Адыгеим и ЛIышъхьэу КъумпIыл Мурат Адыгэ Республикэм экономикэ политикэмкIэ и Ко­ординационнэ совет изэхэсыгъо зэрищагъ.

Ар зыфэгъэхьыгъагъэр инвестиционнэ проектхэр пхырыщыгъэнхэмкIэ IэпыIэгъу зэрафэ­хъущтхэ Iофыгъохэм ягъэнэфэн.

Урысыем экономикэ хэхъоны­гъэмкIэ и Министерствэ ыухэсырэ инвестиционнэ проектыкIэхэм ахагъэхьанхэм пае инвестпроектхэм мыщ щатегущы­Iэнхэу къахалъхьагъэх. Инфраструктурэм иобъектхэр гъэ­псыгъэнхэмкIэ предприятиехэм субсидиехэр къаIэкIэхьанхэм иамал ащ къытыщт. Урысые Федерацием и Президентэу Владимир Путиным пшъэрылъ зэрафишIыгъэм тетэу IэпыIэгъу зэрафэхъущтхэ Iофтхьабзэхэм ар зыкIэ ащыщ. Урысые Федерацием и Правительствэ иунашъоу N 1704-р зытетым тегъэ­псыхьагъэу шъолъырхэм ин­фраструктурэм хэхъоныгъэу ащи­шIыщтым иамалыкIэ зэшIохыгъэ хъущт.

Мы Iофыгъом фэгъэхьыгъэу къэгущыIагъ Адыгэ Республикэм экономикэ хэхъоныгъэмкIэ ыкIи сатыумкIэ иминистрэу Шэуджэн Заур. Урысыем экономикэ хэ­хъоныгъэмкIэ и Министерствэ ыухэсыгъэ инвестиционнэ проектыкIэхэм ООО-у «Озон ­Адыгея» зыфиIорэр ахагъэхьаным къыкIэдэу. Инвесторым къыгъэшъыпкъэжьыгъ Адыгеим и Теуцожь район гъомылэпхъэ ыкIи мыгъомылэпхъэ товархэр зыщаIыгъыщтхэ склад зэрэ­щигъэпсыщтыр. Пшъэрылъыбэ зэ­шIозыхырэ паркэу «Ромекс-­Теучежский» зыфиIорэм ар щагъэуцущт. Складым квадрат метрэ мини 107-рэ ыубытыщт, сатыушIыпIэ инхэм товархэр аIэкIэгъэхьэгъэнхэм ар фытегъэпсыхьэгъэщт. 2023-рэ илъэсым шышъхьэIум а комплексыр атIупщынэу рахъухьагъ.

КъызэрэрадзэрэмкIэ, сомэ миллиарди 6-м ехъу инвестициехэу а проектым пэIухьащтых. ИщыкIэгъэ инфраструктурэр гъэпсыгъэным пае сомэ миллион 455-м ехъу халъхьан фаеу хъущт. Ащ нэмыкIэу ОZОN-м иарендатор ахъщэ тедзэу сомэ миллиарди 2,2-рэ хилъхьащт, IофшIэпIэ чIыпIэу мини 2-м нэс щыIэ хъущт.

Адыгеим и ЛIышъхьэ къызэрэхигъэщыгъэмкIэ, джырэ проектхэмкIэ ыкIи инвесторхэр IофшIэным къыхэгъэлэжьэгъэнхэмкIэ IэпыIэгъум мэхьанэшхо иIэу щыт.

ИкIэухым Координационнэ советым проектэу агъэнэфа­гъэр игъоу ылъэгъугъ. Инфраструктурэм хэхъоныгъэ егъэшIыгъэнымкIэ инвесторхэм ахъщэу агъэкIодыщтымкIэ мы илъэсым компенсациехэр аратыхэу рагъэжьэщт. Инвестиционнэ проектыкIэхэм апае инфраструкту­рэр гъэпсыгъэным телъытагъэу 2022-рэ илъэсым сомэ миллион 283,7-рэ, 2023-рэ ыкIи 2024-рэ илъэсхэм сомэ миллион 595,3-рэ зырыз апэIуагъэхьащт.