Адыгэ Республикэм экономикэ политикэмкIэ и Координационнэ совет изэхэсыгъоу тыгъуасэ щыIагъэм экспортым IэпыIэгъу фэхъугъэным щытегущыIагъэх.

АНО-у «Адыгэ Республикэм ипредпринимательствэ зезы­гъэушъомбгъурэ Гупчэм» къепхыгъэ Гупчэу экспортымкIэ IэпыIэгъу афэхъурэм ипащэ игуадзэу Дыдыхъу Алый ащ доклад къыщишIыгъ. Респуб­ликэм экспортымкIэ амалэу иIэхэм зягъэушъомбгъугъэнымкIэ санкциехэм зэрарэу къа­хьырэр зэрауплъэкIурэр ащ къы­Iуагъ. Адыгеим ипредприятие-экспортерхэм ащ фэдизэу экономическэ чIэнагъэ зэрамышIыщтыр къыхигъэщыгъ. Ар зэпхыгъэр гъусэныгъэ зыдыряIэхэр нахьыбэрэмкIэ Тыр­куем, СНГ-м хэхьэрэ хэгъэгу­хэм, КъокIыпIэ Благъэм, Азием зэрэщыIэхэр ары.

Предпринимательствэ цIыкIумрэ гурытымрэ ахэщагъэхэм бизнес-миссиехэр афызэхащэщтых, республикэм илIыкIохэр къэгъэлъэгъонхэмрэ ермэлыкъхэмрэ ахэлэжьэнхэмкIэ IэпыIэгъу афэхъущтых. Джащ фэдэу экспортерхэм IэпыIэгъу зэрара­тыщт Iофтхьэбзабэмэ ахэплъэн­хэу загъэхьазыры. Ащ къы­хиубытэщтых логистикэм пае суб­сидиехэр къыхэгъэкIыгъэнхэр, IэкIыб къэралыгъохэм ябэ­дзэрхэм патентхэр къащара­тыныр.

Адыгэ Республикэм экономи­кэ хэхъоныгъэмрэ сатыум­рэкIэ и Министерствэ федеральнэ проектэу «Акселерация субъектов малого и среднего предпринимательства» зыфи­Iорэм къыдыхэлъытагъэу 2022-рэ илъэсым мылъку тедзэ къа­тIупщынэу заявкэ ытыгъ.

Зэхэсыгъом къызэрэщаIуа­гъэмкIэ, хэгъэгум илогистическэ операторэу «Рускон» зыфиIорэм Урысыем икъухьэуцу­пIэхэмкIэ хьылъэхэр аIэкIэгъэ­хьэгъэнхэм тегъэпсыхьэгъэ Iоф­тхьабзэхэр зэрехьэх. Спе­циалистхэм зэралъытэрэмкIэ, IэпыIэгъу къызэрафэхъущтхэм ишIуагъэкIэ предприятиехэм экспорт-импорт амалэу яIэхэм ахагъэхъон алъэкIыщт.

МыщкIэ щысэшIоу щыт рес­публикэм ипредприятиехэу пэ­рытыныгъэ зыIыгъхэм ащыщэу ООО-у «Картонтарэр». Ащ ипащэу Сергей Погодиным зэрэхигъэунэфыкIыгъэмкIэ, «Картонтарэм» тхылъыпIэу IэкIыб къэралыгъохэм аIэкIигъахьэрэм хигъэхъон имурад.

Адыгеим и ЛIышъхьэ экспортым IэпыIэгъу фэхъугъэнымкIэ Гупчэм пшъэрылъ фишIыгъ Iофыгъоу къэтэджхэрэр игъорыгъозэ зэшIуихынхэу, чIыпIэхэм товархэр къащыдэзгъэкIхэрэм адеIэнэу.

«Предприятие цIыкIухэми инхэми тадеIэн фае. Мы Iофым муниципалитетхэри чанэу къы­хэлэжьэнхэм мэхьанэшхо иI. Предприятиехэм апашъхьэ къи­тэджэрэ IофыгъохэмкIэ респуб­ликэ Iэшъхьэтетхэм макъэ ара­гъэIун фае. Программэу щыIэхэр жъугъэфедэх, хэгъэгум и Президентэу Владимир Пу­тиным УФ-м и Правительствэ пшъэрылъ зэрэфишIыгъэм тетэу IэпыIэгъукIэу аратхэрэмкIэ макъэ яжъугъэIу», — къыIуагъ республикэм ипащэ.

АР-м и ЛIышъхьэ ипресс-къулыкъу