ЦIыфхэм, анахьэу ковидыр къызэузыгъэхэм, диспансеризациер акIу­ным епхыгъэ IофшIэныр нахь агъэлъэшынэу Адыгеим и ЛIышъхьэу Къум­пIыл Мурат унашъо афишIыгъ.

Мы илъэсыр екIыфэ а Iоф­тхьабзэр кIощт. Мыгъэ ар нахь игъэкIотыгъэу зэхащэщт. Коронавирусым гу-лъынтфэ ыкIи жьыкъэщэпIэ системэхэм зэрарэу арихыгъэр пасэу къыхэгъэщыгъэным фэIорышIэщт. Мы Iофтхьабзэм хэлажьэ зышIоигъохэм зэпхыгъэхэ поликлиникэм зыфагъэзэн фае.

COVID-мкIэ зысымэджагъэ­хэм мэфэ 60 зытешIэкIэ диспансеризациер акIумэ хъущтэу врачхэм къаIуагъ.

ИгъэкIотыгъэ диспансеризацием уплъэкIун зэфэшъхьафхэр къыхеубытэх: лъым изытет игъэкIотыгъэу, жьы къызэращэрэм (сатурацием) еплъыщтых, Д-диметрие, спирометрие е спирографие, рентген, эхокардиографие ыкIи компьютернэ томографие ашIыщтых.

Къыхэгъэщыгъэн фае, мы уплъэкIун пстэури нэбгырэ пэпчъ фашIыщтэп. Диспансеризациер едзыгъуитIоу зэтеутыгъ. Ипсау­ныгъэкIэ щыкIагъэхэр иIэу апэ­рэ едзыгъом къызигъэлъагъокIэ, ащ елъытыгъэу ятIонэрэр ыкIу­нэу агъакIо. Мыщ нахь игъэ­кIо­тыгъэ уплъэкIунхэр хэхьэх. Мые­къопэ къэлэ IэзапIэу N 1-м иврач шъхьаIэу ЕмтIылъ Оксанэ къызэриIуагъэмкIэ, блэкIыгъэ илъэсхэм къызэрагъэлъэгъуа­гъэмкIэ, диспансеризациер зы­кIунэу къакIохэрэм «апэрэ едзыгъор скIунэу сыфаеп, ятIо­нэрэр ары» е «мыщ фэдэ спе­циалистыр сищыкIагъэп» зыIо­хэрэр къахэкIых. Арэущтэу щы­тэп мы Iофыр. Диспансеризаци­ем къыхиубытэрэр зэкIэ шIокI имыIэу цIыфым ышIын фае.

ИгъэкIотыгъэ уплъэкIунхэм къагъэлъэгъорэ кIэуххэм ялъытыгъэу ищыкIэгъэ Iэзэныр ыкIи медицинэ реабилитациер вра­чым къыгъэнэфэщт. Iэшъынэ Сусан.