Адыгеим и ЛIышъхьэу КъумпIыл Мурат тхьамэтагъор дызэрихьэзэ Адыгэ Республикэм хэбзэгъэуцугъэр щамыукъонымкIэ Координационнэ зэIукIэм изэхэсыгъоу Правительствэм иунэ щыкIуагъэр зэрищагъ.

Анахь Iофыгъо шъхьаIэхэу зытегущыIагъэхэм ащыщыгъэх лъэпкъ ыкIи федеральнэ проектхэм ягъэцэкIэнкIэ хэбзэу­къоныгъэу къыхагъэщыгъэхэр.

Федеральнэ казначействэм АдыгеимкIэ и ГъэIорышIапIэ ипа­щэ ипшъэрылъхэр зыгъэцэкIэрэ Жэнэ Мурат къызэри­IуагъэмкIэ, 2021-рэ илъэсым лъэпкъ проектхэм атегъэпсы­хьагъэу Урысыем ишъолъырхэм къафыхагъэкIыгъэ фе­деральнэ мылъкум епхыгъэу уплъэкIун 26-рэ ГъэIорышIапIэм зэхищагъ. Анахьэу ахэр зэпхыгъагъэхэр демографиер, цIыфхэр зычIэсыщтхэ унэхэр, псауныгъэр къэухъумэгъэныр, автомобиль гъогу дэгъухэр ыкIи щынэгъончъэхэр щыIэнхэр ары. Джащ фэдэу гъэсэныгъэм, культурэм, тыкъэзыуцухьэрэ дунаим язытет ащ къыхеубытэх. Бюджет хэбзэгъэуцугъэу щыIэр зыукъуагъэхэм ыкIи уплъэкIунэу зэхащагъэхэм якIэуххэм афэгъэхьыгъэ материалхэр хэбзэ­ухъумэкIо, уплъэкIокIо къулыкъухэм афагъэхьыгъэх.

Докладым къытегущыIэзэ Адыгеим и ЛIышъхьэ къызэрэхигъэщыгъэмкIэ, лъэпкъ проект­хэм, къэралыгъо программэхэм атегъэпсыхьэгъэ бюджет мылъкур шIуагъэ хэлъэу гъэфедэгъэ­нымкIэ мы лъэныкъом фэгъэзэгъэ структурэ пстэуми зэдегъэштэныгъэ азыфагу илъыным мэхьанэшхо иI.

«Федеральнэ гупчэм амалы­шхохэр къытетых республикэмкIэ пшъэрылъ инхэр зэшIотхынхэм пае. А IофшIэным амал зэриIэкIэ нахь шIогъэ ин къегъэтыгъэным зэкIэми тыдэ- лэ­жьэн, щыIакIэр нахьышIум ылъэ­ныкъокIэ зэхъокIыгъэ зэ­рэхъурэр цIыфхэм зэхядгъэшIэн фае», — къыхигъэщыгъ АР-м и ЛIышъхьэ.

Ащ нэужым республикэм бзэджэшIагъэхэм алъэныкъокIэ иIофхэм язытет ыкIи Iоф­тхьабзэу зэрахьэхэрэм афэгъэ­хьыгъэу къыIотагъ Адыгэ Рес­публикэм хэгъэгу кIоцI Iоф­хэмкIэ иминистрэу Олег Безсмельницыным.

ЗэрэхагъэунэфыкIыгъэмкIэ, илъэсэу икIыгъэм республикэм криминогеннэ лъэныкъомкIэ иIофхэм язытет мыщ фэд: пстэумкIи бзэджэшIэгъэ 4496-рэ агъэунэфыгъ, ащ щыщэу бзэджэшIэгъэ хьылъэхэр зэрэ­хъухэрэр 1062-рэ. Хэбзэгъэуцугъэу щыIэхэр мыукъогъэнхэмкIэ анахь мэхьанэшхо зэратырэ лъэныкъохэм ащыщых къолъхьэ тын-Iыхыным пэуцужьыгъэныр, наркотикхэр хэбзэнчъэу зэрагъэфедэхэрэм пэшIуекIорэ Iоф­тхьабзэхэр гъэлъэшыгъэнхэр, гъогухэм къатехъухьэрэ тхьамы­кIагъохэм къакIегъэчыгъэныр.

Адыгэ Республикэм гъэсэ­ныгъэмрэ шIэныгъэмрэкIэ и Министерствэ къулыкъу гъэнэфагъэхэр игъусэхэу зыныбжь имы­къугъэхэр бзэджэшIагъэхэм ахэщагъэ мыхъунхэм пае Iофтхьэбзэ хэушъхьафыкIы­гъэ­хэр зэрахьэх. Ахэм ахэхьэх рейдхэр, кIэлэцIыкIухэм яфи­тыныгъэхэр къэухъумэгъэнхэр, шъхьэихыгъэ урокхэр, зэнэ­къо­къухэр ыкIи нэмыкIхэр зэ­хэ­щэгъэнхэр. Ащ нэмыкIэу илъэси 9 фэдиз хъугъэу «цыхьэшIэгъу телефонэу» кIэлэцIыкIухэм япхыгъэ IофыгъохэмкIэ къызфагъэфедэн алъэкIыщтыр щыI: 8-800-2000-122-р