Республикэу Узбекистан и Генеральнэ консулэу Ростов-на-Дону щыIэ Рустам Курганбаевыр ыкIи Генеральнэ кон­сульствэм иконсулэу а къалэм щыIэ Хужабахлил Аса­мовыр Узбекистан къикIыгъэ ныбжьыкIэхэу Адыгеим ще­джэхэ­рэм гъэтхапэм и 25-м аIукIагъэх. Iофтхьабзэр Адыгэ къэралыгъо университетым и Научнэ тхылъеджапIэ щыкIуагъ.

Гуфэбэныгъэ зыхэлъ зэIукIэгъум студентхэр анахьэу зыгъэгумэкIырэ Iофыгъохэр къыщаIэтын амал яIагъ.

— Банковскэ картэ­хэмкIэ ахъщэ ттIупщыным епхыгъэ Iофыгъор анахь тызыгъэгумэкIы­щтыгъэхэм ащыщ. Джащ фэд, Узбекистан паспортыкIэхэр къыщежьагъэх. Урысыем тимыкIэу ахэр зэрэзэдгъэгъотын тлъэ­кIыщт амалхэм татегущы­Iагъ, — къыIуагъ Мые­къопэ къэралыгъо университетым имедицинэ Институт IэзэнымкIэ ифакультет истудентэу Журабек Усмановым.

Нэужым Узбекистан илIыкIохэмрэ республикэм ит апшъэрэ еджапIэхэм яректорхэмрэ зы­хэлэжьэгъэхэ Iэнэ хъурае щыIагъ. Адыгэ Рес­публикэм ыкIи Респуб­ликэу Узбекистан яапшъэ­рэ еджапIэхэм гъэсэныгъэм ылъэныкъокIэ язэ­дэ­лэжьэныгъэ зэрэлъагъэ­кIотэщтым тегущыIа­гъэх. Адыгэ къэралыгъо уни­вер­ситетымрэ дунаим ща­гъэфедэрэ бзэ зэ­фэшъхьафхэр зыщара­гъэшIэрэ Узбекскэ къэ­ралыгъо университетымрэ гъэсэныгъэмкIэ программэхэр зэдагъэцакIэх. А зэдэлэ­жьэныгъэм ишIуа­гъэкIэ Узбе­кистан къикIыгъэ нэбгырэ 401-рэ АКъУ-м чIэхьагъ. Предпринимательствэмрэ пе­дагогикэм­рэкIэ Денаускэ институтым, Самаркандскэ къэралыгъо универ­ситетым зэрадэлэжьэщтхэмкIэ меморандумэу зыкIэтхагъэ­хэм якIэуххэр зэфахьысыжьыгъэх.

Iэшъынэ Сусан. Сурэтхэр Iэшъынэ Ас­лъан тырихыгъэх.