэнхэм мэхьанэ иI.

Лъэныкъо шъхьаIэу КъумпIыл Мурат къыхигъэщыгъэхэм ащыщ лъэпкъ проектхэм япхырыщын. Шэпхъэ лъагэхэм атетэу къэра­­лыгъо программэхэр гъэцэ­кIа­гъэхэ зыхъукIэ шъолъырым исо­циальнэ лъэныкъо ыкIи иэко­номикэ, цIыфхэм ящыIэ­кIэ-псэу­кIэ зыкъаIэтыщт. Общественнэ палатэм ипшъэрылъыр хабзэм икъулыкъухэм арахьы­лIэщт пред­ложениехэр агъэхьазырынхэм пае зишIуагъэ къэ­кIощт общественнэ еплъыкIэхэр аугъоинхэр ыкIи зэфахьысыжьынхэр.

— Зэдэлэжьэныгъэм тэ ты­фэхьазыр, къытэшъухьылIэрэ еплъыкIэхэм атетэу тиIофшIэн гъэтэрэзыжьынхэр фэтэшIых. Джыри зэ къэсэIожьы, мы уахътэм обществэмрэ хабзэмрэ язэ­дэлэжьэныгъэ мэхьанэшхо зэриIэр. Общественнэ палатэр ащ фэдэ зэдэгущыIэгъум иплощадкэ шъхьаI, — къыIуагъ Къум­пIыл Мурат.

Джащ фэдэу республикэм ипащэ зигугъу къышIыгъэхэм ащыщ мыкоммерческэ организациехэм IэпыIэгъу зэрафэ­хъущтхэр. Непэрэ мафэм ехъу­лIэу шъолъыр бюджетым къыдыхэлъытагъ ащ пэIуагъэхьащт сомэ миллион 30.

Iофтхьабзэм икIэух Адыгеим и ЛIышъхьэ джыри зэ къыхи­гъэщыгъ Общественнэ палатэм хэтхэр министерствэхэм ыкIи ведомствэхэм япхыгъэ общест­веннэ советхэм, комиссиехэм яIофшIэн чанэу зэрахэлэжьэ­хэрэм ишIуагъэ къызэрыкIорэр.

— Общественностым илIыкIо­хэм еплъыкIэу ыкIи предложениеу къахьыхэрэр шъолъырым игъэIорышIэкIо командэхэм яIоф­шIэн къыдыхалъытэным фэхьазырых, — къыIуагъ КъумпIыл Мурат.

Iэшъынэ Сусан. Сурэтхэр А. Гусевым тырихыгъэх.