Адыгэ Республикэм иминистрэхэм я Кабинет тыгъуасэ иIэгъэ зэхэ­сы­гъом 2021-рэ илъэсым республикэм социальнэ-экономикэ хэхъоныгъэу ышIыгъэхэм щатегущыIагъэх.

Адыгеим и ЛIышъхьэу КъумпIыл Мурат пшъэрылъ къызэрэфишIыгъэм тетэу АР-м и Премьер-министрэ ипшъэрылъхэр зыгъэцэкIэрэ КIэрэщэ Анзаур зэхэсыгъор зэрищагъ.

АР-м экономикэ хэхъоны­гъэмрэ сатыумрэкIэ иминистрэу Шэуджэн Заур зэхэсыгъом доклад къыщишIыгъ. Ащ зэрэхигъэунэфыкIыгъэмкIэ, экономикэм илъэныкъо шъхьаIэхэмкIэ республикэм гъэрекIо хэхъо­ныгъэ ышIын ылъэкIыгъ.

2021-рэ илъэсым сомэ миллиарди 153-м ехъу зыосэ регион продукт къахьыжьыгъэу къырадзэ. 2020-рэ илъэсым сомэ миллиарди 143,2-рэ тефагъ къахьыжьыгъагъэм.

2021-рэ илъэсым гурыт лэ­жьапкIэр сомэ мин 35,6-м, цIыфхэм ахъщэу къаIэкIахьэрэр проценти 107,3-м нэсы­гъагъ. ГъэрекIо сомэ миллиард 25-рэ фэдиз пенсиехэу, ахъщэ IэпыIэгъоу аратыгъ.

Ермэлыкъхэр республикэм зэрэщызэхащэхэрэм уасэр нахь къызэтыреIажэ. Илъэсым къыкIоцI ермэлыкъ 1285-рэ муниципалитетхэм ащызэха­щагъ, мэкъу-мэщым къыща­­хьы­жьырэ гъомылапхъэхэр зы­щы­IуагъэкIыщт сатыушIыпIэ чIыпIи 136-рэ къызэIуахыгъ.

2021-рэ илъэсым сомэ миллиарди 141-рэ зыосэ товархэр зэрагъэкIуагъэх. Розничнэ сатыумкIэ Адыгеим ЮФО-м апэрэ чIыпIэр щиIыгъ. Урысыем егъэ­пшагъэмэ, процент 15-кIэ ар апэ ишъыгъ. 2021-рэ илъэсым зекIо нэбгырэ мин 470-рэ Адыгеим къихьагъ.

ГъэрекIо промышленнэ производствэм ииндекс проценти 110-рэ хъугъэ. Сомэ миллиард 27-рэ фэдиз зытефэрэ IофшIэнхэр псэолъэшIыным щагъэцэкIагъэх. ГъэрекIо псэупIэ квадрат метрэ мин 307-рэ республикэм щатыгъ.

Республикэм истратегическэ пшъэрылъхэм зэу ащыщ инвестициехэр нахьыбэу Адыгеим иэкономикэ къыхягъэлъхьэгъэныр. 2021-рэ илъэсым сомэ миллиард 33,4-рэ хъурэ инвести­циехэр капитал шъхьаIэм къыхалъхьагъэх. Анахьэу анаIэ зы­тырагъэтырэр промышленнэ парк Тэхъутэмыкъое районым щы­гъэпсыгъэныр, зыгъэпсэ­фы­пIэу «Лэгъонакъэ» шIыгъэныр ары.

«Непэ Iофхэр экономикэм зэрэщызэпыфэхэрэмкIэ типроизводствэхэм зядгъэушъомб­гъунэу амал щыI. Республикэм и ЛIышъхьэу КъумпIыл Мурат ахэр зэрагъэфедэщт шIыкIэхэр къыгъэнэфагъэх. Ахэр амал зэриIэкIэ нахь псынкIэу щыIэныгъэм щыпхырытщынхэ, муниципальнэ образование пэпчъ хэхъоныгъэ зэришIыщт лъэныкъохэр иIэнхэ фае», — къы-Iуагъ КIэрэщэ Анзаур.

АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч зэхэсыгъом къызэрэщиIуагъэмкIэ, социальнэ Iофтхьабзэхэр зыгъэцэкIэрэ мыкоммерческэ организациехэм 2021-рэ илъэсым сомэ миллион 24,3-м ехъурэ грантхэр аратыгъэх. Мы аужырэ илъэсищым ахэм фэди 4-кIэ къахэхъуагъ.

Республикэм икъэралыгъо программэу «Культурэм хэхъо­ныгъэ егъэшIыгъэныр» зыфи­Iорэр зэрагъэцэкIагъэми зэхэсыгъом щытегущыIагъэх. А программэм ипхырыщын гъэ­ре­кIо сомэ миллиард 1,2-рэ фэдиз пэIуагъэхьагъ. АР-м куль­турэмкIэ иминистрэу Аулъэ Юрэ зэрэхигъэунэфыкIыгъэмкIэ, программэр зэрэщытэу агъэцэ­кIагъ, учреждениехэм азыныкъо нахьыбэмэ гъэцэкIэжьын Iоф­шIэнхэр арашIылIагъэх, оборудо­ваниякIэр къащэфыгъ. Илъэсым къыкIоцI Iофтхьэбзэ 3000-м ехъу зэхащагъ. Адыгеим июбилей игъэмэфэкIын зэрэзэхащэщтми зэхэсыгъом щытегущыIагъэх.

ЦIыфхэм IофшIэн къафэзыгъотырэ къэралыгъо къулыкъум АдыгеимкIэ и ГъэIорышIапIэ ипащэу Галина Цыганковар къэ­ралыгъо программэу «ЦIыф­хэм IофшIэн къагъотынымкIэ IэпыIэгъу афэхъугъэныр» зыфиIорэр 2021-рэ илъэсым зэрагъэцэкIагъэм икIэуххэм къатегущыIагъ. КIэрэщэ Анзаур къулыкъум иIофшIэнкIэ щыкIагъэу иIэхэр дэгъэзыжьыгъэнхэмкIэ, АР-м и ЛIышъхьэ къыгъэуцугъэ пшъэрылъхэр гъэцэ­кIэгъэнхэмкIэ пшъэрылъ гъэнэфагъэхэр фишIыгъэх.

Гъэтхапэм и 27-м жьыбгъэшхоу щыIагъэм зэрарэу къыхьыгъэхэм ядэгъэзыжьын епхыгъэ Iофыгъо зэхэсыгъом икIэух щы­хэплъагъэх. АР-м иминист­рэхэм я Кабинет ипащэ зэрэхи­гъэунэфыкIыгъэмкIэ, Адыгеим и ЛIышъхьэ пшъэрылъ зэрафи­шIыгъэм тетэу жьыбгъэм къыз­дихьыгъэ тхьамыкIагъохэм ядэ­­гъэзыжьынкIэ ыкIи цIыфхэм IэпыIэгъу афэхъугъэнымкIэ ищы­кIэгъэ Iофтхьабзэхэр псынкIэу зэрахьащтых.

АР-м и ЛIышъхьэ ипресс-къулыкъу