ИкIыгъэ илъэсым игъэтхэпэ мазэ и 27-м дунаим ехыжьыгъ тиныбджэгъу лъапIэу, АР-м культурэмкIэ ыкIи зекIонымкIэ язаслуженнэ IофышIэу, спортивнэ зекIонымкIэ спортым имастерэу Бэгъ Аслъан Хьаджымосэ ыкъор. ИIофшIэн туризмэмкIэ инструкторэу ригъэжьэгъагъ, етIанэ гъэпсэфыпIэ базэхэу «Горная», «Лэгъо-Накъ», «Кавказ», «Романтика» зыфиIохэрэм япэщагъ. Тыдэ зыщэIи зэхэщэкIо чанэу, зекIоным Адыгеим зыщебгъэушъомбгъун зэрэплъэкIыщтым шIошъхъуныгъэшхо фыриIэу щытыгъ ыкIи ащкIэ фэлъэкIыщтыр ышIагъ. ЗекIонымкIэ мэхьанэшхо зиIэхэу гъогухэм яшIын, ягъэтэрэзыжьын ыкIи туристическэ предприятиехэм яматериальнэ базэ хэхъоныгъэ егъэшIыгъэным иIоф ренэу хэлэжьагъ.

Бэгъ Аслъан япащэу якъиныгъэкIэ апшъэрэ катего­рие зиIэ зекIонхэр СССР-м, етIанэ Урысыем ичIыпIэ зэфэшъхьафхэм — Памир, Тянь-Шань, Алтай, Саяны, Байкал ащызэхищагъэх. Слетхэр, зэнэкъокъухэр, зекIохэу къушъхьэхэу ТIыбгэ, Фыщт, Ошъутен ыкIи ТхьачIэ защыдэкIоягъэхэри Аслъан зэхищэщтыгъэх.

ИIофшIагъэ къэралыгъом уасэ къыфишIи, Аслъан къыфагъэшъошагъэх медальхэу «Адыгеим и Щытхъузехь» ыкIи «За доблестный труд» зыфиIохэрэр.

1995-рэ илъэсым къыщегъэжьагъэу купэу «Псауныгъ», клубэу «Родник», туристхэм яклубэу «Крокус» зыфиIоу ежь ыцIэ зыхьырэм япэщагъ.

Бэгъым зекIоным ныбжьыкIэхэм шIу аригъэлъэ­гъугъ, ахэм непэ джы ежь иIоф лъагъэкIуатэ. Тэ Аслъан, бэрэ игугъу тэшIы, шIукIэ ар тыгу илъыщт.

Купэу «Крокус» хэтхэр.