Экономикэр чIыпIэ къин зыщит лъэхъаным гъомылап­хъэ­хэм ыкIи цIыфхэм анахь ящыкIэгъэ товархэм ауасэхэр къызэтеIэжэгъэнхэмкIэ республикэм Iофтхьэбзэ гъэнэфа­гъэхэр щызэрахьанхэу Адыгэ Республикэм и ЛIышъхьэу КъумпIыл Мурат пшъэрылъ афишIыгъ.

Ащ епхыгъэу ермэлыкъ­хэм язэхэщэн нахь агъэлъэшыгъ ыкIи мы илъэсыр къызихьагъэм щегъэ­жьагъэу ермэлыкъ 220-м ехъу Адыгеим щызэха­щагъ. Тхьамафэ къэс му­ниципалитетхэми ермэ­лыкъхэр ащэкIох. Мыекъуапэ шэмбэтым имызакъоу, джы тхьаумафэми ахэр щызэхащэх.

Республикэм икъэлэ гупчэ щыкIорэ ермэлы­къым джырэблагъэ Адыге­им и ЛIышъхьэу КъумпIыл Мурат щыIагъ ыкIи ежь ышъхьэкIэ ыуплъэкIугъ то­варэу щащэрэм изэмы­лIэужыгъуагъэ зыфэдэр ыкIи предприятиехэм оп­товэ уасэкIэ къызэратIупщырэм тетэу гъомылап­хъэхэр щащэмэ. Мыщ ыпэкIэ мэкъумэщ товар­хэр къэзышIыхэрэм шъо­лъырым ипащэ заIокIэм а еплъыкIэм къыдырагъэштагъ.

Мыекъуапэ щыкIогъэ ермэлыкъым исатыу щэпIэ чIыпIэхэм республикэм ит предприятие анахь инхэм япродукцие ате­лъыгъ. Апэрэ зыгъэпсэфы­гъо мафэхэм ермэ­лыкъым хэлэжьагъэхэм япчъагъэ 70-м кIахьэщтыгъэмэ, къы­кIэлъыкIогъэ тхьамафэм ар 120-м нэсыгъ. Iэры­фэ­гъу уасэхэмкIэ къэп­щэфын плъэкIыщтыгъ лыр, пцэ­жъыер, кIэнкIэр, тхъур, да­гъэр, шъоущыгъур, щэхэкI гъомылапхъэхэр, шъоур, хэтэрыкIхэр, IэшIу-IушIухэр.

Бэдзэр уасэхэм анахьи нахь пыутэу ермэлыкъым гъомылапхъэхэр щаща­гъэх. ГущыIэм пае, шъоущыгъу килограммыр сомэ 57-рэ, дэгъэ литри 5-м — сомэ 520-рэ, чэтылым — соми 145-рэ, мыIэ­ры­сэм — сомэ 30, нэшэбэгум — сомэ 90-рэ аосагъ.

— Ермэлыкъ сатыум нахь зедгъэушъомбгъуным тынаIэ тедгъэтыщт, сыда пIомэ оптовэ уасэхэмкIэ продукциехэр цIыфхэм мыщ къыщащэфын амал яI. Республикэм щыпсэу­хэрэм къагурыIон фае икъун фэдиз гъомылапхъэ тишъолъыр къызэрэщы­да­гъэкIырэр, ахэм тащыкIэным игумэкIыгъо зэрэщымытыр, — къыIуагъ ­Адыгэ Республикэм и ЛIышъхьэу КъумпIыл Мурат.